ភ្នំពេញ៖ រាជរដ្ឋាភិបាលកម្ពុជា តាមរយៈក្រសួងសាធារណការ និងដឹកជញ្ជូន គ្រោងនឹងចំ ណាយ ៥៥០លានដុល្លារអាមេរិក នៅឆ្នាំ ២០២៣នេះ សម្រាប់អភិវឌ្ឍន៍លើគម្រោងហេដ្ឋារចនាសម្ព័ន្ធរូបវ័ន្ត នៅក្នុងប្រទេស ដើម្បីគាំទ្រដល់កំណើនសេដ្ឋកិច្ច កាត់បន្ថយការកកស្ទះចរាចរណ៍ សម្រួលដល់ការធ្វើដំណើររបស់ប្រជាពលរដ្ឋ និងការដឹកជញ្ជូនទំនិញ។ នេះបើយោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ។

របាយការណ៍បញ្ជាក់ថា វិស័យហេដ្ឋារចនាសម្ព័ន្ធរូបវ័ន្តចំនួន ៦គម្រោង គឺ៖ គម្រោងសាងសង់ស្ពានទន្លេបាសាក់ (ចាក់អង្រែក្រោម-ព្រែកប្រា), គម្រោងលើកកម្រិតកំណាត់ផ្លូវជាតិលេខ ៣ (គ.ម.លេខ ១៨១+១០០វាលរេញ), គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់ផ្លូវជាតិលេខ ៥ (ជំហានទី២), គម្រោងធ្វើឲ្យប្រសើរឡើងនូវកំណាត់ផ្លូវជាតិលេខ ៥ ពីធ្លាម្អម ខេត្តពោធិ៍សាត់-ក្រុងបាត់ដំបង និងពីក្រុងសិរី-សោភ័ណ-ក្រុងប៉ោយប៉ែត (កញ្ចប់ឥណទានទី៣), គម្រោងកែលម្អការតភ្ជាប់ជនបទ និងគម្រោងកែលម្អការតភ្ជាប់ជនបទភូមិភាគឦសាន។

តាមក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា នៅឆ្នាំ ២០២៣នេះ រាជរដ្ឋាភិបាល គ្រោងបង្កើនបញ្ចប់ថវិកាចំណាយរបស់ជាតិឲ្យដល់ ៩,៦ពាន់លានដុល្លារអាមេរិក កើនឡើង ១៣% បើធៀបនឹងច្បាប់ថវិកាជាតិឆ្នាំ ២០២២។

រាជរដ្ឋាភិបាលកម្ពុជា មានគម្រោងការអភិវឌ្ឍន៍ផែនការមេភស្តុភារកម្ម នៅទូទាំងប្រទេសប្រ មាណ ៣៣២គម្រោង ជាមួយនឹងទឹកប្រាក់វិនិយោគប្រមាណ ៤៨ពាន់លានដុល្លារអាមេរិក៕