ភ្នំពេញ៖ នៅថ្ងៃចុងក្រោយ នៃព្រឹត្តិការណ៍​ «នគរសង្ក្រាន្ត» រាជធានីភ្នំពេញ ទទួលបានមានភ្ញៀវជាតិ និងអន្តរជាតិ ជាង​ ១លាន​ ៤សែននាក់។ ប៉ុន្តែបើគិតទាំង៦ថ្ងៃ​ មានពលរដ្ឋ​ និងអ្នកទេសចរ​ប្រមាណ​ ៩លាននាក់​ បានចូលរួមអបអរសាទរ និងលេងកម្សាន្ត ប្រកបដោយភាពសប្បាយរីករាយ នៅរាជធានីភ្នំពេញ។

លោកស្រី ដោ សម្ផស្ស នាយិការរង​ និងជាអ្នកនាំពាក្យសាលារាជធានីភ្នំពេញ នាព្រឹកថ្ងៃទី២០ ខែមេសា ឆ្នាំ២០២៦​ បានឱ្យដឹងថា ព្រឹត្តិការណ៍ «នគរសង្ក្រាន្ត» នៅរាជធានីភ្នំពេញ នាថ្ងៃទី៦ ត្រូវថ្ងៃទី១៩ ខែមេសា មានភ្ញៀវជាតិ និងអន្តរជាតិ រួមនឹងប្រជាពលរដ្ឋ មកពីគ្រប់ទិសទីយ៉ាងច្រើនកុះករ បានដើរលេងកម្សាន្ត​ និងចូលរួមអបអរសាទរ សរុបចំនួន​ ១,៤៤០,៧១២នាក់ ក្នុងនោះប្រជាពលរដ្ឋ មកដើរលេងកម្សាន្តចំនួ​ ១,៤១៧,៤៨០នាក់ និងភ្ញៀវទេសចរបរទេស មានចំនួន ២៣,២៣២នាក់។

លោកស្រី ដោ សម្ផស្ស បានឱ្យដឹងទៀតថា ទោះបីពិធីបុណ្យចូលឆ្នាំថ្មី បានបញ្ចប់ទៅក៏ដោយ ប៉ុន្តែសម្រាប់ ព្រឹត្តិការណ៍ «នគរសង្ក្រាន្ត» នៅរាជធានីភ្នំពេញ នៅតែបន្តទទួលបានភ្ញៀវទេសចរជាតិ និងអន្តរជាតិ ចូលរួមលេងកម្សាន្តយ៉ាងច្រើនកុះករ ប្រមាណជាង​ ១លាននាក់ រៀងរាល់ថ្ងៃ ពោលគឺ​ នៅថ្ងៃទី១៧ មានចំនួន​១,៣៨៤,៥១១នាក់ សម្រាប់ថ្ងៃទី១៨ មានចំនួន ១,៥៥៧,២៥០នាក់ និងថ្ងៃទី១៩ មានចំនួន ១,៤១៧,៤៨០នាក់ បើទោះបីជាមានភ្លៀងធ្លាក់ក៏ដោយ។

ដោយឡែករយៈពេល៣ថ្ងៃនៃពិធីបុណ្យចូលឆ្នាំថ្មី ប្រពៃណីជាតិខ្មែរ និងព្រឹត្តិការណ៍ «នគរសង្ក្រាន្ត» កន្លងមកនេះ នៅទូទាំងរាជធានីភ្នំពេញ មានភ្ញៀវជាតិ និងអន្តរជាតិ មកដើរលេងកម្សាន្ត រហូតដល់ជាង​ ៤លាននាក់ ពោរពេញដោយភាពសប្បាយរីករាយ និងសាមគ្គីភាព ក្នុងនោះ សម្រាប់ថ្ងៃទី១ នៃពិធីបុណ្យចូលឆ្នាំថ្មី មានប្រជាពលរដ្ឋ មកពីគ្រប់ទិសទី បានមកដើរលេងកម្សាន្ត មានចំនួន​ ៩៨៣,០៨០នាក់ (ភ្ញៀវទេសចរបរទេស ចំនួន៧,០៦៨នាក់)។ នៅថ្ងៃទី២ នៃពិធីបុណ្យចូលឆ្នាំថ្មី មានប្រជាពលរដ្ឋ មកពីគ្រប់ទិសទី បានមកដើរលេងកម្សាន្ត ១,៥៦៥,៣៦៧នាក់ (ភ្ញៀវទេសចរបរទេស ចំនួន១៧,៩៤០នាក់)​ និងសម្រាប់ថ្ងៃទី៣​ មានចំនួន ១,៨២៧,៩៩០នាក់។

សូមបញ្ជាក់ដែរថា​ ក្នុងព្រឹត្តិការណ៍ «នគរសង្ក្រាន្ត» ៦ថ្ងៃ មន្ទីរសុខាភិបាលរាជធានីភ្នំពេញ បានពិនិត្យ និងព្យាបាល ជូនមហាជនជាង២ពាន់នាក់ លើករណីស្រាលៗផ្សេងៗគ្នា។រយៈពេល៦ថ្ងៃ មន្ទីរសុខាភិបាល នៃរដ្ឋបាលរាជធានីភ្នំពេញ បានរៀបចំកម្លាំងមន្ត្រីសុខាភិបាល ប្រចាំការការពារសុខភាព ជូនមហាជន ចូលរួមលេងកម្សាន្តក្នុងព្រឹត្តិការណ៍ «នគរសង្ក្រាន្ត» ក្នុងនោះបានពិនិត្យ និងព្យាបាលជំងឺស្រាលៗចំពោះករណីផ្សេងៗគ្នា បានចំនួន​ ២៣៧៩នាក់។

