កណ្តាល៖ លោក គួច ចំរើន អភិបាលខេត្តកណ្តាល កាលពីរសៀលថ្ងៃទី១៥ ខែមិថុនា ឆ្នាំ២០២៦ បានដឹកនាំក្រុមការងារចម្រុះ រួមមានតំណាងអយ្យការ មន្ត្រី ក.ប.ប. អាជ្ញាធរមូលដ្ឋាន និងកម្លាំងសមត្ថកិច្ច ចុះត្រួតពិនិត្យឃ្លាំងស្តុកសាច់បង្កក និងចំណីអាហារចំនួន២ទីតាំង នៅឃុំបែកចាន ស្រុកអង្គស្នួល ដែលប្រើប្រាស់យីហោ TSP។

ក្នុងប្រតិបត្តិការនេះ សមត្ថកិច្ចបានរកឃើញភាពមិនប្រក្រតីជាច្រើន រួមមានការស្តុកទុកផលិតផលគ្មានកាលបរិច្ឆេទផលិត ឬផុតកំណត់ប្រើប្រាស់ ទូបង្កកមិនដំណើរការតាមស្តង់ដារ និងការរកឃើញឧបករណ៍វេចខ្ចប់ឡើងវិញ ដែលសង្ស័យពាក់ព័ន្ធនឹងការកែប្រែកាលបរិច្ឆេទប្រើប្រាស់ ដើម្បីបន្លំអ្នកប្រើប្រាស់។ ផលិតផលសង្ស័យមួយចំនួនត្រូវបានយកសំណាកទៅវិភាគបន្ថែម ខណៈទំនិញដែលបង្កហានិភ័យដល់សុខភាពសាធារណៈ នឹងត្រូវកម្ទេចចោលតាមនីតិវិធី។

លោក គួច ចំរើន បានបញ្ជាក់ថា អាជ្ញាធរ នឹងចាត់វិធានការច្បាប់យ៉ាងម៉ឺងម៉ាត់ចំពោះអ្នកពាក់ព័ន្ធ។ ជាមួយគ្នានេះ ក្រុមការងារ បានដកហូតប្រហិត ហតដក និងចំណីអាហារចម្រុះសរុបទម្ងន់ប្រមាណ ៨,៨៩០គីឡូក្រាម។
លោកអភិបាលខេត្ត ក៏បានអំពាវនាវដល់អាជីវករ និងអ្នកចែកចាយដែលទទួលផលិតផលពីក្រុមហ៊ុន TSP សូមផ្អាកការលក់ជាបន្ទាន់ និងសហការជាមួយអាជ្ញាធរ ដើម្បីការពារសុខភាពប្រជាពលរដ្ឋពីផលិតផលគ្មានសុវត្ថិភាព៕

អត្ថបទ៖ ឈុន សុភ័ក្រ