សហរដ្ឋអាម៉េរិក៖ ព្រះសង្ឃជាច្រើនព្រះអង្គ ដែលកំពុងបំពេញយុទ្ធនាការ «និមន្តដង្ហែដើម្បីសន្តិភាព» (Walk For Peace) ចម្ងាយ ២,៣០០ ម៉ាយ (ជាង ៣,៧០០គីឡូម៉ែត្រ) បាននិមន្តចេញពីទីក្រុង ឆេស្ទ័រហ្វៀល (Chesterfield) មកដល់ទីក្រុងរីច្មុន (Richmond) ក្នុងរដ្ឋវីជីនៀ (Virginia) កាលពីថ្ងៃចន្ទ។ យុទ្ធនាការនេះ បានចាប់ផ្ដើមតាំងពីខែតុលា នៅរដ្ឋតិចសាស់ (Texas) ហើយគ្រោងនឹងបញ្ចប់នៅរដ្ឋធានីវ៉ាស៊ីនតោន ក្នុងខែកុម្ភៈនេះ ដោយមានគោលបំណងលើកកម្ពស់សន្តិភាព សេចក្ដីមេត្តាករុណា និងអហិង្សាធម៌ ។

នៅថ្ងៃអង្គារ ទី៣ ខែកុម្ភៈនេះ គឺជាថ្ងៃទី ១០១ នៃយុទ្ធនាការរបស់ព្រះអង្គ។ ព្រះសង្ឃ បាននិមន្តចាកចេញ ពីព្រះវិហារក្នុងក្រុងឆេស្ទ័រហ្វៀល (Chesterfield) រួចបន្តនិមន្តតាមផ្លូវ Route 1 ឆ្ពោះទៅកាន់ទីក្រុង Richmond កាលពីរសៀលថ្ងៃចន្ទ និងបន្តនិមន្តចាកចេញពីទីក្រុង Richmond ឆ្ពោះទៅកាន់ទីក្រុង Ashland ក្នុងរដ្ឋ Virginia ដដែលនេះ នាថ្ងៃអង្គារនេះ ។

អ្នកចាត់ចែងរៀបចំយុទ្ធនាការ បានបង្ហោះសារនៅលើបណ្ដាញសង្គមថា «នេះគឺជាឱកាសដ៏ល្អដើម្បី និមន្ត និងដើរជាមួយគ្នាដើម្បីសន្តិភាព ជួបជុំគ្នាដោយសាមគ្គីភាព និងចែករំលែកស្មារតីនៃការតាំងចិត្ត សេចក្ដីស្រឡាញ់ និងសេចក្ដីមេត្តា។ ទោះអ្នកដើរបានពីរបីជំហាន ឬដើររហូតដល់ចប់ វត្តមានរបស់អ្នកនឹងបន្ថែមពន្លឺដល់ការជួបជុំដ៏សន្តិភាពនេះ» ។

អភិបាលរដ្ឋ Virginia លោកស្រី អាប៊ីហ្គេល ស្ប៉ានប៊ឺហ្គឺ (Abigail Spanberger) និងអភិបាលក្រុង Richmond លោក ដានី អាវូឡា (Danny Avula) បានទទួលស្វាគមន៍ ព្រះសង្ឃគ្រប់ព្រះអង្គ យ៉ាងកក់ក្ដៅ ខណៈអាជ្ញាធរបានបន្តជួយសម្រួលចរាចរណ៍ និងថ្វាយការការពារសុវត្ថិភាពតាមដងផ្លូវផងដែរ ។

សមត្ថកិច្ច ក៏បានអំពាវនាវដល់ប្រជាពលរដ្ឋឱ្យផ្ដល់អាទិភាពលើសុវត្ថិភាព និងបង្ហាញការគោរពដល់ព្រះសង្ឃ ដូចជា ស្ដាប់តាមការណែនាំរបស់អាជ្ញាធរ រក្សាចម្ងាយសមគួរ មិនត្រូវប៉ះពាល់ព្រះកាយព្រះសង្ឃ និងមិនត្រូវរំខានដល់ចរាចរណ៍។ យុទ្ធនាការនេះ គ្រោងនឹងឆ្លងកាត់ទីក្រុងជាច្រើនទៀត មុននឹងទៅដល់រដ្ឋធានីវ៉ាស៊ីនតោន ក្នុងរយៈពេលប្រហែល ២០ ថ្ងៃទៀត ៕

ប្រែសម្រួល៖ ឡេង លាងហេង
ប្រភព៖ CBS 6 News/ Walk For Peace/ Others | រូបភាព៖ Facebook Page Walk For Peace