ភ្នំពេញ៖ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានធ្វើបទបង្ហាញអំពីយុទ្ធសាស្ត្រអភិវឌ្ឍលើវិស័យសាធារណការ និងដឹកជញ្ជូន ដែលបានលើកឡើងអំពីទិដ្ឋភាពទូទៅនៃយុទ្ធសាស្ត្របញ្ចកោណដំណាក់កាលទី១ ការធ្វើឱ្យប្រសើរឡើងនៃសេវាសាធារណៈ ការលើកកម្ពស់ការតភ្ជាប់ និងប្រសិទ្ធភាពក្នុងការដឹកជញ្ជូន និងឡូជីស្ទីក និងការធ្វើទំនើបកម្មបច្ចេកវិទ្យាឌីជីថល ក្នុងវិស័យសាធារណការ និងដឹកជញ្ជូន។

ការធ្វើបទបង្ហាញបែបនេះរបស់លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ក្នុងឱកាសអញ្ជើញចូលរួមធ្វើបទបង្ហាញអំពីយុទ្ធសាស្ត្រអភិវឌ្ឍលើវិស័យសាធារណការ និងដឹកជញ្ជូន ក្នុងវេទិកាធុរកិច្ចកម្ពុជា-បារាំង នៅរាជធានីភ្នំពេញ នារសៀលថ្ងៃទី៨ ខែកក្កដា ឆ្នាំ២០២៤។

ថ្លែងក្នុងវេទិកាធុរកិច្ចកម្ពុជា-បារាំង ក្នុងន័យរួមចំណែកដល់ការជំរុញកំណើនសេដ្ឋកិច្ចជាតិ និងការលើកកម្ពស់ការដឹកជញ្ជូន និងហេដ្ឋារចនាសម្ព័ន្ធនៅកម្ពុជា លោក ប៉េង ពោធិ៍នា បានណែនាំ ឱ្យបង្កើតក្រុមការងារចំពោះកិច្ចមួយសម្រាប់ធ្វើការសិក្សាស្រាវជ្រាវ ពិនិត្យថ្លឹងថ្លែង និងផ្ទៀងផ្ទាត់ ទាំងលក្ខណៈបច្ចេកទេស និងការអនុវត្ត ដូចជា ការប្រៀបធៀបនឹងប្រ ទេសជិតខាង និងប្រទេសក្នុងតំបន់ ដើម្បីពិនិត្យ កែសម្រួល និងធ្វើវិសោធនកម្មច្បាប់ និងលិខិតបទដ្ឋានគតិយុត្តពាក់ព័ន្ធឱ្យបានគ្រប់ជ្រុងជ្រោយទៅតាមលក្ខណៈបច្ចេកទេសឱ្យមានសង្គតិភាពទៅនឹងស្ថានភាពហេដ្ឋារចនាសម្ព័ន្ធផ្លូវថ្នល់ និងការដឹកជញ្ជូន។

លោករដ្ឋមន្ត្រី បានបញ្ជាក់ថា រាជរដ្ឋាភិបាលអាណត្តិទី៧នេះ ក្រោមការដឹកនាំប្រកបដោយចក្ខុវិស័យវែងឆ្ងាយ និងឈ្លាសវៃរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា រាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដើម្បី “កំណើនការងារ សមធម៌ ប្រសិទ្ធភាព និងចីរភាព” សំដៅកសាងមូលដ្ឋានគ្រឹះឆ្ពោះទៅសម្រេចបាននូវចក្ខុវិស័យកម្ពុជា ឆ្នាំ២០៥០ ជាប្រទេសមានចំណូលខ្ពស់ ដែលក្នុងនោះ វិស័យសាធារណការ និងដឹកជញ្ជូន ក៏ត្រូវបានកំណត់ជាអាទិភាពមួយ ក្នុងចំណោមអាទិភាពគន្លឹះចំនួន ៥ រួមមាន “មនុស្ស ផ្លូវ ទឹក ភ្លើង និងបច្ចេកវិទ្យា”។

ជាមួយគ្នានេះ លោកបន្ថែមថា ដើម្បីចូលរួមចំណែកសម្រេចបាន នូវចក្ខុវិស័យរបស់រាជរដ្ឋាភិបាល ក្រសួងសាធារណការ និងដឹកជញ្ជូន បានអភិវឌ្ឍជាបន្តបន្ទាប់នូវហេដ្ឋារចនាសម្ព័ន្ធដឹកជញ្ជូន ឆ្លើយតបនឹងកត្តាប្រជាសាស្ត្រ និងវិវឌ្ឍន៍ផ្នែកនគរូបនីយកម្ម ដោយគិតមកដល់បច្ចុប្បន្ន ផ្លូវជាតិនិងផ្លូវខេត្ត ដែលបានសាងសង់រួចមានចំនួន ៨៥០ខ្សែ ប្រវែងសរុប ២០.០១៦គីឡូម៉ែត្រ។

សូមជម្រាបថា រាជរដ្ឋាភិបាលកម្ពុជា បានដាក់ចេញនូវផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដែលកំណត់នូវគោលបំណងសំខាន់ៗ រួមមាន៖ (១) ពង្រីក និងធ្វើឱ្យកាន់តែប្រសើរឡើងនូវវិសាលភាពគ្របដណ្តប់ និងសមត្ថភាពនៃប្រព័ន្ធហេដ្ឋារចនាសម្ព័ន្ធដឹកជញ្ជូន, (២) ធ្វើឱ្យប្រសើរឡើងនូវប្រសិទ្ធភាព និងស័ក្ដិសិទ្ធិភាពនៃសេវា និងហេដ្ឋារចនាសម្ព័ន្ធដឹកជញ្ចូន, (៣) ពង្រឹងប្រសិទ្ធភាពសេវា និងចំណាយឡូជីស្ទីក, (៤) ជំរុញ និងលើកកម្ពស់ហេដ្ឋារចនាសម្ព័ន្ធដឹកជញ្ជូន សំដៅគាំទ្រគោលនយោបាយអភិវឌ្ឍន៍ជាតិ៕

អត្ថបទ៖ ចេង ឆហួត