ភ្នំពេញ៖ មានបុគ្គលជាច្រើននាក់កំពុងមានអាការៈឈឺបំពង់កខ្លាំង និងតិចតួច ក្នុងអំឡុងពេលរាតត្បាតដោយជំងឺកូវីដ១៩ ។ អាការៈក្តៅខ្លួនខ្លាំងលើសពី ៣៧.៥អង្សាសេ និងអាការៈឈឺបំពង់កខ្លាំង ជារោគសញ្ញាមួយកក្នុងចំណោមរោគសញ្ញាដទៃទៀតនៃជំងឺកូវីដ១៩ ។ ដូច្នេះហើយ បានជាបុគ្គលដែលមានអាការៈឈឺបំពង់ តែងមានការភ័យព្រួយបារម្មណ៍ពីរោគសញ្ញាដែលខ្លួនកំពុងតែមានក្នុងខ្លួន។ យ៉ាងណាមិញ ក្រៅពីកូវីដ១៩ អាការៈឈឺបំពង់កខ្លាំង វាអាចបណ្តាលមកពីបញ្ហាផ្សេងទៀត ដែលមិនមែនជាជំងឺកូវីដ១៩ ។ តើការឈឺបំពង់ក បែបនេះអាចបណ្តាលមកពីជំងឺប្រភេទអ្វី ហើយអាចព្យាបាល ឬធ្វើយ៉ាងដូចម្តេចទើប ការពារខ្លួនកុំអោយកើតជំងឺឈឺបំពង់កនេះ?

បើតាមលោកវេជ្ជបណ្ឌិត លីម ពេជ្រដារ៉ាស៊ី ប្រធានគ្លីនិច លីមពេជ្រដារ៉ាស៊ី ត្បូងឃ្មុំ ឱ្យស៊ីអិនស៊ីដឹងថា អាការៈឈឺបំពង់កនេះ បណ្តាលមកពីកត្តាចំនួនពីរសំខាន់ៗ ។ ទី១ កត្តាមេរោគ និងទី២ កត្តាចំណីអាហារ ។ កត្តាមេរោគ មកពីពួកបាក់តេរី និងពួកវីរុស និងចំណីអាហារ ដូចជាពពួកអាហារដែលខ្លាញ់ខ្លាំង ពពួកហិរ និងអាហារពួក Fast Food ជាពិសេសទឹកកក ដែលជាផ្នែកមួយអាចធ្វើអោយមានអាការៈឈឺបំពង់កជាដើម។ លោកវេជ្ជបណ្ឌិត រ៉ាស៊ី បន្តថា ដើម្បីកុំឱ្យមានបញ្ហាទាំងពីរខាងលើនេះ ជៀសវាងការទទួលទាន អាហារ Fast Food ច្រើនពេក ការលាងដៃឱ្យបានស្អាត និងជ្រើសរើសវិធីចំអិនអាហារ ឱ្យបានស្អាត និងត្រឹមត្រូវ ។ 

ចំពោះវិធីព្យាបាលនៅក្នុងផ្ទះ គឺត្រូវញុំាទឹកឱ្យបានច្រើន, ត្រូវខ្ពុរមាត់ជាមួយទឹកអំបិល, ញុំាទឹកក្រូចឆ្មារទឹកឃ្មុំ, និងដុសសំអាតធ្មេញឱ្យបានទៀងទាត់ ។ លោកវេជ្ជបណ្ឌិត បញ្ជាក់ថា បើសិនជាយើងធ្វើវិធីបែបនេះក្នុងផ្ទះរយៈពេល ១ថ្ងៃឬ២ថ្ងៃ មិនមានប្រសិទ្ធភាពទេ ត្រូវព្យាបាលដោយប្រើថ្នាំពេទ្យ ដោយសារការរលាកបំពង់កខ្លះ បណ្តាលមកពីមេរោគ វាមិនមែនដោយសារតែចំណីអាហារ ។

ទន្ទឹមនឹងនោះ បើសិនការឈឺបំពង់ក នៅតែអូសបន្លាយដល់មួយសប្តាហ៍ហើយ នៅតែឈឺ យើងត្រូវដាក់ការសង្ស័យដោយខ្លួនឯង ទៅនឹងជំងឺប្រភេទថ្មី កូវីដ១៩ ពីព្រោះជាទូទៅការរលាកបំពង់ក ស្តែងចេញក្នុងរយៈពេលមួយសប្តាហ៍ហើយការប្រើវិធីព្យាបាលដោយថ្នាំពេទ្យ គឺវានឹងជាសះស្បើយហើយ តែបើមានអាការៈឈឺរយៈពេលយូរជាងមួយសបា្តហ៍ ត្រូវទៅពេទ្យ ឱ្យក្រុមគ្រូពេទ្យយកសំណាកទៅពិនិត្យ ទើបដឹងច្បាស់ថា បុគ្គលឈឺបំពង់កខ្លាំងនោះ មានវិជ្ជមានកូវីដ១៩ ឬមិនមាន ។ 

លោកវេជ្ជបណ្ឌិត លីម ពេជ្រដារ៉ាស៊ី បញ្ជាក់ថា ការឈឺបំពង់កនេះ ក្រៅពីជំងឺកូវីដ១៩ វាមិនប៉ះពាល់ធ្ងន់ធ្ងរដល់អាយុជីវិតនោះទេ គ្រាន់តែប៉ះពាល់ខ្លះដល់សុខភាពប៉ុណ្ណោះដូចជា ធ្វើឱ្មានពងបែកក្នុងមាត់ ពិបាកលេបចំណីអាហារ និង ពិបាកនិយាយស្តី ជាដើម៕

ដោយ៖ គង់ វណ្ណៈ