ភ្នំពេញ៖ បុរសម្នាក់បានស្លាប់ភ្លាមៗ បន្ទាប់ពីដួលម៉ូតូចូលក្រោមកង់រថយន្តដឹកសាំង ហើយត្រូវរថយន្តកិនបែកក្បាល នៅមុខវត្តស្ទឹងមានជ័យ កាលពីវេលាម៉ោង ៤ទៀបភ្លឺ ឈានចូលព្រឹកថ្ងៃទី១៩ ខែកញ្ញា ឆ្នាំ២០២៤ ស្ថិតនៅតាមបណ្តោយផ្លូវ២១៧ ទល់មុខវត្តស្ទឹងមានជ័យ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញជនរងគ្រោះ ជិះម៉ូតូហុងដាឌ្រីមសេ១២៥ ពណ៌ខ្មៅ ពាក់ស្លាកលេខ កំពង់ចាម 1G-4749 ធ្វើដំណើរតាមបណ្តោយផ្លូវលេខ២១៧ ក្នុងទិសដៅពីលិចទៅកើត ខណៈមកដល់ចំណុចកើតហេតុ នៅទល់មុខវត្តស្ទឹងមានជ័យ ស្រាប់តែជួបគ្រោះថ្នាក់ចរាចរណ៍ ដោយជិះចូលក្រោមកង់រថយន្តដឹកសាំង រួចត្រូវបានរថយន្តដឹកសាំងនោះកិនបែកក្បាលស្លាប់ភ្លាមៗតែម្តង។

អ្នកឃើញហេតុការណ៍ បានបន្តទៀតថា បុរសខាងលើជាអ្នកដឹកសាច់ជ្រូកឱ្យគេ ដែលមានហៅក្រៅថា ឆែប មានវ័យប្រមាណ ១៧ឆ្នាំ។ មុនពេលកើតហេតុបានដឹកសាច់ចេញពីកុងស៊ីកាប់ជ្រូកទៅទម្លាក់តាមគោលដៅ តែជាអកុសល បែជាជួបគ្រោះថ្នាក់ស្លាប់។ ចំណែករថយន្តដឹកសាំង មិនបានឈប់នោះទេ ក៏បានបន្តបើកទៅកាន់គោលដៅស្ថានីយ៍ប្រេងឥន្ទនៈនៅក្បែរសាលាជាស៊ីមសាមគ្គី ស្ថិតនៅលើកំណាត់ផ្លូវ២៧១។

ក្រោយពេលកើតហេតុ សមត្ថកិច្ចបានធ្វើការឃាត់ខ្លួនម្ចាស់រថយន្តខាងលើ និងយកទៅប៉ុស្តិ៍នគរបាលរដ្ឋបាលស្ទឹងមានជ័យ២ ដើម្បីធ្វើការសាកសួរនាំ និងអនុវត្តបន្តតាមនីតិវិធី។ ចំណែកសពជនរងគ្រោះ ប្រគល់ជូនក្រុមគ្រួសារ៕

ដោយ៖ ឌីយ៉ាម៉ង់