ភ្នំពេញ៖ ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក ដែលជាអ្នកអភិវឌ្ឍ និងប្រតិបត្តិករនៃតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ («RGPPSEZ») និងតំបន់សេដ្ឋកិច្ចពិសេស រ៉ូយ៉ាល់ គ្រុប កណ្តាល («RGKSEZ») នៅតែបន្តបង្ហាញពីសន្ទុះកំណើនដ៏ខ្លាំងក្លា ដោយបានរួមចំណែកដល់ការអភិវឌ្ឍវិស័យឧស្សាហកម្ម ការបង្កើតការងារ និងបង្កើនការនាំចេញរបស់ប្រទេសកម្ពុជា។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុន នៅថ្ងៃទី ២២ខែឧសភា ឆ្នាំ២០២៦។

គិតត្រឹមខែមេសា ឆ្នាំ២០២៦ ចំនួនបុគ្គលិកកម្មករសរុបដែលកំពុងបម្រើការងារនៅក្នុងតំបន់ទាំងពីរ RGPPSEZ និង RGKSEZ បានកើនឡើងដល់ ៥៨.៥៣២នាក់ ដែលតំណាងឱ្យការកើនឡើងប្រមាណ ១៥,៣% បើធៀបនឹងចំនួនបុគ្គលិកកម្មករ ៥០.៧៤៦នាក់ ដែលបានកត់ត្រាក្នុងខែមេសា ឆ្នាំ២០២៥ កន្លងទៅ។ កំណើនដ៏មានស្ថិរភាពនេះឆ្លុះបញ្ចាំងពី ទំនុកចិត្តឥតថមថយរបស់អ្នកវិនិយោគទាំងឡាយមកលើប្រទេសកម្ពុជា និងការពង្រីកប្រតិបត្តិការនៃសហគ្រាសនានា នៅក្នុងតំបន់សេដ្ឋកិច្ចពិសេសទាំងពីរនេះ។

សកម្មភាពនាំចេញពីក្នុងតំបន់សេដ្ឋកិច្ចពិសេសទាំងពីរ ក៏បានបង្ហាញពីកំណើនដ៏វិជ្ជមានផងដែរ ក្នុងរយៈពេល៤ខែ ដំបូងនៃឆ្នាំ២០២៦នេះ។ ការនាំចេញសរុបចាប់ពីខែមករា ដល់ខែមេសា ឆ្នាំ២០២៦ មានទំហំទឹកប្រាក់រហូតដល់ទៅ ៨០៩,០២លានដុល្លារអាមេរិក កើនឡើងពីចំនួន ៥៧៩,៨៨ លានដុល្លារអាមេរិកដែលបានកត់ត្រាក្នុងរយៈពេលដូចគ្នាកាលពីឆ្នាំ២០២៥ ដែលតួលេខនេះ បង្ហាញពីកំណើនប្រមាណ ៣៩,៥%។ លទ្ធផលវិជ្ជមាននេះបង្ហាញពីភាពធន់ និងសមត្ថភាពប្រកួតប្រជែង របស់វិនិយោគិនអ្នកផលិត ដែលកំពុងដំណើរការនៅក្នុងតំបន់ទាំងពីរ ជាពិសេសចំពេលដែលមានការប្រឈមនឹងឧបសគ្គ នៃបញ្ហាសេដ្ឋកិច្ចក្នុងតំបន់ និងសកលលោកនាពេលបច្ចុប្បន្ន។

ថ្លែងចំពោះសមិទ្ធផលនេះ អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃក្រុមហ៊ុន រ៉ូយ៉ាល់ គ្រុប (Royal Group of Companies) និងក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក បានមានប្រសាសន៍ថា៖ «កំណើនជាបន្តបន្ទាប់នៃតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ និង រ៉ូយ៉ាល់ គ្រុប កណ្តាល ឆ្លុះបញ្ចាំងពីទំនុកចិត្តយ៉ាងមុតមាំរបស់វិនិយោគិនចំពោះអនាគតសេដ្ឋកិច្ចរបស់កម្ពុជា និងការប្តេជ្ញាចិត្តរបស់ភាគីពាក់ព័ន្ធទាំងអស់ ក្នុងការធ្វើការរួមគ្នា ដើម្បីពង្រឹងប្រព័ន្ធអេកូឡូស៊ីឧស្សាហកម្មរបស់ប្រទេស។ យើងខ្ញុំនៅតែបន្តប្តេជ្ញាចិត្តក្នុងការគាំទ្រដល់ការវិនិយោគប្រកបដោយនិរន្តរភាព ការបង្កើតការងារ និងការអភិវឌ្ឍសេដ្ឋកិច្ចរយៈពេលវែងសម្រាប់ប្រទេសកម្ពុជា។»

អ្នកឧកញ៉ាប្រធាន បន្តថា៖ «យើងខ្ញុំក៏សូមសម្តែងនូវការដឹងគុណដ៏ជ្រាលជ្រៅបំផុតចំពោះ ការគាំទ្រជារៀងរហូតមកពីសំណាក់រាជរដ្ឋាភិបាលកម្ពុជា ក្រោមការណែនាំ និងដឹកនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ គោលនយោបាយគាំទ្រអាជីវកម្មរបស់រាជរដ្ឋាភិបាល គំនិតផ្តួចផ្តើមអភិវឌ្ឍន៍ហេដ្ឋារចនាសម្ព័ន្ធ និងការប្តេជ្ញាចិត្តក្នុងការកែលម្អបរិយាកាសវិនិយោគ បន្តដើរតួនាទីយ៉ាងសំខាន់ក្នុងការទាក់ទាញការវិនិយោគផ្ទាល់ពីបរទេស និងជំរុញ កំណើនឧស្សាហកម្ម។»

ក្នុងនាមជាអ្នកអភិវឌ្ឍតំបន់សេដ្ឋកិច្ចពិសេសឈានមុខគេមួយនៅកម្ពុជា ក្រុមហ៊ុននៅតែបន្តប្តេជ្ញាចិត្តក្នុងការផ្តល់ជូននូវហេដ្ឋារចនាសម្ព័ន្ធ និងសេវាកម្មដែលមានគុណភាពខ្ពស់ដល់វិនិយោគិនទាំងឡាយ ព្រមទាំងរួមចំណែកដល់គោលដៅអភិវឌ្ឍន៍សេដ្ឋកិច្ច និងសង្គមកាន់តែទូលំទូលាយរបស់ព្រះរាជាណាចក្រកម្ពុជា។

សូមជម្រាបថា រ៉ូយ៉ាល់ គ្រុប គឺជាក្រុមហ៊ុនគ្រប់គ្រងការវិនិយោគជាយុទ្ធសាស្ត្ររបស់កម្ពុជា ដែលត្រូវបានទទួលស្គាល់ថាជាក្រុមហ៊ុន អាជីវកម្មដែលមានថាមពល និងចម្រុះបំផុតរបស់ប្រទេស។ ជាមួយនឹងចំណាប់អារម្មណ៍នៅក្នុងឧស្សាហកម្មជាច្រើនរួមមាន ធនាគារ និងហិរញ្ញវត្ថុ ធានារ៉ាប់រង ការវិនិយោគ ទូរគមនាគមន៍ ថាមពល ការដឹកជញ្ជូន ប្រព័ន្ធផ្សព្វផ្សាយ និងការកម្សាន្ត សណ្ឋាគារ និងរមណីយដ្ឋាន ការអប់រំ ការអភិវឌ្ឍអចលនទ្រព្យ ការជួញដូរនាំចេញនាំចូល និងតំបន់សេដ្ឋកិច្ចពិសេស៕