សម្តេចកិត្តិព្រឹទ្ធបណ្ឌិត សម្រេចផ្តល់ប្រាក់កម្ចីខ្នាតតូចគ្មានការប្រាក់របស់កាកបាទក្រហមកម្ពុជា ជូនគ្រួសារយុទ្ធជន និងអតីតយុទ្ធជនពិការចំនួន ១១គ្រួសារ រស់នៅលេីដីសម្បទាន ខេត្តឧត្តរមានជ័យ
(ឧត្តរមានជ័យ) ៖ នៅថ្ងៃសុក្រ ទី ១៦ ខែសីហា ឆ្នាំ២០១៩ នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចផ្តល់ប្រាក់កម្ចីខ្នាតតូចគ្មានការប្រាក់របស់កាកបាទក្រហមកម្ពុជា ជូនដល់គ្រួសារយុទ្ធជន និងអតីតយុទ្ធជនពិការចំនួន ១១គ្រួសារ (គ្រួសារនីមួយៗទទួលថវិកា ១លានរៀល) រស់នៅលេីដីសម្បទាន ក្នុងចំណុចអូរអំបិល ភូមិអូរអំបិល ឃុំអន្លង់វែង ស្រុកអន្លង់វែង ខេត្តឧត្តរមានជ័យ ដេីម្បីប្រកបមុខរបរបង្កបង្កេីនផល ប្រកបអាជីវកម្មខ្នាតតូច និងចិញ្ចឹមសត្វ។ បន្ថែមពីនេះ គ្រួសារនីមួយៗនៅទទួលបាន កង់ ១គ្រឿង សម្ភារសិក្សាមួយចំនួន សម្រាប់កូនៗបានសិក្សារៀនសូត្រទៀតផង។
ក្នុងឱកាសចុះសួរសុខទុក្ខនិងផ្តល់ប្រាក់កម្ចីនោះ លោកជំទាវ ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញេីសួរសុខទុក្ខ ការគិតគូរពីជីវភាពរស់នៅ និងសុខុមាលភាពរបស់ប្រជាពលរដ្ឋ ការថែទាំសុខភាព អនាម័យ ពិសាទឹកដាំឆ្អិន និងរស់នៅក្នុងបរិស្ថានស្អាត ជាពិសេសលេីកទឹកចិត្តដល់គ្រួសារយុទ្ធជនទាំងអស់ឱ្យបន្តខិតខំពង្រីកមុខរបរដេីម្បីលេីកស្ទួយជីវភាពគ្រួសារឱ្យកាន់តែប្រសេីរឡេីង។ ជាមួយគ្នានេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្តាំផ្ញេីនូវការកោតសរសេីរដល់ យុទ្ធជនជួរមុខទាំងអស់ដែលបានលះបង់ពេលវេលាក្នុងការរស់នៅជួបជុំក្រុមគ្រួសារទៅបម្រេីជាតិមាតុភូមិ រីឯភរិយារស់នៅផ្ទះខិតខំប្រកបរបរ និងពង្រីកមុខរបរចិញ្ចឹមកូនដេីម្បីអនាគតរុងរឿង។ ទន្ទឹមនឹងនេះ សូមផ្តាំផ្ញេីដល់ក្មួយៗចៅៗទាំងអស់ ត្រូវខិតខំសិក្សារៀនសូត្រឱ្យមានចំណេះដឹងខ្ពង់ខ្ពស់ មានសមត្ថភាពអាចបំពេញការងារបានល្អក្នុងសង្គម មានអនាគតភ្លឺស្វាង និងជួយដល់ជីវភាពគ្រួសារ។
គ្រួសារយុទ្ធជនទាំងអស់ បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែគិតគូរពីសុខទុក្ខ និងការរស់នៅរបស់ប្រជាពលរដ្ឋ និងសូមខិតខំប្រកបរបរចិញ្ចឹមជីវិត ដេីម្បីរួមចំណែកជំរុញកំណេីនសេដ្ឋកិច្ចរបស់ប្រទេសជាតិដែលមានសុខសន្តិភាព ស្ថិរភាព និងអភិវឌ្ឍនភាព ជាពិសេសក្នុងភូមិថ្មីនេះ ដែលនឹងក្លាយជាសហគមន៍ដែលមានការអភិវឌ្ឍគ្រប់ផ្នែកនាពេលខាងមុខ។
សូមបញ្ជាក់ថា សម្រាប់ខេត្តឧត្តរមានជ័យ ចាប់តាំងពីឆ្នាំ២០០៥ ដល់ឆ្នាំ២០១៩នេះ កាកបាទក្រហមកម្ពុជា បានផ្តល់ប្រាក់កម្ចីខ្នាតតូចគ្មានការប្រាក់ ជូនដល់ប្រជាពលរដ្ឋសរុបចំនួន ៥៤៤គ្រួសារ (ក្នុងនោះ គ្រួសារពិការ ៩៧គ្រួសារ) ដែលរស់នៅស្រុកអន្លង់វែង ក្រុងសំរោង និងស្រុកបន្ទាយអំពិល ដែលប្រាក់កម្ចីនេះ បាននិងកំពុងជួយកាត់បន្ថយការរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម និងបង្កេីនជីវភាពរស់នៅឱ្យល្អប្រសេីរឡេីង តាមរយៈការប្រកបរបរដាំដំណាំ ចិញ្ចឹមសត្វ លក់គ្រឿងទេស កាត់ដេរ អ៊ុតសក់ ជួសជុលកង់ម៉ូតូ។ល។
បច្ចុប្បន្ននេះ ប្រាក់កម្ចីខ្នាតតូចគ្មានការប្រាក់កាកបាទក្រហមកម្ពុជា បាននិងកំពុងអនុវត្តនៅតាមស្រុកគោលដៅចំនួន ១២ ក្នុងខេត្តព្រះវិហារ ឧត្តរមានជ័យ បន្ទាយមានជ័យ ពោធិ៍សាត់ និងខេត្តកណ្តាល៕