ភ្នំពេញ៖ កំណាត់ផ្លូវលេខ២០អា ត្រូវបានអាជ្ញាធររាជធានីភ្នំពេញសម្រេចបិតផ្លួវបណ្តោះអាសន្ន មិនឱ្យរថយន្តធំធ្វើចរាចរណ៍ឆ្លងកាត់ទេ ខណៈដែលកម្រិតទឹកស្ទឹងព្រែកត្នោបានហក់ឡើងបណ្ដាលឲ្យជន់លិចលំនៅដ្ឋានប្រជាពលរដ្ឋមួយចំនួនធំ និងរងលិចលង់ រហូតត្រូវចាកចេញទៅរកទីទួលសុវត្ថិភាព ប្រក់តង់ស្នាក់នៅជាបណ្ដោះអាសន្ន។

ដើម្បីទប់ស្កាត់នូវគ្រោះអាក្រក់នេះ លោក ឃួង​ ស្រេង​ អភិបាលរាជធានីភ្នំពេញ នារសៀល​ថ្ងៃ​ទី​១៥ ខែ​មករា ឆ្នាំ​២០២៣ បានបាន​ដឹកនាំ​មន្ត្រី​ជំនាញ​ចុះពិនិត្យ​ស្ថានភាព​ជាក់ស្ដែង​នៅ​តាមទីតាំងដែលទឹកជំនន់ទឹកភ្លៀងបានហូរចូលលំនៅដ្ឋានប្រជាពលរដ្ឋក្នុង​ខណ្ឌ​ដង្កោ​។ បញ្ហានេះលោកបាន​ណែនាំ​ឱ្យបន្ថែម​កម្លាំង​ទប់ទឹក​នៅ​តាម​សណ្តរស្ទឹងព្រែកត្នោត​ និង​តម្រូវ​អឱ្យផ្អាក​ការធ្វេី​ចរាចរណ៍​បណ្តោះអាសន្តរថយន្តធំនៅផ្លូវ​មុខ​សាលាសង្កាត់គងនយ។ ក្រៅពីនេះបានណែនាំឱ្យមន្រ្តីក្រសួងធនធានទឹក និងឧតុនិយម ព្រមទាំងអាជ្ញាធរខណ្ឌដង្កោ រួមទាំងកម្លាំនគរបាលខណ្ឌ កងរាជអាវុធហត្ថខណ្ឌ កងកម្លាំងប្រដាប់អាវុធនានា បានប្រចាំការតាមដានស្ថានភាពទឹកជាប់ជាប្រចាំ។ មិនតែប៉ុណ្ណោះបានច្រកដីខ្សាច់ទប់ទឹកដែលកំពុងហៀរចេញពីស្ទឹងមកលើផ្លូវប្របមាត់ស្ទឹង បើគ្មានការទប់ទេនោះទឹកនឹងហូរផ្ដាច់ផ្លូវលិចតំបន់ក្នុងសណ្ដរស្ទឹង ព្រមទាំងគំរាមកំហែងដល់ផ្លូវទំនប់សណ្ដរស្ទឹង។ ដូចនេះត្រូវខិតខំ​យកចិត្ត​ទុកដាក់​ និង​តាម​ដាន​ឱ្យបាន​ជាប់​ជា​ប្រចាំ​ ជាពិសេស​ត្រូវ​បន្ថែម​កម្លាំង​រួមជាមួយបាវ​ និង​ខ្សាច់​ សម្រុកទប់ឱ្យបានកុំឱ្យមានទឹកហូរចេញយប់នេះ ព្រោះ​បេីទប់យប់នេះបាន នឹងមិនមានលិចឡេីយ​ ដោយជំនន់​ទឹក​ភ្លៀង​នៅ​កំពង់​ស្ពឺ​បានចាប់ផ្តេីមស្រកហេីយ។

យោងតាមការឱ្យដឹងពីប្រជាពលរដ្ឋ បាននិយាយថា ទឹកបានចាប់ផ្ដើមឡើងខ្លាំងនៅថ្ងៃទី១២ ខែមករា ប៉ុន្តែមិនបានឡើងពេញប្រៀបស្ទឹងភ្លាមៗនោះឡើយ រហូតមកដល់វេលាយប់រំលងអាធ្រាត្រឈានចូលថ្ងៃទី១៤ ខែមករា ស្រាប់តែឡើងយ៉ាងគំហុកពេញច្រាំង និងហៀរចូលលិចលំនៅដ្ឋានពួកគាត់យ៉ាងឆាប់រហ័ស។

លោក​ ម៉ៅ​ ប៊ុន​ធឿន​ ប្រធាន​មន្ទីរ​ធនធាន​ទឹក​ និង​ឧតុនិយម​រាជធានីភ្នំពេញ បានឱ្យដឹងថា​ ស្ថានភាព​ជំនន់​នៅ​កំពង់​ស្ពឺ  បាន​ស្រកហេីយ​ រាជធានីភ្នំពេញ​ អាចស្រកនៅល្ងាចនេះ  ឬស្អែក​ ដែលទឹកមិនអាច​គម្រាម​កំហែង​រាជធានីភ្នំពេញ​បានឡេីយ។ គ្រោះធម្មជាតិនេះបានធ្វើឱ្យផ្ទះប្រជាពលរដ្ឋ ជាង១ពាន់ខ្នងផ្ទះមាន ២៥ភូមិ​ ស្មេីនឹង ១០សង្កាត់ នៅខណ្ឌដង្កោ រាជធានីភ្នំពេញ ត្រូវចាកចេញឡើងគោករកកន្លែងសុវត្ថិភាព ដោយសង់ខ្ទមប្រក់តង់ស្នាក់នៅបណ្ដោះអាសន្ន៕

ដោយ៖ គន្ធ តារាវិឆ័យ