ភ្នំពេញ៖ នៅថ្ងៃទី៣១​ ខែធ្នូឆ្នាំ ២០២៤ខាងមុខនេះ​ សហភាពសហព័ន្ធយុវជនកម្ពុជា ស.ស .យ.ក នឹងរៀបចំកម្មវិធីបង្ហាញវប្បធម៌ខ្មែរដ៏ធំមួយ នៅពីមុខព្រះបរមរាជវាំង ក្នុងរាជធានីភ្នំពេញ ដោយមានការចូលរួមពីសំណាក់យុវជន ជាសមាជិក សមាជិកា ស.ស.យ.ក​ និងបងប្អូនប្រជាពលរដ្ឋ។​នេះបើយោងតាមប្រសាសន៍លោកឧបនាយករដ្ឋមន្ត្រី​ ហ៊ុន ម៉ានី ប្រធានសហភាពសហព័ន្ធយុវជនកម្ពុជា។

លោកឧបនាយករដ្ឋមន្ត្រី​ ហ៊ុន ម៉ានី ប្រធានស.ស.យ.ក បញ្ជាក់ទៀតថា​ កម្មវិធីដែលគ្រោងរៀបចំនោះគឺក្នុងគោលបំណងប្រមូលផ្តុំស្មារតី នៃការជួបជុំរបស់បងប្អូនប្រជាពលរដ្ឋខ្មែរ ដើម្បីបង្ហាញអំពីទំនៀមទម្លាប់ប្រពៃណីវប្បធម៌ ដូចទៅនឹងកម្មវិធីដែល ស.ស.យ.ក ធ្លាប់បានរៀបចំកន្លងមកអ៊ីចឹងដែរ។

តាមគម្រោងសម្រាប់ថ្ងៃទី៣១ ខែធ្នូ ឆ្នាំ ២០២៤ នៅខាងមុខព្រះបរមរាជវាំង ស.ស.យ.ក. នឹងរៀបចំកម្មវិធី​​មួយដែល​មិនធ្លាប់បានរៀបចំពីមុនមក​​សម្រាប់​ខ្មែរ​ទាំង​អស់​គ្នា​ចូលរួម​ នឹងមានលក្ខណៈខុស​ប្លែក​ពីកម្មវិធីមុនៗ។ ដោយលេចរូបរាងឡើង អមជាមួយវប្បធម៌ប្រពៃណី ខុស ប្លែក និងពិសេសពីកម្មវិធីដែល ស.ស. យ.ក ធ្លាប់រៀបចំកន្លងមក។

តើអ្វីទៅដែលជាផ្នែកនៃសង្គមជាតិរបស់យើង នៃប្រជាជាតិរបស់យើង នៃដូនតារបស់យើង និងភាពអស្ចារ្យនៃទំនៀមទម្លាប់ប្រពៃណីរបស់យើង? តើអ្វីទៅ ដែលនាំឱ្យយើង មានស្នាមញញឹម មានមោទកភាព ក្នុងនាមជាខ្មែរនេះ? “នេះជាអ្វីដែលសហភាពសហព័ន្ធយុវជនកម្ពុជាកំពុងតែខិតខំប្រឹងប្រែង និងរៀបចំនៅថ្ងៃទី៣១ ខែធ្នូខាងមុខនេះ”។

ជាមួយគ្នានោះដែរលោក ហ៊ុន ម៉ានី បានលើកទឹកចិត្តដល់យុវជន សាកល្បងបិទភ្នែកបន្តិចហើយ​សាក​ស្រមៃ​សួរ​ខ្លួនឯង​មួយសំណួរថា «ក្នុងនាមជាខ្មែរមួយរូប តើអ្វីដែលនាំមកនូវស្នាមញញឹម មោទនភាព និងក្តីស្រឡាញ់សម្រាប់កម្ពុជាជាទីស្រឡាញ់របស់យើង? ហើយ​ក្នុងនាមយើងជាកូនខ្មែរ តើយើងអាចបង្ហាញក្តីស្រឡាញ់សម្រាប់កម្ពុជាដូចម្ដេចខ្លះ?»៕

ដោយ៖​ វង សុភ័ក្ត្រ