សាច់រឿង៖

ប្រទេសចិន និង​ នេប៉ាល់ កាលពីថ្ងៃអង្គារ បានប្រកាសរួមគ្នានូវកម្ពស់ថ្មីរបស់ភ្នំ អេវឺរ៉េស (Everest) ដែលជាភ្នំខ្ពស់ជាងគេបំផុតនៅលេីពិភពលោក​ ដោយបានបញ្ចប់ភាពមិនស្របគ្នាអស់រយៈពេលមួយទសវត្សរ៍រវាងប្រទេសទាំងពីរទាក់ទិននឹងកម្ពស់របស់ភ្នំនេះ។ 

ភ្នំ អេវឺរ៉េស (Everest) ឥឡូវនេះ មានកម្ពស់ ៨.៨៤៨,៨៦ម៉ែត្រ គឺខ្ពស់ជាងការវាស់ពីមុនរបស់ប្រទេសនេប៉ាល់ជិត ១ម៉ែត្រ​ និង ខ្ពស់ជាងការវាស់ពីមុនរបស់ប្រទេសចិនជាង ៤ម៉ែត្រ។ 

កាលពីមុន​ នេប៉ាល់បានវាស់កម្ពស់ភ្នំ អេវឺរ៉េស (Everest) ស្មើនឹង ៨.៨៤៨ម៉ែត្រ​ ចំណែកចិនវិញវាស់ឃេីញកម្ពស់ ៨.៨៤៤,៤៣ម៉ែត្រ។ 

ភាពខុសគ្នានេះ គឺមកពីចិនវាស់ត្រឹមថ្មនៅលើកំពូលភ្នំ ដោយមិនវាស់ដល់ព្រិល និង ទឹកកកដែលគ្របពីលើកំពូលភ្នំទេ។ 

កម្ពស់ថ្មីរបស់ភ្នំ អេវឺរ៉េស (Everest) នេះ ត្រូវបានឯកភាពគ្នា ក្រោយពីប្រទេសទាំង២បានបញ្ជូនក្រុមអ្នកអង្កេតពីភាគីទាំងសងខាងទៅកាន់ភ្នំនេះក្នុងឆ្នាំ២០១៩ និង ឆ្នាំ២០២០។ 

ភ្នំ​ អេវឺរ៉េស (Everest) ស្ថិតនៅលើព្រំដែនរវាងប្រទេសចិន​ និង​ នេប៉ាល់​ ហេីយក្រុមអ្នកឡើងភ្នំ​អាចឡើងភ្នំនេះទាំងសងខាង៕