ភ្នំពេញ៖ មានករណីអគ្គិភ័យមួយបានកើតឡើងនៅចំណុចរោងចក្រ SDY Company Construction Interior Design-Furniture (ផលិតទ្វារ បង្អួច) ស្ថិតនៅផ្លូវបេតុង ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ នៅវេលាម៉ោង ២១:១០នាទីយប់ ថ្ងៃទី៤ ខែវិច្ឆិកា ឆ្នាំ២០២៤។

អគ្គិភ័យនេះ សមត្ថកិច្ចកំពុងស្រាវជ្រាវរកមូលហេតុដែលបណ្តាលឱ្យឆេះរោងចក្រទំហំ ៦០ម៉ែត្រ គុណនឹង ៩០ម៉ែត្រ ក្នុងនោះខូចខាតសម្ភារក្នុងរោងចក្រអស់ប្រហែល ៥០ភាគរយ ហើយពុំបានរាលដាលដល់អ្នកក្បែរខាងឡើយ។

អគ្គិភ័យនេះ ត្រូវបានពន្លត់បានទាំងស្រុងនៅវេលាម៉ោង ៤:៣០នាទីទាបភ្លឺ ឈានចូលថ្ងៃទី៥ ខែឆ្នាំដដែល ដោយប្រើប្រាស់រថយន្តការិយាល័យអគ្គិភ័យរាជធានីភ្នំពេញចំនួន ២១គ្រឿង ប្រើប្រាស់ទឹកអស់ចំនួន ១២៦រថយន្ត ស្មើរនឹង ៥០៤ម៉ែត្រគូប, រថយន្តអគ្គិភ័យកងពលតូចង ៧០ចំនួន ៦គ្រឿង ប្រើប្រាស់ទឹកអស់ចំនួន ១២រថយន្ត ស្មើនឹង ៤៨ម៉ែត្រគូប, រថយន្តអគ្គិភ័យបុរីប៉េងហួតចំនួន ២គ្រឿង ប្រើប្រាស់អស់ចំនួន ២រថយន្ត ស្មើនឹង ១២ម៉ែត្រគូប, រថយន្តអគ្គិភ័យក្រុមហ៊ុនស្រាបៀរកម្ពុជាចំនួន ១គ្រឿង ប្រើប្រាស់ទឹកអស់ចំនួន ០២រថយន្ត ស្មើនឹង ១២ម៉ែត្រគូប៕

អត្ថបទ៖ ម៉ៅ នរិទ្ធិយ៉ា