ភ្នំពេញ៖ ក្រុមហ៊ុន Phnom Penh Food Yummy Manufacturing ដែលជាសហគ្រាសកែច្នៃកសិកម្ម និងអាហារដ៏លេចធ្លោរបស់កម្ពុជា គ្រោងនាំចេញម្ហូបខ្មែរ អាម៉ុក ទៅទីផ្សារក្រៅប្រទេសនាពេលខាងមុខនេះ បន្ទាប់ពីក្រុមហ៊ុននេះ បាននាំចេញនូវផលិតផលជាច្រើនប្រភេទ រួមទាំងបុកកន្ទុយហេស បុកត្រីឆ្អើរ និងប្រហុកខ្ទិះ ទៅប្រទេសជាច្រើន។

នេះបើតាមការលើកឡើងរបស់ លោកស្រី ហ៊ុក ស្រីហួរ អគ្គនាយិកាក្រុមហ៊ុន Phnom Penh Food Yummy Manufacturing បានជម្រាបជូនលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងអំឡុងដំណើរទស្សនកិច្ចទៅកាន់នេះ ដើម្បីបង្ហាញការគាំទ្រដល់ធុរកិច្ចក្នុងស្រុក។

លោកស្រី ហ៊ុក ស្រីហួរ អគ្គនាយិកាក្រុមហ៊ុន Phnom Penh Food Yummy Manufacturing លើកឡើងថា សហគ្រាសរបស់លោកស្រីមានគោលបំណងផ្លាស់ប្តូរផលិតផលរបស់ខ្លួនឱ្យកាន់តែមានស្តង់ដារ និងបង្កើនការនាំចេញ។ លោកស្រី បាននាំចេញដោយជោគជ័យទៅកូរ៉េខាងត្បូង ដោយសង្ឃឹមថា នឹងនាំចេញទៅកាន់ប្រទេសអូស្ត្រាលីនៅចុងឆ្នាំនេះ ជាមួយនឹងគំរូដែលបានបញ្ជូនទៅសហរដ្ឋអាមេរិក នូវែលសេឡង់ និងប្រទេសដទៃទៀតរួចហើយ។

លោកស្រីបាននាំចេញផលិតផលចំនួន ៥០០គីឡូក្រាម ទៅកាន់ប្រទេសកូរ៉េខាងត្បូងរួចហើយ និងមានបំណងពង្រីកការនាំចេញរបស់យើងទៅកាន់ប្រទេសចំនួន ៥។ បច្ចុប្បន្ននេះ លោកស្រី បាននាំចេញក្រៅផ្លូវការទៅកាន់ប្រទេសចំនួន ១០។ សហគ្រាសរបស់លោកស្រីបានផ្តល់នូវផលិតផលជាច្រើនប្រភេទ រួមទាំងបុកកន្ទុយហេស បុកត្រីឆ្អើរ និងប្រហុកខ្ទិះ។

លោកស្រីចង់នាំចេញអាម៉ុកទៅក្រៅប្រទេស សម្រាប់ការទទួលស្គាល់ជាអន្តរជាតិ ក៏ដូចជានំបញ្ចុក និងគុយទាវខ្មែរ ដោយជំរុញឱ្យមានការគាំទ្រក្នុងស្រុកខ្លាំង ខណៈដែលលោកស្រីកំពុងពិចារណាលើអាហារហាឡាល ដែលទំនងជានឹងបង្ហាញនៅឆ្នាំក្រោយ។ លោកស្រីបានបន្ថែមថា ចាប់តាំងពីឆ្នាំ ២០២៣មក លោកស្រីទទួលបានការគាំទ្រខ្លាំង ហើយផលិតផលរបស់លោកស្រី អាចរកបាននៅតាមផ្សារទំនើបធំៗមួយចំនួននៅក្នុងប្រទេសកម្ពុជា។

ក្នុងឱកាសនោះដែរ លោករដ្ឋមន្ត្រី ហែម វណ្ណឌី បានជំរុញឲ្យសហគ្រាសផលិតត្រូវរក្សាបាននូវស្តង់ដារខ្ពស់នៃគុណភាព សុវត្ថិភាព អនាម័យ និងការច្នៃប្រឌិតនៃផលិតផលម្ហូបអាហារកម្ពុជា ក្នុងគោលបំណងទទួលបានការទទួលស្គាល់ជាអន្តរជាតិ។

លោករដ្ឋមន្ត្រី បន្តថា ក្រសួងលើកទឹកចិត្តឱ្យសហគ្រាសក្រុមហ៊ុនចាប់យកនវានុវត្តន៍ និងពង្រីកទីផ្សារពិសេសរបស់ខ្លួន ដោយការផលិតម្ហូបប្រពៃណីខ្មែរ និងផលិតផលផ្សេងទៀត ដែលបំពេញតាមតម្រូវការ ដែលផ្តោតកាន់តែខ្លាំងលើគុណភាព សុខភាព និងបរិស្ថាន ជាពិសេសក្នុងទីផ្សារនាំចេញ។

លោករដ្ឋមន្ត្រី ហែម វណ្ណឌី គូសបញ្ជាក់ថា ក្រសួងត្រៀមគាំទ្រ និងសម្រួលដល់ការរីកលូតលាស់នៃវិស័យឧស្សាហកម្មចំណីអាហាររបស់កម្ពុជា ហើយបានសង្កត់ធ្ងន់លើភាពចាំបាច់នៃការទិញវត្ថុធាតុដើម ពីកសិករក្នុងស្រុក ដើម្បីរួមចំណែកដល់ការបង្កើតការងារ បង្កើនប្រាក់ចំណូល និងគាំទ្រដល់ជីវភាពរបស់កសិករ និងសហគមន៍របស់ពួកគេ៕
អត្ថបទ៖ ចេង ឆហួត