ភ្នំពេញ៖ រដ្ឋមន្ត្រីក្រសួងព័ត៌មាន លោក នេត្រ ភក្ត្រា បានលើកឡើងថា ប្រទេសថៃ មិនអាចយកលេសបង្ក្រាបបទល្មើស ឆបោកតាមប្រព័ន្ធបច្ចេកវិទ​្យា​ (Online Scams)​ដើម្បីបិទបាំងទង្វើឈ្លានពានកម្ពុជា ហើយថៃ មិនអាចយកច្បាប់របស់ខ្លួនមកអនុវត្តលើទឹកដីកម្ពុជាបានឡេីយ។

លោក នេត្រ ភក្ត្រា លើកឡើងដូចនេះក្នុងសន្និសីទសារព័ត៌មាន​ នៅរសៀលថ្ងៃទី១៨ ខែកញ្ញា ឆ្នាំ២០២៦​ មុនកម្ពុជាធ្វើម្ចាស់ផ្ទះក្នុងការរៀបចំ «សន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា» ចាប់ពីថ្ងៃទី២៣ ដល់ថ្ងៃទី២៤ ខែកញ្ញា ឆ្នាំ២០២៦ នៅរាជធានីភ្នំពេញ ក្រោមប្រធានបទ៖ «រួមគ្នាឆ្ពោះទៅកាត់ផ្តាច់ច្រវ៉ាក់ និងបញ្ចប់ការឆបោកតាមប្រព័ន្ធបច្ចេកវិទ្យាស្គេមអនឡាញ»។​ លោកបានលើកឡើងយ៉ាងដូច្នេះថា៖ «ប្រទេសជិតខាងរបស់យើង (ថៃ) គឺបានធ្វើការផ្សព្វផ្សាយ ខ្ញុំបានឃើញឱ្យតែមានបញ្ហាទាក់ទងជាមួយនឹង Scams គឺតែងតែផ្សព្វផ្សាយ ហើយរួមទាំងការដែលឈ្លានពានទឹកដីកម្ពុជា គ្រប់គ្រងទឹកដីកម្ពុជា ដោយខុសច្បាប់ ហើយគេបានរៀបចំនូវដំណើរទស្សនកិច្ចរបស់អនុព័ន្ធយោធា របស់អ្នកសារព័ត៌មានជាតិ និងអន្តរជាតិ ដែលនៅប្រទេសរបស់គេនោះមកទីតាំងនោះ ហើយធ្វើបង្ហាញពីអ្វីដែលជារូបភាពនៅកន្លែងនោះ។ មិនដឹងថាភាគីថៃរៀបចំអ្វីនោះទេ នៅលើទឹកដីកម្ពុជា ដែលត្រូវយោធាថៃ ឈ្លានពានគ្រប់គ្រងដោយខុសច្បាប់ ចំពោះការចូលទឹកដីកម្ពុជាដោយខុសច្បាប់ ព្រោះតំបន់អូស្មាច គឺជាទឹកដីរបស់កម្ពុជា»។ 



លោក​ នេត្រ ភក្ត្រា បានបន្តថា ថៃបានប្រើប្រាស់លេសរឿងការបង្ក្រាប Scams ដើម្បីបិទបាំងនូវមូលហេតុពិតប្រាកដ នៃការឈ្លានពានទឹកដីកម្ពុជា បានជារាល់ពេលដែលគេនោះបាននាំអ្នកសារព័ត៌មាន នាំអនុព័ន្ធយោធា ទៅទស្សនកិច្ចនៅកន្លែងនោះ គឺរាជរដ្ឋាភិបាលកម្ពុជា តាមរយៈក្រសួងការបរទេស តាមរយៈក្រសួងព័ត៌មាន ដែលទាក់ទងនឹងការងារសារព័ត៌មាននេះ កម្ពុជាបានបង្ហាញអំពីការតវ៉ាយ៉ាងខ្លាំងក្លាចំពោះការរំលោភំពានមកលើអធិបតេយ្យភាពជាតិកម្ពុជា។



