ភ្នំពេញ៖ រដ្ឋមន្ត្រីក្រសួងទេសចរណ៍កម្ពុជា និងឯកអគ្គរដ្ឋទូតចិនប្រចាំនៅកម្ពុជា បានឯកភាពគ្នា លើការពង្រឹងកិច្ចសហប្រតិបត្តិការក្នុងវិស័យទេសចរណ៍ ដើម្បីទាក់ទាញទេសចរចិន មកលេងកម្សាន្តនៅកម្ពុជា ឱ្យកាន់តែច្រើនបន្ថែមទៀត ពិសេសជំរុញក្រុមហ៊ុនអាកាសចរណ៍ចិនធំៗ បង្កើនជើងហោះហើរមកកម្ពុជា។

ការឯកភាពគ្នានេះ បានធ្វើឡើងក្នុងជំនួបរវាងរដ្ឋមន្ត្រីក្រសួងទេសចរណ៍ លោក ហួត ហាក់ និងលោក Wang Wenbin ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិនប្រចាំ ព្រះរាជាណាចក្រកម្ពុជា។

យោងតាមសេចក្តីប្រកាសព័ត៌មាន បានឱ្យដឹងថា ក្នុងជំនួបទ្វេភាគីរវាងលោករដ្ឋមន្ត្រី និងលោកឯកអគ្គរដ្ឋទូត បានបញ្ចប់ដោយទទួលបានលទ្ធផលលើការពង្រឹងកិច្ចសហប្រតិបត្តិការក្នុងវិស័យទេសចរណ៍ ដូចខាងក្រោម៖

១)- ស្ថានទូតចិន នឹងផ្តល់កិច្ចសហការល្អជាមួយក្រសួងទេសចរណ៍ ក្នុងការរៀបចំព្រឹត្តិការណ៍ធំៗ នៅក្នុង ក្របខ័ណ្ឌឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន រួមមាន៖ ពិព័រណ៍ម្ហូបអាហារ កម្ពុជា-ចិន (Cambodia- China Gastronomy Week) នាថ្ងៃទី២៦-២៧ ខែតុលា នៅខេត្តសៀមរាប, វេទិកាទេសចរណ៍ និងវប្បធម៌ព្រះពុទ្ធ សាសនា កម្ពុជា-ចិន នាថ្ងៃទី២៨-៣០ ខែតុលា នៅខេត្តសៀមរាប, ព្រឹត្តិការណ៍ពិព័រណ៍ទេសចរណ៍ កម្ពុជា-ចិន (Cambodia-China Travel Mart) នៅថ្ងៃទី២០-២២ ខែវិច្ឆិកា ឆ្នាំ២០២៤, ព្រឹត្តិការណ៍ The 13th China Zhengzhou International Shaolin Wushu Festival នៅប្រទេសចិន។

២)- ស្ថានទូតចិន ឯកភាពជួយជំរុញការចុះអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការទេសចរណ៍រវាងក្រសួងទេសចរណ៍កម្ពុជា និងក្រសួងវប្បធម៌ និងទេសចរណ៍ចិន ដើម្បីពង្រឹង និងពង្រីកកិច្ចសហប្រតិបត្តិការបន្ថែមទៀតលើវិស័យទេសចរណ៍។

៣) - ស្ថានទូតចិន ឯកភាពសហការជួយជំរុញក្រុមហ៊ុនអាកាសចរណ៍ចិនធំៗ បង្កើនជើងហោះហើរត្រង់រវាងបណ្តាខេត្ត និងទីក្រុងធំៗ របស់ប្រទេសចិនមកប្រទេសកម្ពុជា ឱ្យមានចំនួនកាន់តែច្រើនឡើង និងទៀងទាត់ ដើម្បីងាយស្រួលដល់ការធ្វើដំណើររបស់ប្រជាជនទាំងពីរប្រទេស និងអ្នកទេសចរផងដែរ។

