អត្ថបទ៖ ជា ស្រស់

សៀមរាប៖ ផ្លូវមួយចំនួននៅក្នុងតំបន់រមណីយដ្ឋានអង្គរ ត្រូវបានអាជ្ញាធរជាតិអប្សរា ធ្វើការជួសជុលកែលម្អ ឲ្យមានសោភណភាព ឡើងវិញ។

លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា មានប្រសាសន៍ថា នៅចុងឆ្នាំ២០២១ អាជ្ញាធរជាតិអប្សរាកំពុងបន្តជួសជុលកែលម្អផ្លូវថ្នល់មួយចំនួនក្នុងរមណីយដ្ឋានអង្គរ ជាពិសេស ផ្លូវក្នុងវង់តូចចាប់ពីមុខព្រះលានជល់ដំរីរហូតដល់ស្រះស្រង់ និងបរិវេណប្រាសាទអង្គរវត្ត។ លោកថា ការងារកែលម្អផ្លូវថ្នល់ខាងលើនេះ រួមមានការអ៊ុតបេតុងកៅស៊ូផ្លូវ (AC) និងការចាក់បេតុងសងខាងការពារផ្លូវថ្នល់ប្រវែងសរុបជិត ៩គីឡូម៉ែត្រ។ លោកបន្ថែមថា គម្រោងស្តារហេដ្ឋារចនាសម្ព័ន្ធផ្លូវឡើងវិញនេះ មិនត្រឹមតែគិតទៅលើគុណភាពខ្ពស់ប្រើប្រាស់បានយូរអង្វែងប៉ុណ្ណោះទេ ថែមទាំងផ្តោតខ្លាំងទៅលើសោភណភាពតាមដងផ្លូវផងដែរ។ 

លោក អគ្គនាយករងបញ្ជាក់ថា ការរៀបចំកែលម្អនេះ ក៏ដើម្បីត្រៀមទទួលភ្ញៀវទេសចរមកទស្សនារមណីយដ្ឋានអង្គរឆាប់ៗនាដើមឆ្នាំ២០២២ខាងមុខ ស្របតាមការរៀបចំរបស់រាជរដ្ឋាភិបាល ហើយក៏ជាផ្នែកមួយដើម្បីជួយសម្រួលដល់ការធ្វើដំណើររបស់បងប្អូនប្រជាពលរដ្ឋ និងភ្ញៀវទេសចរឲ្យទទួលបានអារម្មណ៍ស្រស់ស្រាយ សុវត្ថិភាព  និងផាសុកភាពលើសពីមុន ព្រមទាំងបង្ហាញអំពីភាពរីកចម្រើនដែលអាជ្ញាធរជាតិអប្សរាកំពុងធ្វើក្នុងតំបន់រមណីយដ្ឋានអង្គរ៕