UPDATE: ជនជាប់ឃុំជាជនជាតិវៀតណាម ដែលបានរត់គេចខ្លួនពីពន្ធនាគារខេត្តស្វាយរៀង ត្រូវបាននគរបាលកម្ពុជា សហការជាមួយវៀតណាម ចាប់បានមកវិញហើយ
អត្ថបទ៖មិន ភក្ដី
ស្វាយរៀង៖ យោងតាមស្នងការនគរបាលខេត្តស្វាយរៀង នៅថ្ងៃទី០៥ ខែវិច្ឆិកា ឆ្នាំ២០២៤ ករណីអ្នកទោសលួចរត់ចេញពីពន្ធនាគារខេត្តស្វាយរៀង កាលពីវេលាម៉ោង ១៦និង៤០នាទី ថ្ងៃទី២៨ ខែតុលា ឆ្នាំ២០២៤ ដោយឈ្មោះ ហ្វៀង ឌីងទន់ ភេទប្រុស អាយុ១៧ឆ្នាំ ជនជាតិវៀតណាម បានមកសួរសុខទុកឈ្មោះ ង្វៀង តុងហ្វឹង ភេទប្រុស អាយុ២៤ឆ្នាំ ជនជាតិវៀតណាម នៅពន្ធនាគារខេត្តស្វាយរៀង។
បន្ទាប់ពីសួរសុខទុក្ខ បានប្រហែល៥នាទី ឈ្មោះ ហ្វៀង ឌីងទន់ បានដើរចេញមកខាងក្រៅ រួចឈ្មោះ ង្វៀង តុងហ្វឹង រត់មកតាមក្រោយដោយបានយកកាំភ្លើង ១ដើម (មិនចាំម៉ាក) ពីឈ្មោះ ហ្វៀង ឌីងទន់ ធ្វើការភ្ជង់ទៅលើមន្ត្រីការពារ រួចបានឡើងម៉ូតូ ធ្វើការរត់គេចខ្លួន ។
ហើយនៅថ្ងៃទី២៨ ខែតុលា ឆ្នាំ២០២៤ វេលាម៉ោង ១៦និង៤០នាទី ក្រោយពីបានទទួលព័ត៌មានពីមន្ត្រីអគារអនុរក្សពន្ធនាគារខេត្តស្វាយរៀង ថាមានករណីទណ្ឌិត ឈ្មោះ ង្វៀង ចុងង្វៀង ភេទប្រុស អាយុ ២៤ឆ្នាំ ជនជាតិវៀតណាម បានរត់គេចខ្លួនពីពន្ធនាគារខេត្តស្វាយរៀងរួចមក កងកម្លាំង នៃស្នងការដ្ឋាននគរបាលខេត្តស្វាយរៀង សហការជាមួយកម្លាំងអគារអនុរក្សពន្ធនាគារ និងនាយកដ្ឋាននគរបាលព្រហ្មទណ្ឌ ព្រមទាំងអនុវត្តតាមបទបញ្ជា និងអនុសាសន៍ដ៏ខ្ពង់ខ្ពស់របស់លោកនាយឧត្តមសេនីយ៍ ស ថេត អគ្គស្នងការនគរបាលជាតិ បញ្ជាដឹកនាំផ្ទាល់ពីលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង បានចាត់តាំងលោកវរសេនីយ៍ឯក គឹម ឡៃ ស្នងការរងទទួលផែនការងារនគរបាលព្រហ្មទណ្ឌ ដឹកនាំកងកម្លាំងជំនាញ ចុះធ្វើការស្រាវជ្រាវ ព្រមទាំងបានសហការជាមួយកម្លាំងបញ្ជាការដ្ឋានកងទ័ពការពារព្រំដែនខេត្តឡុងអាន នៃសាធារណរដ្ឋសង្គមវៀតណាម បានធ្វើការស្រាវជ្រាវ និងឃាត់ខ្លួនជនសង្ស័យ ០២នាក់ រួមមាន
១- ឈ្មោះ ង្វៀន ចុងង្វៀង ភេទប្រុស អាយុ ២៤ឆ្នាំ ជនជាតិវៀតណាម (ជនជាប់ឃុំ) និងជាមុខសញ្ញាមានដីកា របស់សមត្ថកិច្ចនគរបាលខេត្តង៉េអាន នៃសាធារណរដ្ឋសង្គមនិយមវៀតណាម។ និង២- ឈ្មោះ ង្វៀង ឌីងទន់ ភេទប្រុស អាយុ ២៣ឆ្នាំ (បក្ខពួកដឹកជនជាប់ឃុំ)។
សមត្ថកិច្ចបានធ្វើការដកហូត ម៉ូតូធ្វើសកម្មភាព ០១គ្រឿង និងអាវុធខ្លី ០២ដើម (អាវុធប្រើខ្យល់ ០១ដើម)។
បច្ចុប្បន្ន សមត្ថកិច្ចជំនាញកំពុងបន្តស្រាវជ្រាវ រកបក្ខពួកផ្តល់មធ្យោបាយ ដើម្បីយកមកចាត់ការតាមនីតិវិធីច្បាប់៕
