ស្វាយរៀង៖ បន្ទាប់ពីភាគីក្រុមហ៊ុនបានខកខានមិនគោរពតាមកិច្ចសន្យាបើកប្រាក់ឈ្នួលជាលើកទី២ជួនកម្មករសំណង់នោះ លោក​ ប៉េង ពោធិ៍សា អភិបាលខេត្តស្វាយរៀងបញ្ជាផ្ទាល់ឱ្យក្រុមការងារចម្រុះខេត្តដឹកនាំដោយលោក​ ម៉ែន អេង អភិបាលរងខេត្ត​ និងលោក អ៊ូ សុខឿន ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត លោក​ ដាំ ឃុនពិសី ប្រធានស្តីទីមន្ទីរព័ត៌មានខេត្ត និងអាជ្ញាធរមូលដ្ឋានពាក់ព័ន្ធ បានចុះអន្តរាគមន៍ដោះស្រាយវិវាទការងាររវាងភាគីកម្មករ អ្នកម៉ៅការ និងភាគីម្ចាស់ការដ្ឋានអគាររបស់ក្រុមហ៊ុន ឃ្យូ.អេស ដេខ័ររេសិន អេនជឺនារីង ឯ.ក សាងសង់អគារក្រុមហ៊ុន រេឌាន ភើល អិនវេសមេន លីមីធីត (ឡឹហ្សឹង) ដើម្បីការពារសិទ្ធិ និងផលប្រយោជន៍កម្មករ នាព្រឹកថ្ងៃទី៦៧​ ខែមីនា ឆ្នាំ២០២៦ ស្ថិតនៅភូមថ្នល់កែង សង្កាត់បាទី ក្រុងបាវិត ខេត្តស្វាយរៀង។

ក្នុងការចុះផ្ទាល់ដល់ទីតាំងការដ្ឋានសំណង់អគារក្រុមហ៊ុន ហ៊ុន​ ក្រុមការងារបានជួបសម្របសម្រួលជាមួយភាគីពាក់ព័ន្ធ។ បញ្ហានេះបានកើតឡើងដោយសារម្ចាស់សំណង់បានចាកចេញទៅប្រទេសដើមវិញ ហើយក្រុមហ៊ុនទទួលការសាងសង់ ឃ្យូ.អេស ដេខ័ររេសិន អេនជឺនារីង ឯ.ក ខ្វះលទ្ធភាពទូទាត់ប្រាក់ឈ្នួល​ ទោះបីជាដល់កាលកំណត់សន្យាជាលើកទី២ ក៏ដោយ។
ក្នុងជំនួបនោះ លោកប្រធានមន្ទីរការងារបានលើកឡើងយ៉ាងច្បាស់ពីទិដ្ឋភាពច្បាប់ថា អាជ្ញាធរសម្រេចទុកកំហិតចុងក្រោយរយៈពេល ១៥ថ្ងៃ ដើម្បីឱ្យភាគីពាក់ព័ន្ធស្វែងរកថវិកាមកបើកជូនកម្មករ។ ប្រសិនបើផុតកំណត់នេះ ក្រុមហ៊ុននៅតែមិនមានលទ្ធភាព អាជ្ញាធរនឹងបន្តអនុវត្តនីតិវិធីច្បាប់តឹងរ៉ឹងបំផុត ដើម្បីទាមទារផលប្រយោជន៍ជូនកម្មករ។

លោកអភិបាលរងខេត្ត បានឱ្យកម្មកររក្សាភាពស្ងប់ស្ងាត់ និងជឿជាក់លើការងាររបស់មន្ត្រីជំនាញ ដែលកំពុងធ្វើការយ៉ាងសកម្មដើម្បីធានាថា ញើសឈាមរបស់កម្មករ ត្រូវតែទទួលបានការតបស្នងដោយយុត្តិធម៌។​ សកម្មភាពនេះមិនត្រឹមតែជាការដោះស្រាយវិវាទការងារប៉ុណ្ណោះទេ ប៉ុន្តែវាគឺជាការឆ្លុះបញ្ចាំងពីការអនុវត្តគោលនយោបាយរបស់រាជរដ្ឋាភិបាល ក្នុងការគិតគូរពីសុខទុក្ខ និងអត្ថប្រយោជន៍របស់កម្មករនិយោជិតជាអាទិភាពបំផុត។
លោកអភិបាលរងខេត្ត បានអំពាវនាវឱ្យកម្មករ-កម្មការិនី រក្សាភាពស្ងប់ស្ងាត់ និងសហការជាមួយអាជ្ញាធរ ខណៈដែលក្រុមការងារកំពុងរុញច្រាននីតិវិធីដោះស្រាយឱ្យបានឆាប់រហ័សបំផុតតាមដែលអាចធ្វើទៅបាន៕

អត្ថបទ៖ មិន ភក្តី