លោករដ្ឋមន្ត្រីព័ត៌មាន បានសង្កត់ធ្ងន់ថា ថៃមិនអាចយកច្បាប់របស់ថៃ មកអនុវត្តនៅលើទឹកដីកម្ពុជាបានទេ ហើយបើសិនជាជាមានបញ្ហាពាក់ព័ន្ធជាមួយនឹងបទល្មើស Online Scams វាចាំបាច់ដែលត្រូវការសហការគ្នា ប៉ុន្តែមិនមែនយកនូវកម្លាំងមកឈ្លាពានគ្រប់គ្រងទឹកដីកម្ពុជាដោយខុសច្បាប់នោះទេ ជាញឹកញាប់ភាគីថៃ តែងតែផ្សព្វផ្សាយនូវព័ត៌មានមិនពិត ដើម្បីសម្អុយកេរ្តិ៍ឈ្មោះកម្ពុជានៅលើឆាកអន្តរជាតិ ពាក់ព័ន្ធបទល្មើស Online Scams។



ពាក់ព័ន្ធនឹងបញ្ហានេះ​ កម្ពុជាត្រូវការភាពស្មោះត្រង់ ត្រូវការសហការដោយស្មោះស​ ហើយអ្វីដែលកម្ពុជាបានបង្ហាញនៅទីនេះ គឺកម្ពុជាបើកជំហរនៅក្នុងការសហការបង្ក្រាបទល្មើសនានា ជាពិសេសបទល្មើសឆបោកតាមប្រព័ន្ធបច្ចេកវិទ្យា ហើយកម្ពុជាមិនបានទាញផលចំណេញពីអ្វីដូចដែលភាគីថៃ បានធ្វើមកលើប្រទេសកម្ពុជា ក្នុងការឈ្លានពានកម្ពុជា ហើយភាគីថៃបែរជាយកបញ្ហា Online Scams នេះមកបិទបាំងទង្វើរបស់ខ្លួន ដើម្បីគ្រប់គ្រងទឹកដីកម្ពុជាដោយខុសច្បាប់ទៅវិញ។



លោក​ នេត្រ ភក្ត្រា បានអះអាងថា ចំពោះអ្វីដែលកម្ពុជា ផ្សព្វផ្សាយ គឺកម្ពុជាចង់បានការពិតពីកម្ពុជា ហើយការពិតពីកម្ពុជា ជាប្រទេសរងគ្រោះ ព្រមទាំងបានបង្ហាញអំពីការខិតខំប្រឹងប្រែងរបស់រាជរដ្ឋាភិបាល ក្នុងការបង្ក្រាបបទល្មើសឆបោកតាមប្រព័ន្ធបច្ចេកវិទ្យានេះ និងបង្ហាញពីការពិតថាឆន្ទៈរបស់រាជរដ្ឋាភិបាលកម្ពុជា គឺលុបបំបាត់នូវទល្មើសឆបោកតាមប្រព័ន្ធបច្ចេកវិទ្យា ដើម្បីផ្ដល់នូវសុខសុវត្ថិភាពដល់ប្រជាជន ភ្ញៀវទេសចរ និងអ្នកវិនិយោគទុននានាផងដែរ។



សូមបញ្ជាក់ថា គិតចាប់ពីខែកក្កដា ឆ្នាំ២០២៥ ដល់ខែសីហា ឆ្នាំ២០២៦ អាជ្ញាធរមានសមត្ថកិច្ចកម្ពុជា បានបើកប្រតិបត្តិការស៊ើបអង្កេតលើទីតាំងសង្ស័យបានចំនួនជាង ៨៣០កន្លែង និងបានចុះបង្ក្រាបជាក់ស្តែងចំនួន ៦៦៣ទីតាំង ក្នុងនោះបានគ្រប់គ្រង និងកម្ទេចទីតាំងអនឡាញស្កែមទ្រង់ទ្រាយធំបានរហូតដល់ ៨៦កន្លែង និងបានបណ្តេញចេញមុខសញ្ញាជនសង្ស័យជាជនបរទេសជាង ២ម៉ឺនាក់៕