ភ្នំពេញ ៖ នាយករដ្ឋមន្ត្រីឥណ្ឌា លោក នរិន្ទត្រា ម៉ូឌី នារសៀលថ្ងៃទី១៨ ខែឧសភា ឆ្នាំ២០២២នេះ បានប្រកាសថា ឥណ្ឌានឹងផ្ដល់ឥណទាន ចំនួន១ពាន់លានដុល្លារអាមេរិក ដល់កម្ពុជា សម្រាប់ប្រើប្រាស់ក្នុងគម្រោងតភ្ជាប់ផ្លូវល្បឿនលឿន (Highway) ត្រីភាគី (ឥណ្ឌា មីយ៉ាន់ម៉ា ថៃ) ដែលជាការតភ្ជាប់ដ៏សំខាន់មកកម្ពុជា។ នេះជាការបញ្ជាក់របស់លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានប្រាប់អ្នកសារព័ត៌មាន នៅក្រោយជំនួបពិភាក្សាការងារ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាមួយនាយករដ្ឋមន្រ្តីឥណ្ឌា តាមរយៈប្រព័ន្ធទូរស័ព្ទ ពីភូមិគ្រឹះក្រុងតាខ្មៅ ខេត្តកណ្តាល។
លោកនាយករដ្ឋមន្ត្រីឥណ្ឌា នរិន្ទត្រា ម៉ូឌី ការតភ្ជាប់ផ្លូវមកកាន់កម្ពុជានេះ នេះជាការសមស្របជាមួយនឹងផែនការមេរបស់អាស៊ាន ទៅលើផែនការនៃការតភ្ជាប់។ សម្តេចតេជោនាយករដ្ឋមន្ត្រី ហ៊ុន សែន បានប្រកាសស្វាគមន៍ ចំពោះការអនុវត្តន៍គម្រោងផ្លូវល្បឿនលឿនត្រីភាគី ឥណ្ឌា មីយ៉ាន់ម៉ា ថៃ និងការពង្រីកមកកាន់ប្រទេសកម្ពុជា ឡាវ និងវៀតណាម។
សម្តេចតេជោ ក្នុងជំនួបនេះ បានគូសបញ្ជាក់អំពីការបង្កើតទំនាក់ទំនងការទូតឡើងវិញ រវាងកម្ពុជា និងឥណ្ឌា តាំងពី១៩៨១ ក្រោយអាក់ខានមួយរយៈ ដោយសារសង្គ្រាម។ ឥណ្ឌា គឺជាប្រទេសលទ្ធិប្រជាធិបតេយ្យទីមួយ ពិភពលោក ដែលប្រកាសទទួលស្គាល់កម្ពុជា និងបង្កើតទំនាក់ទំនងការទូតជាមួយនឹងកម្ពុជា។ គិតមកដល់ពេលនេះ កម្ពុជានិងឥណ្ឌាមានទំនាក់ទំនងជាមួយគ្នា ជាង៧០ឆ្នាំមកហើយ ដែលប្រទេសទាំងពីរបានឯកភាពគ្នា នៅក្នុងការប្រារព្ធខួបលើកទី៧០ ដោយធ្វើសកម្មភាពរួមគ្នា ដើម្បីអបអរសាទរ នៃការភ្ជាប់ទំនាក់ទំនងការទូត ជាមួយគ្នាក្នុងស្មារតី សាមគ្គីភាពនិងកិច្ចសហការរវាងប្រទេស និងប្រជាជននៃទាំងពីរផងដែរ។
