ភ្នំពេញ៖​ អភិបាលរាជធានីភ្នំពេញ លោក​ ឃួង ស្រេង បានបេីកកិច្ចប្រជុំត្រួតពិនិត្យការងារសន្តិសុខ សុវត្ថិភាពសណ្ដាប់ធ្នាប់ សាធារណៈ និងពិនិត្យទីតាំងប្រារព្ធកម្មវិធី ប្រគំតន្ត្រីជាក់ស្ដែង នៅសៀលថ្ងៃទី៤​ ខែសីហា ឆ្នាំ២០២៤ ដេីម្បីអបអរសាទរពិធីបេីកការដ្ឋានសាងសង់ "ព្រែក ជីកហ្វូណនតេជោ" នៅថ្ងៃទី៥ ខែសីហា ឆ្នាំ២០២៤ នៅមុខសាលមហោស្រពកោះពេជ្រ ព្រមទាំងរៀបចំពិធីអុជធូបសុំសេចក្ដីសុខសេចក្ដីចម្រើន​ ដំណេីរការកម្មវិធីប្រកបដោយរលូន​។
ក្នុងឱកាសនោះ​ លោក​ ឃួង ស្រេង បានលេីកឡេីងថា​ កងកម្លាំង មន្ត្រី​ និងក្រុមការងាររបស់រដ្ឋបាលរាជធានីភ្នំពេញ​ បានយកអស់កម្លាំងកាយចិត្ត ក្នុងការអនុវត្តការងារសំដៅធ្វើយ៉ាងណាឱ្យពិធីអបអរសាទរថ្ងៃបើកការដ្ឋានគម្រោងព្រែកជីកហ្វូណន-តេជោ នៅថ្ងៃទី៥​ ខែសីហា​ ឆ្នាំ​២០២៤​ ដំណើរការទៅដោយភាពសប្បាយរីករាយ និងជោគជ័យ។
លោក​ ឃួង ស្រេង បានបញ្ជាក់ថា​ ការងារសំខាន់របស់អាជ្ញាធរគឺ​ កិច្ចការពារសន្តិសុខ សុវត្ថិភាព និងសណ្ដាប់ធ្នាប់ សាធារណៈ ក្នុងពិធីអបអរសាទរ ថ្ងៃបើកការដ្ឋានគម្រោងព្រែកជីកហ្វូណន-តេជោ នៅថ្ងៃស្អែកនេះ ដែលទាមទាឱ្យកងកម្លាំង​ និងអាជ្ញាធរខណ្ឌទាំង១៤ យកអស់មម្លាំងកាយចិត្ត ក្នុងស្មារតីខ្មែររួមជាតិតែមួយ ធ្វើយ៉ាងណាឱ្យពិធីនេះដំណើរទៅដោយរលូន មានសន្តិសុខ សុវត្ថិភាព​ ជាមួយនឹងភាពសប្បាយរីករាយ។
សូមបញ្ជាក់ថា​ គម្រោងព្រែកជីកហ្វូណន-តេជោ​ នឹងបើកការដ្ឋាននៅព្រឹកថ្ងៃទី៥​ ខែសីហា​ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ជាមួយគ្នានេះដែរគ្រប់ខណ្ឌ គ្រប់មន្ទីរចំណុះឱ្យរដ្ឋបាលរាជធានីភ្នំពេញ ក៏មានការរៀបចំអបអរសាទរពិធីបើកការដ្ឋានគម្រោងព្រែកជីកហ្វូណន-តេជោនេះដែរ ដោយធ្វើឡើងនៅតាមអង្គភាពរៀងៗខ្លួន មានទាំងការដាក់ទង់ជាតិ ទង់សាសនា និងការទូងស្គ ឱ្យមានភាពគគ្រឹកគគ្រែងក្នុងស្មារតីជាតិតែមួយ។ ដោយឡែក វិហារសាសនានានា នៅក្នុងភូមិសាស្ត្រ រាជធានីភ្នំពេញ ក៏មានការទូងស្គបែបនេះផងដែរ។
លោក​ ឃួង ស្រេង បានបញ្ជាក់ថា​ ក្រោយពិធីបើកការដ្ឋានបានបញ្ចប់ ពោលគឺ​ នៅរាត្រីថ្ងៃទី៥​ ខែសីហា​ ឆ្នាំ២០២៤ នឹងមានការប្រគុំតន្ត្រី នៅមុខសាលមហោស្រពកោះពេជ្រ ដែលមានសិល្បករ និងកីឡាករ ល្បីៗរបស់កម្ពុជា​ និងមានអ្នកចូលរួមប្រមាណជាង​ ១ម៉ឺននាក់ ជាមួយនឹងការរៀបចំបាញ់កាំជ្រូចនៅទន្លេ៤មុខចំនួន២លើក គឺនៅម៉ោង​៧:២០នាទី​ ១លើក និងទី២នៅម៉ោង​ ៩:៩យប់​ មួយលើកទៀត។
លោក​ ឃួង ស្រេង មានប្រសាសន៍ថា​ ការដ្ឋានសាងសង់ "ព្រែក ជីកហ្វូណនតេជោ" ជាផលប្រយោជន៍ដ៏ធំធេងសម្រាប់ប្រជាជាតិកម្ពុជា។ គម្រោងជាប្រវត្តិសាស្ត្រលើកទី១នៅកម្ពុជា ក្រោមគំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន ហើយបច្ចុប្បន្នសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ឱ្យបន្តសម្រេចបាន​ ដើម្បីផលប្រយោជន៍ខ្មែរជំនាន់ក្រោយ៕