គ្រូបង្វឹក លោក Gareth Southgate បានអះអាងថា ក្រុមជម្រើសជាតិអង់គ្លេស បានត្រៀមខ្លួនរួចរាល់ សម្រាប់ព្រឹត្តិការណ៍ UEFA Euro 2024 ។ 

លោក Southgate ថែមទាំងរំពឹងថា អង់គ្លេស នឹងក្លាយជាក្រុមចំណាត់ថ្នាក់លេខ ១ ក្នុងចំណោមការប្រកួត ដែលអ្នកគាំទ្រចូលចិត្តទស្សនាបំផុត។

អង់គ្លេសបានផ្គូផ្គងចូលពូល C ដោយពួកគេបានគេចចេញផុតពីពូលដែលមានក្រុមខ្លាំងៗ។ ក្នុងពូល C នេះមានវត្តមានក្រុមស្លូវ៉េនី, ដាណឺម៉ាក និងស៊ែប។ UEFA Euro 2024 នឹងធ្វើឡើងនៅក្នុងប្រទេសអាល្លឺម៉ង់ ចាប់ពីថ្ងៃទី១៤ ខែមិថុនា ដល់ ថ្ងៃទី១៤ ខែកក្កដា ឆ្នាំក្រោយ។ 

លោក Southgate ដែលបានចូលកាន់តំណែងតាំងពីឆ្នាំ ២០១៦ បានជួយក្រុមអង់គ្លេសឡើងវគ្គពាក់កណ្តាលផ្តាច់ព្រ័ត្រ World Cup 2018 និងវគ្គផ្តាច់ព្រ័ត្រ Euro 2020 ដោយ កាលនោះ អង់គ្លេសជាក្រុមជើងឯករង ក្រោយចាញ់អ៊ីតាលីដោយការស៊ុតបាល់កាត់សេចក្តី ១១ម៉ែត្រ។  

អង់គ្លេសបានឆ្លងកាត់ពីវគ្គជម្រុះមកដោយលទ្ធផលមិនដែលចាញ់ការប្រកួតម្តងឡើយ អំឡុងឆ្នាំ២០២៣នេះ។ ជាមួយលទ្ធផលដ៏ល្អ បានធ្វើឱ្យលោក Southgate មានទំនុកចិត្តខ្លាំងសម្រាប់ការប្រជែងនៅជុំផ្តាច់ព្រ័ត្រព្រឹត្តិការណ៍ Euro 2024។ 

លោក Southgate បាននិយាយប្រាប់ដូច្នេះថា៖ “ពួកគេធ្លាប់បានលេងការប្រកួតធំៗ និងបានបញ្ចេញនូវសមត្ថភាពយ៉ាងខ្លាំង ពួកគេបានលេងការប្រកួតធំៗរួមគ្នា ដូច្នេះយើងរីករាយក្នុងការសម្លឹងមើល ចំពោះការប្រកួតដែលនឹងមកដល់ខាងមុខ។ យើងមានអារម្មណ៍ថាក្រុមកំពុងតែកសាងនូវទម្រង់លេងដ៏ល្អ ហើយអង់គ្លេសនឹងប្រកួតជាមួយកីឡាករវ័យក្មេង មានសមត្ថភាពខ្លាំងៗ។” 

បច្ចុប្បន្ន ក្រុមបាល់ទាត់ជម្រើសជាតិអង់គ្លេសមាន ខ្សែប្រយុទ្ធ Harry Kane ដែលជាប្រធានក្រុមកំពុងតែមានទម្រង់លេងល្អខ្លាំង ក្រោយរូបគេផ្លាស់ទៅកាន់ Bayern Munich រួមទាំងការចូលរួមចំណែកយ៉ាងអស្ចារ្យពីខ្សែបម្រើ Jude Bellingham ដែលកំពុងឡើងជើងខ្លាំងនៅ Real Madrid បានរួមគ្នាជំរុញទម្រង់លេងសម្រាប់ក្រុមជម្រើសជាតិអង់គ្លេស៕