នូវែលសេឡង់៖​ ប្រទេសនូវែលសេឡង់បានអះអាងថា ខ្លួននឹងហាមឃាត់ TikTok នៅលើឧបករណ៍ដែលមានសិទ្ធិចូលប្រើនៅក្នុងបណ្តាញសភារបស់ប្រទេស ដោយសារតែការព្រួយបារម្ភអំពីសន្តិសុខអ៊ីនធឺណិតដែលក្លាយជាប្រទេសមួយទៀត​ ក្នុងការកំណត់ការប្រើប្រាស់កម្មវិធីចែករំលែកវីដេអូនៅលើឧបករណ៍ដែលទាក់ទងនឹងរដ្ឋាភិបាល។

ក្តីបារម្ភបានកើនឡើងជាសកលអំពីសក្តានុពលសម្រាប់រដ្ឋាភិបាលចិន ក្នុងការចូលទៅកាន់ទីតាំងរបស់អ្នកប្រើប្រាស់ និងទិន្នន័យទំនាក់ទំនងតាមរយៈក្រុមហ៊ុន ByteDance ដែលជាក្រុមហ៊ុនមេរបស់ TikTok របស់ចិន។

ជម្រៅនៃក្តីបារម្ភទាំងនោះត្រូវបានគូសបញ្ជាក់នៅសប្តាហ៍នេះ នៅពេលដែលរដ្ឋបាល លោក បៃឌិន ទាមទារឱ្យម្ចាស់ក្រុមហ៊ុន TikTok របស់ចិនដកភាគហ៊ុនរបស់ពួកគេ ឬកម្មវិធី​ ព្រោះអាចប្រឈមនឹងការហាមឃាត់ពីសហរដ្ឋអាមេរិក។

នៅក្នុងប្រទេសនូវែលសេឡង់ TikTok នឹងត្រូវបានហាមឃាត់លើឧបករណ៍ទាំងអស់ដែលមានសិទ្ធិចូលប្រើបណ្តាញរបស់សភានៅចុងខែមីនានេះ។

លោក Rafael Gonzalez-Montero នាយកប្រតិបត្តិសេវាសភា បានប្រាប់ទីភ្នាក់ងារសារព័ត៌មាន Reuters ថា ការសម្រេចចិត្តនេះត្រូវបានធ្វើឡើងបន្ទាប់ពីដំបូន្មានពីអ្នកជំនាញសន្តិសុខអ៊ីនធឺណិត និងការពិភាក្សានៅក្នុងរដ្ឋាភិបាល និងជាមួយប្រទេសដទៃទៀត។

លោកបាននិយាយថា ផ្អែកលើព័ត៌មាននេះ សេវាកម្មបានកំណត់ថា​ ហានិភ័យមិនអាចទទួលយកបាននៅក្នុងបរិយាកាសសភានូវែលសេឡង់នាពេលបច្ចុប្បន្ន។

សូមរំលឹកថា ចក្រភពអង់គ្លេសកាលពីថ្ងៃព្រហស្បតិ៍ បានហាមឃាត់កម្មវិធីនៅលើទូរស័ព្ទរបស់រដ្ឋាភិបាលដោយមានប្រសិទ្ធិភាពភ្លាមៗ។ ខណៈទីភ្នាក់ងាររដ្ឋាភិបាលនៅសហរដ្ឋអាម៉េរិក ទុកពេលរហូតដល់ចុងខែមីនានេះ ដើម្បីលុបកម្មវិធី Tik Tok ចេញពីឧបករណ៍ផ្លូវការ។

ក្រុមហ៊ុន TikTok បាននិយាយថា ខ្លួនជឿថាការហាមប្រាមនាពេលថ្មីៗនេះគឺផ្អែកលើ "ការយល់ខុសជាមូលដ្ឋាន និងជំរុញដោយភូមិសាស្ត្រនយោបាយកាន់តែទូលំទូលាយ ខណៈខ្លួន បានចំណាយច្រើនជាង ១,៥ពាន់លានដុល្លារ លើកិច្ចខិតខំប្រឹងប្រែងសុវត្ថិភាពទិន្នន័យយ៉ាងហ្មតចត់ និងច្រានចោលការចោទប្រកាន់ពាក់ព័ន្ធករណីចារកម្មនេះ។

យ៉ាងណាក៏ដោយ រដ្ឋាភិបាលទីក្រុងប៉េកាំង ទាមទារឲ្យវ៉ាស៊ីនតោនឈប់រករឿង និងដាក់សម្ពាធលើកម្មវិធី TikTok របស់ក្រុមហ៊ុនចិន ByteDance។

នៅក្នុងសន្និសីទកាសែត កាលពីថ្ងៃព្រហស្បតិ៍ម្សិលមិញនេះ អ្នកនាំពាក្យរបស់ក្រសួងការបរទេសចិន លោក Wang Wenbin និយាយថា រហូតមកដល់ពេលនេះ អាមេរិកនៅតែមិនទាន់បង្ហាញភស្តុតាងដែលថា កម្មវិធី TikTok គំរាមកំហែងសន្តិសុខជាតិអាម៉េរិក។ សម្រាប់មន្រ្តីចិន ប្រទេសមួយចំនួនមិនគួរយកបញ្ហាសន្តិសុខទិន្នន័យទៅប្រើជាឧបករណ៍សម្រាប់ពង្រីក Concept សន្តិសុខជាតិ ក្នុងគោលដៅ រំលោភអំណាច និងសង្កត់សង្កិនក្រុមហ៊ុនរបស់ប្រទេសដទៃ។
តាមការបញ្ជាក់ពីក្រុមហ៊ុន TikTok មានមនុស្សជាង ១ពាន់លាននាក់ នៅក្នុងពិភពលោកប្រើប្រាស់កម្មវិធី TikTok ដែលនៅក្នុងនោះ ១០០លាននាក់ រស់នៅទឹកដីអាម៉េរិក៕