ចាប់ខ្លួនក្មេងទំនើង ៦នាក់ នៅក្រុងប៉ោយប៉ែត ដែលមានរហ័សនាមក្រុម 4T5 បន្ទាប់ពីកាប់យុវជនម្នាក់យ៉ាងសាហាវបណ្តាលឱ្យរបួសធ្ងន់
បន្ទាយមានជ័យ៖ មានករណីហិង្សាដោយចេតនា ដែលបង្ករឡើងដោយក្រុមក្មេងស្ទាវឈ្មោះ4T5 ឬក្រុមថ្នាំដុះធ្មេញចំនួន ៦នាក់ បានជិះម៉ូតូ ៣គ្រឿង និងប្រើកាំបិតប៊ាំងតោ កាប់ទៅលើយុវជនម្នាក់ឈ្មោះ ចំណាន រតនៈពេជ្រ ភេទប្រុស អាយុ១៨ឆ្នាំ មានទីលំនៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ បណ្ដាលឱ្យរងរបួសក្បាលផ្នែកខាងលើដេរចំនួន ៣៦ថ្នេរ និងប្រើកូនកាំបិតចាក់លើចង្ការខាងឆ្វេងបណ្ដាលឱ្យរងរបួសដេរចំនួន ២ថ្នេរ ផងដែរ។
យោងតាមរបាយការណ៍របស់សមត្ថកិច្ច ខេត្តបន្ទាយមានជ័យ នៅថ្ងៃទី១៣ ខែសីហា ឆ្នាំ២០២៤ បានឱ្យដឹងថា ករណីនេះបានកេីតឡេីងកាលពីវេលាម៉ោង ២០:១៥នាទី ថ្ងៃទី៦ ខែសីហា ឆ្នាំ២០២៤ នៅចំណុចមុខម៉ាតក្នុងបុរីឌឹផាកស៊ីធី ស្ថិតក្នុងភូមិគីឡូម៉ែត្រ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។ ក្រោយពីធ្វើសកម្មភាពរួចក្រុមនេះ បានជិះម៉ូតូគេចខ្លួនបាត់ បន្សល់ទុកជនរងគ្រោះដេកនៅក្នុងថ្លុកឈាម ត្រូវបានក្រុមសង្គ្រោះដឹកយកទៅសង្គ្រោះបន្ទាន់នៅមន្ទីរពេទ្យបង្អែកក្រុងប៉ោយប៉ែត។
រហូតដល់ថ្ងៃទី៨ ខែសីហា ឆ្នាំ២០២៤ នៅមូលដ្ឋានកម្លាំងអាវុធហត្ថក្រុងប៉ោយប៉ែត បានឃាត់ខ្លួនជនសង្ស័យជាបន្តបន្ទាប់ ពាក់ព័ន្ធករណីហិង្សាដោយចេតនា(មានស្ថានទម្ងន់ទោស) និងប្រើប្រាស់ដោយខុសច្បាប់នូវសារធាតុញៀន នៅចំណុចភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ក្រុងសិរីសោភ័ណ និងស្រុកស្វាយចេក ខេត្តបន្ទាយមានជ័យ ក្រោយពីបានទទួលបណ្ដឹងពីជនរងគ្រោះ។
ជនសង្ស័យទាំង៦នាក់ឈ្មោះ លីន វរៈបុត្រ ភេទប្រុស អាយុ១៩ឆ្នាំ មានទីលំនៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ, ឈ្មោះ ស្រ៊ឹម ម៉េងលី ភេទប្រុស អាយុ១៩ឆ្នាំ មានទីលំនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ឈ្មោះ សេង ទីទី ភេទប្រុស អាយុ២៦ឆ្នាំ មានទីលំនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ, ឈ្មោះ រិន បូរ៉ា ភេទប្រុស អាយុ ៣០ឆ្នាំ មានទីលំនៅភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ, ឈ្មោះ ហុង សុន្ទរោ ហៅ4T5 ភេទប្រុស អាយុ២៥ឆ្នាំ មានទីលំនៅភូមិ២ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ, ឈ្មោះ ជា ធារ៉ា ភេទប្រុស អាយុ២៤ឆ្នាំ មានទីលំនៅភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
សូមបញ្ជាក់ថា ក្នុងករណីនេះដោយមានការណែនាំពី លោកឧត្ដមសេនីយ៍ត្រី បោន ប៊ិន មេបញ្ជាការអាវុធហត្ថខេត្តបន្ទាយមានជ័យ និងមានការសម្របស្រួលនីតិវិធីដោយលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ លោកវរសេនីយ៍ត្រី នួន នីណារ៉ូ មេបញ្ជាការអាវុធហត្ថក្រុងប៉ោយប៉ែត បានបញ្ជាឱ្យកម្លាំងមូលដ្ឋានអាវុធហត្ថក្រុង បានចុះស្រាវជ្រាវឈានទៅដល់ការឃាត់ខ្លួនជនសង្ស័យជាបន្តបន្ទាប់។
បច្ចុប្បន្ន ជនសង្ស័យខាងលើ សមត្ថកិច្ចជំនាញ កំពុងកសាងសំណុំរឿងបញ្ជូនទៅតុលាការចាត់ការតាមនីតិវិធី៕
