ក្រសួងសាធារណការ៖ ចាប់បានរថយន្តដឹកលើសទម្ងន់ ១២៣គ្រឿង និងពិន័យជាង ២រយលានរៀល ក្នុងខែមេសា ឆ្នាំ២០១៨
(ភ្នំពេញ) ៖ ក្រសួងសាធារណការនិងដឹកជញ្ជូនបានបង្ហាញរបាយការណ៍ថា ក្នុងខែមេសា ឆ្នាំ២០១៨ លេខាធិការដ្ឋានរបស់ គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ ចាប់បានរថយន្តដឹកទំនិញលើសទម្ងន់កម្រិតកំណត់ ចំនួន ១២៣គ្រឿង និងពិន័យបានថវិកាសរុបចំនួន ២៣៣,៣៤០,០០០ រៀល។
ក្រសួងសាធារណការសង្កេតឃើញថា ចំនួនរថយន្ត ដែលចាប់បានទាំងនេះ មានការថយចុះចំនួន ១១៧ គ្រឿង គឺពី ២៤០ គ្រឿង ក្នុងខែមីនា មក ១២៣ គ្រឿង ក្នុងខែមេសា ឆ្នាំ២០១៨ ។ ក្នុងចំណោមរថយន្តដែលចាប់បាននោះ ផ្ទុកលើសទម្ងន់ចាប់ពី ៥តោន រហូតដល់ ៤០តោន ។
ជាមួយគ្នានេះ ក្រសួងសាធារណការបានកោតសរសើរដល់ក្រុមការងារជញ្ជីងចល័តរបស់ក្រសួង និងស្ថានីយជញ្ជីងទាំងអស់ដែលតាមដាននឹងអនុវត្ត ទប់ស្កាត់ការដឹកជញ្ជូនលើសទម្ងន់កម្រិតកំណត់កន្លងមក ៕
អត្ថបទ ៖អោម ចែតច័ន្ទណារ៉ា