លោក នរិន្ទត្រា ម៉ូឌី បានបញ្ជាក់ថា កម្ពុជា និងឥណ្ឌាបានទំនាក់ទំនងជាមួយគ្នា តាំងពីយូរលង់ណាស់មកហើយ ជាពិសេសលើវប្បធម៌ និងអរិយធម៌ ដែលបានឆ្លុះបញ្ចាំងនៅលើប្រាង្គប្រាសាទ របស់កម្ពុជា។ លោកមានមោទនភាព ដែលបានធ្វើការងារជាមួយ នឹងប្រទេសកម្ពុជា នៅក្នុងកិច្ចសហប្រតិបត្តិការទ្វេភាគី និងក្នុងតំបន់។ ជាមួយគ្នានេះ លោកក៏បានអបអរសាទរកម្ពុជា ក្នុងការធ្វើជាប្រធានប្តូរវេនអាស៊ានឆ្នាំ២០២២ នេះ ហើយគោលនយោបាយ ក្នុងការមើលឆ្ពោះទៅទិសខាងកើតរបស់ឥណ្ឌា លោកបានចាត់ ទុកកម្ពុជាជាដៃគូដ៏សំខាន់សម្រាប់ឥណ្ឌា។ សម្ដេចតេជោ បានបញ្ជាក់នូវការគាំទ្រ ចំពោះគោលនយោបាយសម្លឹងទៅទិសខាងកើតរបស់ឥណ្ឌា ដែលស្របគ្នាជាមួយនឹងគោលដៅរបស់អាស៊ាន ដែលបានផ្សារភ្ជាប់ទំនាក់ទំនងឥណ្ឌា ដែលចាត់ទុកឥណ្ឌាជាដៃគូយុទ្ធសាស្ត្រដ៏សំខាន់មួយ។
សម្ដេចតេជោ នាយករដ្ឋមន្ត្រី បានអបអរសាទរប្រទេសឥណ្ឌា តែបានទទួលជោគជ័យ នៅក្នុងការប្រយុទ្ធប្រឆាំងនិងជំងឺកូវីដ-១៩ ពីការឆ្លងច្រើនរហូតមានការឆ្លងតិចតួច មកដល់ពេលនេះ។ សម្តេច អរគុណឥណ្ឌា ដែលបានផ្តល់វ៉ាក់សាំងកូវីសែល ដែលនេះគឺជាការរួមចំណែកដ៏សំខាន់ នៅក្នុងការប្រយុទ្ធប្រឆាំងកូវីដ១៩ នៅក្នុងប្រទេសកម្ពុជា ខណៈប្រជាជនជាង៩៣ភាគរយ បានចាក់វ៉ាក់សាំង និងផ្ដល់លទ្ធភាពឲ្យកម្ពុជា បើកសង្គមសេដ្ឋកិច្ចឡើងវិញ ទូទាំងប្រទេស។ សម្តេចតេជោ បានបញ្ជាក់ថាកម្ពុជា នៅតែបន្តយុទ្ធនាការជាតិចាក់វ៉ាក់សាំងបង្ការកូវីដ-១៩ ដែលជាជំនួយរបស់ប្រទេសឥណ្ឌា និងប្រទេសផ្សេងៗទៀត។
សម្ដេចតេជោ បានបញ្ជាក់ថា ទំនាក់ទំនងកិច្ចសហប្រតិបត្តិការទាំងពីរ បានគ្រប់ដណ្ដប់ទៅលើវិស័យជាច្រើន ដូចជាសេដ្ឋកិច្ច-សង្គម អប់រំ វប្បធម៌ និងការជំរុញទំនាក់ទំនងប្រជាជនទាំងពីរ។ សម្តេចតេជោ អរគុណឥណ្ឌា​ ដែលដែលបានផ្ដល់អណ្តូងទឹក១៥០០ ដល់កម្ពុជា។ សម្ដេចតេជោ បញ្ជាក់ថាទំនាក់ទំនងពាណិជ្ជកម្មទ្វេភាគី មានការធ្លាក់ចុះនៅពេលវិបត្តិកូវីដ ហើយមានការកើនឡើងវិញ នៅឆ្នាំ២០២១ ចំនួន៣០០ លានដុល្លារ។
