បន្ទាយមានជ័យ៖ ទណ្ឌិតចំនួន ២៧នាក់ នៅខេត្តបន្ទាយមានជ័យ ទទួលបានការលើកលែងទោស ពី៣ខែ ដល់៦ខែ ក្នុងឪកាសពិធីបុណ្យចូលឆ្នាំថ្មីប្រពៃណីជាតិខ្មែរ ដែលមន្ត្រី និងសមត្ថកិច្ចពាក់ព័ន្ធទើបនឹងធ្វើពិធីនៅព្រឹកថ្ងៃទី១៩ ខែឧសភា ឆ្នាំ២០២១ នៅក្នុងពន្ធនាគារផ្ទាល់ ស្ថិតក្នុងភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។ ការលើកលែងទោសនោះបានធ្វើឡើងក្រោមវត្តមាន លោក គឹងវណ្ណៈ អភិបាលរងខេត្តបន្ទាយមានជ័យ លោក តេង សាម៉ៃ ព្រះរាជអាជ្ញារងខេត្តបន្ទាយមានជ័យ និងលោក អ៊ុង ស៊ីផាន ប្រធានពន្ធនាគារខេត្តបន្ទាយមានជ័យ។

 

លោក អ៊ុ ស៊ីផាន បានឱ្យដឹងថា ជនជាប់ឃុំក្នុងពន្ធគារខេត្តបន្ទាយមានជ័យកំពុងឃុំជាក់ស្តែងមានចំនួនសរុប​ ១.៥៧៧នាក់ (ស្រី​ ៩៩នាក់)​ ជនត្រូវចោទមានចំនួន ២៤៩នាក់(ស្រី​ ១១នាក់) ជនជាប់ចោទមានចំនួន​ ២៤៩នាក់ (ស្រី​ ១៧នាក់) ពិរុទ្ធជនមានចំនួន ៧៧៣នាក់ (ស្រី​ ៤៦នាក់) ទណ្ឌិតមានចំនួន ៣២៦នាក់ (ស្រី ២៥នាក់) អនីតិជនមានចំនួន​ ១២៥នាក់(ស្រី៦នាក់) ចាប់ចូលថ្មីមេខ្យល់មានចំនួន​ ៧៤នាក់(ស្រី៧នាក់)។ 

លោក អ៊ុង សុីផាន បានបញ្ជាក់ទៀតថា​ ពន្ធនាគារខេត្តបន្ទាយមានជ័យ​ បានអនុវត្តនូវតួនាទីភារកិច្ចរបស់ខ្លួនដូចជាការអប់រំកែប្រែ​ស្ដារនីតិសម្បទា ការបណ្ដុះបណ្ដាលវិជ្ជាជីវៈ ការរក្សាសន្តិសុខសណ្ដាប់ធ្នាប់នៅក្នុងពន្ធនាគារ​ ការងារកសិកម្មសិប្បកម្ម ការអភិវឌ្ឍធនធានមនុស្ស និងការអភិវឌ្ឍហេដ្ឋារចនាសម្ព័ន្ធនានា​ ប្រកបដោយភាពទទួលខុសត្រូវខ្ពស់។​ ក្រៅពីនេះអង្គភាពមានប៉ុស្តិ៍សុខភាពមួយខ្នងដែលគ្រប់គ្រងដោយអង្គភាពផ្ទាល់​ និងមានផ្នែកសុខាភិបាលជាអ្នកទទួលខុសត្រូវ។​ 

ចំពោះអង្គភាពបានយកចិត្តទុកដាក់លើគោលនយោបាយកំណែទម្រង់ពន្ធនាគារគឺ​ ការអប់រំកែប្រែ​ និងស្ដារនីតិសម្បទាដល់ជនជាប់ឃុំដែលមានការអប់រំផ្លូវចិត្ត​ រៀនអក្សរខ្មែរ​គ្រប់ចំណេះដឹង ដែលចំណុចនេះអង្គភាពបានយកចិត្តទុកដាក់ធ្វើការបែងចែកចំណាត់ថ្នាក់សន្តិសុខដែលជាមូលដ្ឋានសម្រាប់ស្នេីសុំបន្ធូរបន្ថយ​ និងលើកលែងទោសដល់ទណ្ឌិតស្របតាមនីតិវិធីច្បាប់។​ ជនជាប់ឃុំទាំងអស់ត្រូវបានប្រធានពន្ធនាគារយកចិត្តទុកដាក់បណ្តុះបណ្តាលវិជ្ជាជីវៈជូនដល់ពួកគាត់មានដូចជា រៀនកាត់ដេរ រៀនជួសជុលគ្រឿងអេឡិចត្រូនិច្ច​ រៀនជួសជុលម៉ួតូ រៀនភ្លេងសម័យ រៀនកាត់សក់ និងរៀនអក្សរខ្មែរជាដើម​ ក្នុងនោះជនជាប់ឃុំត្រូវបានបន្ធូបន្ថយទោសលើកលែងទោសក្នុង១ឆ្នាំមានចំនួន​ ៣លើក។​ 

ជាមួយគ្នានោះ​ លោក​ គឹង វណ្ណៈ​ បានឱ្យដឹងថា​ ការបន្ធូបន្ថយដល់ទណ្ឌិតចំនួន​ ២៧នាក់​ ក្នុងនោះលើកលែងទោសមានរយៈពេល៣ខែ​ ចំនួន​ ១៧នាក់​ បន្ធូបន្ថយទោសរយៈពេល​ ៦ខែ​ ចំនួន​ ១០នាក់​ (ស្រី១នាក់)។​ ទន្ទឹមនឹងនោះ​ លោកបានធ្វើការផ្តាំផ្ញើរដល់អ្នកជាប់ឃុំទាំងអស់ក្រោយពីស្គាល់រសជាតិជាប់ពន្ធនាគារ​ហើយ​ នៅពេលចេញទៅវិញត្រូវចេះកែខ្លួនឱ្យក្លាយជាមនុស្សល្អ ពលរដ្ឋល្អ​ ទើបអាចរស់នៅក្នុងសង្គមបានស្រួល៕

ដោយ៖​ ប៊ុន ចាន់ថន