ភ្នំពេញ៖ រថយន្តចំនួន ២គ្រឿង បានបើកបរក្នុងល្បឿនលឿន បុកគ្នានៅផ្លូវបំបែកជា៤ បណ្តាលឲ្យរថយន្ត ១គ្រឿងក្រឡាប់ និង១គ្រឿងទៀតរងការខូចខាត កាលពីវេលាម៉ោង ៣:២០នាទីព្រឹក ថ្ងៃទី៨ ខែវិច្ឆិកា ឆ្នាំ២០២៤ ស្ថិតនៅផ្លូវបំបែកលេខ៥១ កែងផ្លូវលេខ១០៦ សង្កាត់វត្តភ្នំ ខណ្ឌដូនពេញ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុឃើញរថយន្ត GAC ពណ៌ខ្មៅ ពាក់ស្លាកលេខ ភ្នំពេញ 2BY-8642 បើកបរដោយបុរសម្នាក់ រួមដំណើរដោយជនជាតិចិន ២នាក់។ រថយន្តខាងលើ បានបើកបរតាមបណ្តោយផ្លូវលេខ១០៦ ទិសដៅពីកើតទៅលិច ឆ្លងកាត់ផ្លូវបំបែក ដោយមិនបានបន្ថយល្បឿន។ លុះមកដល់ចំណុចកើតហេតុ ស្រាប់តែមានរថយន្តតូយូតាព្រូស ១គ្រឿង ពណ៌ប្រផេះ ពាក់ស្លាក់លេខភ្នំពេញ 2BN-8946 បើកបរដោយបុរសម្នាក់ ធ្វើដំណើរតាមបណ្តោយផ្លូវលេខ៥១ ទិសដៅពីជើងទៅត្បូង មិនបានបន្ថយល្បឿនដូចគ្នា។

អ្នកឃើញហេតុការណ៍បានបន្តថា លុះមកដល់ចំណុចកើតហេតុ ត្រង់ផ្លូវបំបែក រថយន្តព្រូសបានបុករថយន្ត GAC ពីចំហៀងខាងស្តាំ ពេញទំហឹង បណ្តាលឲ្យរថយន្ត GAC ក្រឡាប់ផ្ងារកង់ឡើងលើ។ ចំណែករថយន្តព្រូស បានរងការខូចខាតផ្នែកខាងមុខ មិនអាចបន្តដំណើរទៅមុខទៀតបាន។

ក្រោយកើតហេតុ ជនជាតិចិន ២នាក់ នៅក្នុងរថយន្ត GAC បានរងរបួសស្រាល រួចបានទៅមន្ទីរពេទ្យដើម្បីព្យាបាលរបួស បន្ទាប់មកភាគីទាំងសងខាងក៏បានជជែកគ្នា តែមិនត្រូវគ្នា ទើបហៅសមត្ថកិច្ចជួយដោះស្រាយ។ បន្ទាប់មកហេតុសមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តទាំង ២គ្រឿង ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនទៅដោះស្រាយ៕

ដោយ៖ ឌីយ៉ាម៉ង់