ភ្នំពេញ៖ លោកស្រីកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី នារសៀលថ្ងៃទី១៨ ខែឧសភា ឆ្នាំ២០២៦ នៅទីស្តីការក្រសួងកិច្ចការនារី បានអនុញ្ញាតឱ្យលោកស្រី Sally Chew ស្ថាបនិក និងជានាយកប្រតិបត្តិនៃស្ថាប័ន FoL Global និងលោក Issac Munandar ស្ថាបនិក និងនាយកប្រតិបត្តិក្រុមហ៊ុន MAXY ACADEMY ព្រមទាំងសហការី ចូលជួបសម្តែងការគួរសម និងពិភាក្សាការងារ។ 

ក្រសួងកិច្ចការនារី បានសម្តែងការស្វាគមន៍ចំពោះសំណើក្នុងការបង្កើតគម្រោង "Her Seed" ដែលជាគំនិតផ្តួចផ្តើមដ៏មានសារៈសំខាន់ក្នុងការបង្កើនការយល់ដឹង និងពង្រឹងចំណេះដឹងផ្នែកបច្ចេកវិទ្យា និង AI ដល់ស្រ្តីជាសហគ្រិន ស្រ្តីរស់នៅតាមជនបទ។ 

ក្រៅពីការយកចិត្តទុកដាក់លើផ្នែកបច្ចេកវិទ្យា ភាគីទាំងពីរ ក៏បានពិភាក្សាលើការបន្តពង្រឹងកម្មវិធីកសាងសមត្ថភាព និងការលើកកម្ពស់ការយល់ដឹងពីសុខភាពស្ត្រី ជាពិសេសគឺការយល់ដឹងពីជំងឺមហារីកសុដន់ និងមហារីកមាត់ស្បូន តាមរយៈកិច្ចសហការជិតស្និទ្ធជាមួយដៃគូនានា។

លោកស្រីកិត្តិបណ្ឌិតរដ្ឋមន្ត្រី បានបញ្ជាក់ជាថ្មីនូវការគាំទ្រយ៉ាងពេញទំហឹងរបស់ក្រសួង ក្នុងការស្វែងរក និងបង្កើតកិច្ចសហប្រតិបត្តិការប្រកបដោយអត្ថន័យជាមួយ FoL Global និង MAXY ACADEMY ដើម្បីរួមគ្នាត្រៀមលក្ខណៈ និងសមត្ថភាពជូនស្ត្រីកម្ពុជាឱ្យស្របទៅនឹងសេដ្ឋកិច្ចដែលដើរដោយបច្ចេកវិទ្យា AI នាពេលអនាគត៕

អត្ថបទ៖ សន ពិសិដ្ឋ រូបភាព៖ លឹម មុនី