៤)- ស្ថានទូតចិន ឯកភាពសហការផ្សព្វផ្សាយពីសក្តានុពលទេសចរណ៍របស់កម្ពុជា ឱ្យបានទូលំទូលាយដល់ប្រជាជនចិន ព្រមទាំងជួយទប់ស្កាត់ និងលុបបំបាត់រាល់ព័ត៌មានក្លែងក្លាយ ដែលជះផលអវិជ្ជមានដល់ប្រទេសកម្ពុជា។

៥)- ស្ថានទូតចិនឯកភាពពង្រឹង និងអភិវឌ្ឍធនធានមនុស្សក្នុងវិស័យទេសចរណ៍ តាមរយៈការផ្តល់ការបណ្តុះបណ្តាលទាំងនៅក្នុងប្រទេសកម្ពុជា ឬ នៅប្រទេសចិន។

៦)- ភាគីទាំងពីរ ឯកភាពចាត់តាំងជនបង្គោល ដើម្បីតាមដានវឌ្ឍនភាពនៃកិច្ចពិភាក្សារវាងក្រសួង ទេសចរណ៍កម្ពុជា និងស្ថានទូតចិន ព្រមទាំងផ្នែកឯកជនចិន និងកម្ពុជាក្នុងវិស័យទេសចរណ៍។

៧)- ឯកភាពសហការរៀបចំកម្មវិធីបិទឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ដែលគ្រោង ប្រព្រឹត្តទៅនៅខែមករា ឆ្នាំ២០២៥ ខាងមុខ ព្រមទាំងមានគំនិតផ្តួចផ្តើមក្នុងការរៀបចំប្រធានបទថ្មីៗសម្រាប់ឆ្នាំ បន្តបន្ទាប់។

លោករដ្ឋមន្ត្រី បានថ្លែងកោតសរសើរចំពោះទំនាក់ទំនងមិត្តភាពជាប្រពៃណី ទំនាក់ទំនងការទូតដែលមានរយៈពេល ៦៦ឆ្នាំ ជាមិត្តភាពដែកថែប និង «ភាពជាដៃគូយុទ្ធសាស្ត្រគ្រប់ជ្រុងជ្រោយ» ដោយឈរលើគោលការណ៍សមធម៌ ការជឿទុកចិត្តគ្នា ការគោរពគ្នា ការយោគយល់គ្នា ការគោរពអធិបតេយ្យ និងឯករាជ្យភាព ដើម្បីផលប្រយោជន៍រួម។ ក្រោមក្របខ័ណ្ឌកិច្ចសហប្រតិបត្តិការត្បូងពេជ្រ សំដៅសម្រេចបាននូវការកសាងសហគមន៍ជោគវាសនារួមកម្ពុជា-ចិន កិច្ចសហប្រតិបត្តិការរវាង ប្រទេសទាំងពីរ មានការរីកចម្រើន និងល្អប្រសើរលើគ្រប់វិស័យ ជាពិសេសវិស័យទេសចរណ៍ ដោយឆ្នាំ២០២៤ ជា ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន។

សូមបញ្ជាក់ថា ក្នុងឆ្នាំ២០២៣កន្លងទៅ កម្ពុជា ទទួលបានទេសចរអន្តរជាតិប្រមាណ ៥,៤៥ លាននាក់ ក្នុងនោះ ទេសចរជនជាតិចិន មានប្រមាណជាង ៥៤ម៉ឺននាក់។ នារយៈពេល ៨ខែ ដើមឆ្នាំ២០២៤ កម្ពុជាទទួលបានទេសចរអន្តរជាតិ ប្រមាណ ៤,២៩ លាននាក់ កើនឡើង ២២,៥% ក្នុងនោះទេសចរជនជាតិចិនមានប្រមាណជិត ៥៤ ម៉ឺននាក់ កើនឡើង ៤៧,៧%៕