កោះកុង៖ ក្បាលខឿន ចែកទ្រូងស្ពានភ្លោះ ស្ថិតលើបណ្តោយផ្លូវ វិធីសាយ ភូថង ដែលជាផ្លូវសេដ្ឋកិច្ច និងទេសចរណ៍ ឆ្ពោះទៅតំបន់វិស្សមកាលតារាសាគរ កម្រិតអន្តរជាតិ ត្រូវបាក់បែកខូចខាតទាំងស្រុង ដោយរថយន្តសន្តោង បើកបរខ្វះការប្រុងប្រយ័ត្ន។

ពិតជាគួរឲ្យភ្ញាក់ផ្អើលមែន ម្ចាស់រថយន្តសន្ដោងបើកបរបុក ទ្រូងពុះចែកផ្លូវស្ពានភ្លោះ ខ្ទេចខ្ទាំ ខូចខាតទាំងស្រុង តែហ៊ានចេញមុខ ជួសជុលសងឡើងវិញ តាមកិច្ចសន្យា ដោយក្តីសោមនស្សរីករាយ ពីមន្ត្រីជំនាញសាធារណការ និងដឹកជញ្ជូនខេត្តកោះកុង ក្រោយការធ្វើកំណត់ហេតុ។

លោក អន ដាវុធ ប្រធានមន្ទីរសាធារណការ និងដឹកជញ្ជូនខេត្តកោះកុង បានបញ្ជាក់នៅថ្ងៃទី២៩ សីហា ២០២៤ នេះថា ចំពោះករណីគ្រោះថ្នាក់ចរាចរណ៍នេះ គឺអ្នកបើកបរ គាត់ពុំមានចេតនានោះទេ ពោលគឺបណ្តាលមកពីរថយន្តបែកកង់ហើយរេរចង្កូត ទៅបុកខឿនក្បាលស្ពាន បាក់បែកទាំងស្រុង លើបណ្តោយផ្លូវ វិថីសាយ ភូថង តែសំណាងល្អពុំមានគ្រោះថ្នាក់ដល់អាយុជីវិត។ តែទោះជាយ៉ាងនេះក្តី ខាងមន្ទីរសាធារណការ និងដឹកជញ្ជូន បានត្រឹមជួយសម្របសម្រួលឲ្យមានការជួសជុលសងសម្បត្តិរដ្ឋឡើងវិញ ដោយតម្រូវឲ្យចូលខ្លួនមកធ្វើកិច្ចសន្យា តាមកាលកំណត់ ព្រោះជាសម្បត្តិសាធារណរបស់រដ្ឋ និងគ្រប់គ្រងស្ថាបនាដោយមន្ទីរសាធារណការ និងដឹកជញ្ជូន។

បើតាមរបាយការណ៍ពីលោក យ៉េន ទូច អធិការដ្ឋាននគរបាលស្រុកបូទុមសាគរ បង្ហាញថា ករណីគ្រោះថ្នាក់ចរាចរណ៍នេះ បង្កឡើងដោយអ្នកបើកបរឈ្មោះ ជុន ចាន់រ៉ា ភេទប្រុស អាយុ ២៥ ឆ្នាំ ជនជាតិខ្មែរ មានទីលំនៅភូមិ អូមទឹក ឃុំ រំដួល ស្រុក ភ្នំស្រួច ខេត្ត កំពង់ស្ពឺ ជាម្ចាស់យានយន្តម៉ាក ហ៊ីយ៉ាន់ដាយ ពណ៌ ស ពាក់ស្លាកលេខកំពង់ស្ពឺ 3A.8880 បើកបរទិសដៅ ពីស្រុកគីរីសាគរ ទៅស្រុកភ្នំស្រួច បើកបរក្នុងស្ថានភាពល្បឿនលឿន លុះមកដល់ចំណុចកើតហេតុរថយន្ដបែកកង់មុខ ផ្នែកខាងឆ្វេង រេរចង្កូតទៅបុកនឹងខឿនទ្រូងពុះចែកផ្លូវស្ពានភ្លោះ ដោយខ្លួនឯង មិនបណ្តាលឲ្យរងរបួសដល់មនុស្សទេ និងរថយន្តខូចខាតទាំងស្រុង៕

អត្ថបទ៖ តាំង សុន្នី