អត្ថបទ៖ ង៉ុង សាន់

កែប៖ កំពង់ផែទេសចរណ៍កែប-កោះទន្សាយ កំពុងក្លាយជាកន្លែងកម្សាន្តនាពេលល្ងាច របស់បងប្អូនប្រជាពលរដ្ឋ ជាពិសេសភ្ញៀវទេសចរជាតិ និងអន្តរជាតិ ក្នុងការមកគយគន់ទេសភាព​នាពេលថ្ងៃលិច ជាមួយនិងខ្យល់អាកាសដ៏បរិសុទ្ធនៃជំនោរសមុទ្រ។ 

ជាមួយគ្នានេះសម្រាម​បានក្លាយជាបញ្ហាប្រឈមជាបណ្តើរៗហើយ តាមរយៈអ្នកទេសចរខ្លះដែលខ្វះការ​យល់ដឹងលើកត្តាអនាម័យ និងបរិស្ថាន។ 

ភ្ញៀវទេសចរបរទេស​លោក រ៉ូ ជឺ (Roger) បានឲ្យដឹងថា រាល់ល្ងាចលោកចូលចិត្ត​មកអង្គុយលេង នៅទីនេះ ដោយសារតែមានទេសភាពស្អាត នៅទីនេះលោកអាចមើលឃើញ ថ្ងៃលិច ភ្នំ កោះ និងស្រូបយកខ្យល់អាកាសបរិសុទ្ធជាដើម។ 

ជាមួយនឹងភាពស្រស់ស្អាតទាំងនេះ នៅតាមបង្កាន់ដៃនៃកំពង់ផែ និងផ្នែកខ្លះនៃបរិវេណផែ គេឃើញមានសំណល់សំរាមមួយចំនួន ដែលបន្សល់ទុកដោយបងប្អូនអ្នកទេសចរទាំងនោះ ដែលធ្វើឲ្យបរិស្ថាន​ អនាម័យនៅកំពង់ផែស្តង់ដារមួយនេះ កខ្វក់ដោយអន្លើរផងដែរ។ 

លោក ម៉ម ទូច ប្រធានមន្ទីរសាធារណការ និងដឹកជញ្ជូនខេត្តកែប បានឲ្យដឹងថា កំពង់ផែទេសចរណ៍មួយនេះ ក្រោយសម្ពោធដាក់ឲ្យប្រើប្រាស់ជាផ្លូវការ ខាងក្រសួងប្រគល់ការ​មើលថែទាំលើការគ្រប់គ្រងបច្ចេកទេសឲ្យមន្ទីរ ដោយឡែកចំពោះសេវាផ្សេងក្រៅពីនេះ ទាក់ទងហ្នឹងវិស័យឯកជន ដោយសារកំពង់ផែនេះ ត្រូវបានសាលាខេត្តដាក់ដេញថ្លៃភាស៊ី​ប្រចាំឆ្នាំ ឲ្យទៅវិស័យឯកជន។  

លោកបញ្ជាក់ថា ក្នុងនាមមន្ទីរជាអ្នកមើលថែកំពង់ផែមួយនេះ មិនបានអនុញ្ញាតឲ្យមានការដាក់ ធុងសម្រាមនៅលើកំពង់ផែទេ ពោលចាប់ពីចំណុចមាត់ទឹករហូតដល់ចុងផែ ដោយតម្រូវឲ្យដាក់​នៅទីតាំងក្បែរផែនោះ តែយ៉ាងណាចំពោះបញ្ហាសំរាមលោកនឹងធ្វើការណែនាំបន្ថែម​ដល់អ្នកដែលទទួលបានការដេញភាស៊ីនៅទីនោះ។ 

គួរបញ្ជាក់ថា កំពង់ផែទេសចរណ៍ កែប-កោះទន្សាយ ស្ថិតនៅក្រុងកែប ខេត្តកែប ត្រូវបានសម្ពោធបើកឱ្យប្រើប្រាស់ជាផ្លូវការដោយ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន កាលពីថ្ងៃទី១៩ ខែមករា ឆ្នាំ២០២២ កន្លងទៅ ដោយកំពង់ផែមួយនេះ ចំណាយថវិកាជាតិសរុបចំនួន ៤៨៨០លានរៀល ស្មើនឹងប្រមាណ ១,២លានដុល្លារអាមេរិក៕