កំពង់ស្ពឺ៖​ អភិបាលខេត្តកំពង់ស្ពឺ​ លោក ជាម ចន្ទ័សោភ័ណ បានណែនាំទៅដល់មន្ទីរជំនាញ អាជ្ញាធរក្រុង ស្រុកទាំងអស់ត្រូវតាមដានត្រួតពិនិត្យ​ និងចាត់វិធានការបន្ទាន់ចំពោះការសាងសង់សំណង់មិនរៀបរយ​ ដែលបង្កឱ្យមានផលប៉ះពាល់ដល់សោភ័ណភាព សណ្តាប់ធ្នាប់សាធារណៈ។​ ការណែនាំដូច្នេះធ្វើឡើងក្នុងសិក្ខាសាលាផ្សព្វផ្សាយគម្រោងកសាងប្លង់គោលប្រើប្រាស់ដីក្រុង ស្រុកទាំង៩​ និងផែនការរៀបចំដែនដីខេត្តកំពង់ស្ពឺ ថ្ងៃទី២០ ខែវិច្ឆិកា ឆ្នាំ២០២៥។

លោក ជាម ចន្ទ័សោភ័ណ បានលើកឡើងថា​ រដ្ឋបាលខេត្តមិនអនុញ្ញាតឱ្យមានការដ្ឋានសំណង់ដែលសាងសង់ ដោយគ្មានការអនុញ្ញាត​ ឬដោយគ្មានច្បាប់ពីមន្ទីរជំនាញនោះឡើយ។​ ការសាងសង់ដោយមិនមានការត្រួតពិនិត្យ គ្មានច្បាប់អនុញាត​ គឺជាអំពើខុសច្បាប់ ដែលអាចបង្កឱ្យប៉ះពាល់ដល់បទប្បញ្ញត្តិ គុណភាព សន្តិសុខ សុវត្ថិភាពសំណង់ សណ្ដាប់ធ្នាប់សាធារណៈ សោភណភាព ការរស់នៅប្រកបដោយចីរភាព និងអាចបង្កឱ្យមានវិវាទ។

ក្នុងន័យនេះ អភិបាលខេត្តកំពង់ស្ពឺ​ បានជំរុញឱ្យមានការតាមដានត្រួតពិនិត្យចាត់ វិធានការទប់ស្កាត់ការសាងសង់ ឬរុះរើសំណង់ដែលគ្មានលិខិតអនុញ្ញាត និងចាត់ចែងដាក់ទណ្ឌកម្មចំពោះជនដែលប្រព្រឹត្តអំពើល្មើសលើការសាងសង់នេះ។

ក្នុងនោះដែរ លោក ជាម ចន្ទ័សោភ័ណ ក៏បានរំឭកបន្ថែមទៅដល់មន្ត្រីជំនាញដែលអនុវត្តគម្រោងកសាងប្លង់គោលប្រើប្រាស់ដីក្រុង ស្រុក​ និងផែនការរៀបចំដែនដីខេត្ត និងអាជ្ញាធរមូលដ្ឋាន ត្រូវចូលរួមសហការឱ្យបានផុលផុសក្នុងការផ្តល់ទិន្នន័យដើម្បីឱ្យដំណើរការនៃគម្រោងនេះទទួលបានជោគជ័យនិងសម្រេចបានតាមផែនការ។

សូមបញ្ជាក់ថា សម្រាប់ខេត្តកំពង់ស្ពឺមានក្រុងស្រុកចំនួនបីដែលបាន​និងកំពុងដំណើរការលើការកសាងប្លង់គោលប្រើប្រាស់ដីក្រុង ស្រុកនេះ ក្នុងនោះ ក្រុងច្បារមន បាននិងកំពុងដំណើរការដល់ជំហានទី៤ ការរៀបចំសេចក្តី ព្រាងប្លង់គោលប្រើប្រាស់ដី និងពង្រាងផែនទីចក្ខុវិស័យ។

ក្រុងឧដុង្គម៉ែជ័យ​ បាននិងកំពុងដំណើរការដល់ជំហានទី២គឺ​ ការចុះប្រមូល ទិន្នន័យ និងពត៌មាន។ ស្រុកសាមគ្គីមុនីជ័យ​ បាននិងកំពុងដំណើរការដល់ជំនហានទី៣​ គឺការវិភាគ ទិន្នន័យ និងការរៀបចំសេចក្តីព្រាងចក្ខុវិស័យ និងយុទ្ធសាស្ត្រ៕


អត្ថបទ៖​ ប៊ុត សារុន