បាត់ដំបង៖ អភិបាលរងខេត្តនិងជាសមាជិកគណៈកម្មាធិការសាខាកាកបាទក្រហមកម្ពុជាខេត្តបាត់ដំបងលោក ផេង សិទ្ធី បានធ្វើការអំពាវនាវដល់ប្រជាពលរដ្ឋទូទៅ សូមចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន ដើម្បីរួមគ្នាទប់ស្កាត់អត្រាគ្រោះថ្នាក់ចរាចរណ៍នៅក្នុងប្រទេសកម្ពុជាយើងឱ្យបានជាអតិបរមា ទាំងក្នុងពេល និងក្រោយពេលពិធីបុណ្យភ្ជុំបិណ្ឌ ។

ថ្លែងសារអំពាវនាវនេះធ្វើឡើងក្នុងពេលដែលសាខាកាកបាទក្រហមកម្ពុជា ខេត្តបាត់ដំបង ក្រោមកិច្ចសហការជាមួយគណៈកម្មាធិការសុវត្ថិភាពចរាចរណ៍ផ្លូវគោកខេត្ត មន្ទីរសាធារណ:ការនិងដឹកជញ្ជូនខេត្ត ការិយាល័យចរាចណ៍ផ្លូវគោកនៃស្នងការដ្ឋាននគរបាលខេត្ត និងក្រុមការងារយុវជនស្ម័គ្រចិត្តកាកបាទក្រហមកម្ពុជាខេត្តបាត់ដំបង នៅថ្ងៃទី១០ ខែតុលា ឆ្នាំ២០២៣នេះ បានរួមគ្នាបើកយុទ្ធនាការលើកកម្ពស់សុវត្ថិភាពចរាចរណ៍ផ្លូវគោក និងបរិយាបន្ន ក្នុងឱកាសពិធីបុណ្យកាន់បិណ្ឌ និងបុណ្យភ្ជុំបិណ្ឌ ដោយមានការចូលរួមពី លោក ព្រួញ រិទ្ធថា ប្រធានមន្ទីរសាធារណ:ការនិងដឹកជញ្ជូនខេត្តបាត់ដំបង តំណាងស្នងការដ្ឋាននគរបាលខេត្ត និងអ្នកពាក់ព័ន្ធជាច្រើនទៀត ដែលយុទ្ធនាការនេះបានធ្វើឡើងនៅផ្លូវវាងក្រុង ស្ថិតនៅចំណុចស្តុបបាណន់នៃសង្កាត់វត្តគរ ក្រុង និងខេត្តបាត់ដំបង ក្នុងគោលបំណងធ្វើការផ្សព្វផ្សាយបន្ថែមដល់ប្រជាពលរដ្ឋនៅតាមដងផ្លូវឱ្យចូលរួមគោរពច្បាប់ចរាចរណ៍ទាំងអស់គ្នា ជាពិសេសនៅក្នុងរដូវបុណ្យកាន់បិណ្ឌនិងបុណ្យភ្ជុំបិណ្ឌនេះ ។

លោក ផេង សិទ្ធី បានបញ្ជាក់ថា គ្រោះថ្នាក់ចរាចរណ៍ផ្លូវគោក បាននិងកំពុងគំរាមកំហែងដល់អ្នកប្រើប្រាស់ផ្លូវ បង្កឱ្យមានសោកនាដកម្មបាត់បង់ជីវិត រងរបួស និងខូចខាតទ្រព្យសម្បត្តិជារៀងរាល់ថ្ងៃ និងនៅតែមានកំណើនខ្ពស់ ជាពិសេសក្នុងពេលមានពីធីបុណ្យនានាធ្វើឲ្យមានកំណើនចរាចរណ៍មមាញឹកខ្លាំង ដោយការបើកបរមិនគោរពច្បាប់ ការធ្វេសប្រហែសឬខ្វះការយោគយល់អធ្យាស្រ័យឱ្យគ្នាទៅវិញទៅមក កត្តានេះហើយទើបឱ្យមានការបើកយុទ្ធនាការនេះឡើង ដើម្បីជាការពញ្ញាក់ស្មារតីរបស់អ្នកប្រើប្រាស់ដងផ្លូវទាំងអស់ សូមមេត្តាខិតខំយកចិត្តទុកដាក់បង្កើនស្មារតីចូលរួមបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ដើម្បីខ្លួនឯង និងគ្រួសារចៀសផុតពីគ្រោះថ្នាក់ចរាចរណ៍ ។

ក្នុងនាមរដ្ឋបាលខេត្ត ក៏ដូចជាគណៈកម្មាធិការសុវត្ថិភាពចរាចរណ៍ផ្លូវគោកខេត្តបាត់ដំបង លោក ផេង សិទ្ធី បានបញ្ជាក់ថា ដើម្បីចៀសវាងពីការប្រឈមចំពោះផ្លូវច្បាប់ សូមប្រជាពលរដ្ឋទាំងអស់គោរពអនុវត្តច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្លួន ដើម្បីការពារអាយុជីវិតខ្លួនឯងផ្ទាល់ ដើម្បីភាពសុខដុមរម្យនា ក្នុងក្រុមគ្រួសារ ដើម្បីការពារទ្រព្យសម្បត្តិរបស់ខ្លួន និងដើម្បីរួមគ្នាលើកកម្ពស់កិត្តិយសនិងសេចក្តីថ្លៃថ្នូររបស់ប្រទេសជាតិយើង ដើម្បីនាំមកនូវសុវត្ថិភាពនិងសេចក្តីសុខសប្បាយរីករាយជាមួយក្រុមគ្រួសារក្នុងឱកាសប្រារព្ធពិធីបុណ្យកាន់បិណ្ឌនិងបុណ្យភ្ជុំបិណ្ឌប្រពៃណីជាតិ កុំឱ្យថ្ងៃសប្បាយ ក្លាយជាថ្ងៃកើតទុក្ខ ហើយត្រូវចងចាំថា ការគោរពច្បាប់ចរាចរណ៍ គឺគោរពជីវិតខ្លួនឯង និងជីវិតអ្នកដទៃ ៕

ដោយ៖ គួយ គឹមស៊ន