សម្ដេចតេជោនាយករដ្ឋមន្ត្រី បានស្នើឱ្យជំរុញឲ្យពន្លឿននីតិវិធី និងជំរុញការបញ្ចប់ឲ្យបានឆាប់ នឹងឈានទៅដល់ការចុះកិច្ចព្រមព្រៀង នៃពាណិជ្ជកម្មសេរីទ្វេភាគីកម្ពុជាឥណ្ឌា ឲ្យបានចប់ និងសន្ធិសញ្ញាវិនិយោគរវាងកម្ពុជា និងឥណ្ឌា ដើម្បីឈានទៅដល់ការចុះហត្ថលេខា ឲ្យបានឆាប់រហ័ស។ លើសពីនេះ សម្តេចតេជោ បានស្នើឲ្យមានការហោះហើរ ពីប្រទេសឥណ្ឌា មកកាន់ភ្នំពេញ និងពីឥណ្ឌាទៅកាន់ខេត្តសៀមរាប ដើម្បីជំរុញឲ្យមានការកើនឡើងភ្ញៀវទេសចរ រវាងប្រទេសទាំងពីរ ជាពិសេសគឺទេសចរណ៍ ដែលបានចាក់វ៉ាក់សាំងរួចរាល់។
ចំពោះកិច្ចសហប្រតិបត្តិការពហុភាគី សម្តេចតេជោនាយករដ្ឋមន្ត្រីបានបញ្ជាក់ថា សម្ដេចតេជោរីករាយក្នុងទំនាក់ទំនងដៃគូសន្ទនារវាងអាស៊ាន និងឥណ្ឌា ហើយកម្ពុជាស្វាគមន៍ ចំពោះការកំណត់យកឆ្នាំ២០២២ នេះជាឆ្នាំមិត្តភាពអាស៊ាន-ឥណ្ឌា ដែលបានឯកភាពគ្នា ដោយកិច្ចប្រជុំអាស៊ានឥណ្ឌាលើកទី១៨ នៅឆ្នាំ២០២១កន្លងទៅ និងដើម្បីរំលឹកខួបអនុស្សាវរីយ៍លើកទី ៣០នៃទំនាក់ទំនងដៃគូសន្ទនាអាស៊ាន-ឥណ្ឌា។

សម្តេចតេជោ ក៏អរគុណឥណ្ឌា ដែលបានចូលរួមវិភាគទានចំនួន១លានដុល្លារអាមេរិក ដល់មូលនិធិអាស៊ាន ឆ្លើយតបទៅនឹងកូវីដ-១៩ ជាមួយនឹងការលើកទឹកចិត្តឥណ្ឌា ឲ្យបន្តគាំទ្រប្រព័ន្ធសុខាភិបាលសាធារណៈជាតិរបស់កម្ពុជា និងកសាងសមាសភាព សម្រាប់អ្នកជំនាញសុខាភិបាល។ សម្ដេចតេជោក៏អរគុណ ដែលឥណ្ឌាបានផ្ដល់ជំនួយតាមរយៈគម្រោង ឆ្លើយតបរហ័សនៃកិច្ចសហប្រតិបត្តិការមេគង្គ-គង្គា លើវិស័យកសិកម្ម បរិស្ថាន សុខាភិបាល អប់រំ អភិវឌ្ឍន៍ជនបទ និងលើកកម្ពស់ស្ត្រី និងវប្បធម៌។ ក្នុងន័យនេះ សម្ដេចតេជោបានស្នើឲ្យឥណ្ឌាបន្តការគាំទ្រ សំណើគម្រោងរបស់កម្ពុជា នៅឆ្នាំខាងមុខទៀត។
នាយករដ្ឋមន្ត្រីឥណ្ឌា បានគូសបញ្ជាក់ថា ឥណ្ឌានឹងជំរុញកិច្ចសហប្រតិបត្តិការ លើវិស័យការពារជាតិ ជាមួយកម្ពុជា ហើយលោកចង់ឃើញអាស៊ាន-ឥណ្ឌា ដំឡើងកិច្ចសហប្រតិបត្តិការ ភាពជាដៃគូយុទ្ធសាស្ត្រ ទៅជាដៃគូយុទ្ធសាស្ត្រគ្រប់ ជ្រុងជ្រោយ៕

អត្ថបទ ៖ សន ពិសិដ្ឋ