បន្ទាយមានជ័យ៖ កម្លាំងនគរបាលចុះបង្ក្រាបទីតាំង B9 KTV និងក្លឹបកម្សាន្ត ឡាំបូគីនី ឃាត់មនុស្សប្រុសស្រីជិត​ ២០០នាក់ នៅក្រុងប៉ោយប៉ែត ដោយប្រតិបត្តិការចុះបង្ក្រាបនៅវេលា ម៉ោង​ ១ជាងយប់រំលងអាធ្រាតុ ឈានចូលថ្ងៃទី០៥ ខែមេសា ឆ្នាំ២០២៤ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។

ក្នុងប្រតិបត្តិការចុះបង្ក្រាប ខារ៉ាអូខេ យីហោ B9 និងក្លឹបកម្សាន្ត ឡាំបូគីនី​(LAMBORGHINI) ដឹកនាំបញ្ជាផ្ទាល់ដោយ លោក ឧត្តមសេនីយ៍ទោ សិទ្ធិ ឡោះ ស្នងការ នគរបាល ខេត្តបន្ទាយមានជ័យ​ និងមានការសម្របសម្រួលពីលោក កើត វណ្ណារ៉េត ព្រះរាជអាជ្ញា អមសាលាដំបូងខេត្តបន្ទាយមានជ័យ លោកឧត្តមសេនីយ៍ត្រី ធិន ស៊ីនដេត ស្នងការរងទទួលផែនគ្រឿងញៀនកម្លាំងអធិការដ្ឋាននគរបាលក្រុងប៉ោយប៉ែត កម្លាំងប៉ុស្តិ៍ ទាំង៥ រួមទាំងកម្លាំង វរសេនាតូចនគរបាលការពារព្រំដគោក​ ៨៩១​ និង៩១១ផងដែរ។

សមត្ថកិច្ចបានប្រាប់ថា ប្រតិបត្តិការចុះបង្ក្រាបទីតាំងយីហោ B9 KTV នៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត(ទីតាំងថាច់ដោនចាស់)​ ឃាត់ខ្លួនមនុស្សប្រុសស្រីបានជាង​៥០នាក់។ ចំណែកទីតាំងទី២ យីហោ ឡាំបូគីនី ក្លឹប (LAMBORGHINI CLUB) ឃាត់ខ្លួនបានមនុស្សប្រុសស្រី ជាង​ ១២៧នាក់​ ក្នុងនោះខ្មែរ​ ៥៤នាក់​ និងជនបរទេស​ ចំនួន​ ៧៣នាក់​ គ្រឿងញៀនមួយចំនួន​ និងម៉ូតូ រថយន្តរាប់រយគ្រឿងផងដែរ។

សមត្ថកិច្ចបញ្ជាក់ថា​ ការឃាត់ខ្លួនភ្ញៀវ និងបុគ្គលិក ក្នុងក្លឹប​ និងខេធីវីខាង លើនេះ ដើម្បីយកធ្វើតេស្ត រកសារធាតុញៀន បើមានជាប់ពាក់ព័ន្ធ ត្រូវអនុវត្តតាមនីតិវិធី។ ចំណែកអ្នកដែលមិនពាក់ព័ន្ធ ត្រូវឲ្យត្រឡប់មកផ្ទះវិញ៕

អត្ថបទ៖​ ជា​ ថន