លោកស្រី ដោ សម្ផស្ស នាយិការរង និងជាអ្នកនាំពាក្យសាលារាជធានីភ្នំពេញ បានឱ្យដឹងដែរថា ក្រៅពីការយកចិត្តទុកដាក់អំពីសន្តិសុខ សណ្តាប់ធ្នាប់ ព្រមទាំងសុវត្ថិភាព របៀបរៀបរយសាធារណៈ ជូនប្រជាពលរដ្ឋមកលេងកម្សាន្ត ក្នុងព្រឹត្តិការណ៍នគរសង្ក្រាន្ត ក៏ដូចជាអបអរសាទរឆ្នាំថ្មី ប្រពៃណីជាតិហើយនោះ លោក ឃួង ស្រេង អភិបាលរាជធានីភ្នំពេញ ក៏បានយកចិត្តទុកដាក់ចំពោះសុខមាលភាព ប្រជាពលរដ្ឋផងដែរ។​ ជាក់ស្តែង ក្នុងព្រឹត្តិការណ៍ «នគរសង្ក្រាន្ត» ក្រោមការរៀបចំរបស់សហភាពសហព័ន្ធយុវជន កម្ពុជា (ស.ស.យ.ក.) និងរដ្ឋបាលរាជធានីភ្នំពេញ រួមនឹងការអបអរសាទរបុណ្យចូលឆ្នាំថ្មី ដែលបានប្រព្រឹត្តិទៅចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ មានក្រុមប្រចាំការតង់សង្គ្រោះបឋម ចំនួន ១០កន្លែង (កម្លាំង ៥០នាក់/១ថ្ងៃ), ក្រុមរថយន្តយន្តគិលានសង្គ្រោះ ចំនួន ១២ក្រុម/១ថ្ងៃ (កម្លាំង ៣៦នាក់/១ថ្ងៃ), ក្រុមចល័តក្នុងហ្វូងមហាជន ចំនួន ២៦ក្រុម (កម្លាំង ៥២នាក់/១ថ្ងៃ) និងប៊ូតសង្គ្រោះបឋមចំនួន ចំនួន១កន្លែង/១ថ្ងៃ (អាកាសយានដ្ឋានពោធិ៍ចិនតុង) មានកម្លាំង ៣នាក់/១ថ្ងៃ និងគណៈកម្មការសម្របសម្រួល ចំនួន ៦៥នាក់/១ថ្ងៃ។

ចំពោះកម្លាំងក្រុមគ្រូពេទ្យប្រចាំការសរុបក្នុងមួយថ្ងៃចំនួន ១៩៤នាក់ ក្នុងនោះសរុបរួមកម្លាំងប្រចាំការ ក្នុងអំឡុងព្រឹត្តិការណ៍នគរសង្ក្រាន្ត មានចំនួន ១,៣២៨នាក់។​ ជាមួយនឹងការប្រចាំការសង្គ្រោះនេះ មន្ទីរសុខាភិបាល បានផ្តល់សេវាជូនមហាជន ដែលបានមកទទួលសេវាពិនិត្យ ព្យាបាល និងសង្គ្រោះបឋម នៅតាមគោលដៅតង់សង្គ្រោះបន្ទាន់បឋម ក្នុងអំឡុងព្រឹត្តិការណ៍ នគរសង្ក្រាន្ត មានចំនួន​ ២,៣៧៩នាក់ ដែលមានករណីផ្សេងៗ​ ដូចជា​ ករណីពិនិត្យ និងផ្តល់ឱសថសម្រាប់ព្យាបាលជំងឺ មានចំនួន ១,៨២៩នាក់,​ ករណីរបួសស្រាល បានធ្វើការលាងរបួស រុំបង់ និងផ្តល់ឱសថមានចំនួន ១៦២នាក់,​ ករណីខ្យល់ចាប់មានចំនួន ៨៨នាក់,​ ករណីផ្សេងៗដូចជារមួលក្រពើ គ្រិចផ្លោះ រមាស់ ឈឺធ្មេញមានចំនួន ២៣៦នាក់​ និងករណីសង្គ្រោះបឋមមានចំនួន ៥៣នាក់,​ ករណីអ្នកជំងឺមានអាការៈមិនសូវល្អ ត្រូវបញ្ជូនទៅព្យាបាលនៅមន្ទីរពេទ្យ ១១នាក់។

ទន្ទឹមនឹងនេះ ទាក់ទិននឹងសុខសុវត្ថិភាព ក្នុងអំឡុងពេលអបអរសាទរឆ្នាំថ្មីនេះ ក៏មានភាពល្អប្រសើរ ប្រជាពលរដ្ឋដើរលេងកម្សាន្ត ដោយភាពសប្បាយរីករាយ ពោលគឺ​ ពុំមានហេតុការណាមួយ បង្កជាគ្រោះថ្នាក់ធំដុំឡើយ៕