ព័ត៌មានជាតិ

ទូតចិន ៖ ភាគីចិន នឹងបន្ដធានាសុវត្ថិភាព និងសុខភាព ជូនដល់បងប្អូនកម្ពុជា ដែលកំពុងស្នាក់នៅប្រទេសចិន

image

យោងតាមសារព័ត៌មាន HUA SHANG Daily ចុះផ្សាយថា បច្ចុប្បន្ននេះមាននិស្សិតកម្ពុជា៣រូប កំពុងនៅក្នុងទីក្រុងអ៊ូហាន់ ប្រទេសចិន ដោយពួកគេមានសុខភាពល្អ និងសុវត្ថិភាព។

រដ្ឋាភិបាលចិន បានផ្ដល់ការមើលថែយ៉ាងយកចិត្តទុកដាក់បំផុត ដល់ពួកគេទាំងអស់គ្នា ហើយអ្វីៗគ្រប់យ៉ាងគឺមានសភាពធម្មតាទាំងអស់ សូមសមាជិកគ្រួសាររបស់ពួកគាត់ កុំមានការព្រួយបារម្ភ។ នេះបើតាមផេកហ្វេសប៊ុកផ្លូវការរបស់ស្ថានទូតចិន ប្រចាំនៅកម្ពុជា។

ឯកឧត្ដម Wang Wentian ឯកអគ្គរដ្ឋទូតចិនប្រចាំកម្ពុជា មានប្រសាសន៍ថា ភាគីចិននឹងបន្ដធានាសុវត្ថិភាព និងសុខភាពជូនដល់បងប្អូនកម្ពុជាដែលកំពុងស្នាក់អាស្រ័យនៅក្នុងប្រទេសចិន ហើយនិងផ្ដល់រាល់ការជួយដ៏ចាំបាច់ជូនដល់ពួកគេទាំងអស់គ្នា។

យោងតាមសេចក្តីប្រកាសព័ត៌មានពីក្រសួងការបរទេសកម្ពុជា ចេញផ្សាយនៅថ្ងៃទី៣មករា ឲ្យដឹងថា កន្លងមក រាជរដ្ឋាភិបាលកម្ពុជាបានតាមដានដោយយកចិត្តទុកដាក់ខ្ពស់បំផុត ចំពោះស្ថានការណ៍វិវត្តនៃការរាលដាលជំងឺឆ្លងផ្លូវដង្ហើមកូរ៉ូណានេះ។ ក្រសួងការបរទេស និងសហប្រតិបត្តិការ អន្តរជាតិ និងបណ្តាស្ថានតំណាងរបស់កម្ពុជា នៅសាធារណរដ្ឋប្រជាមានិតចិន បានធ្វើការទាក់ទងយ៉ាងជិតស្និទ្ធជាមួយអាជ្ញាធរ និងក្រសួងការបរទេសចិន ដើម្បីតាមដានបច្ចុប្បន្នភាពនៃសុខុមាលភាពរបស់ពលរដ្ឋខ្មែរ ជាពិសេសនិស្សិតខ្មែរដែលកំពុងសិក្សានៅសាធារណរដ្ឋប្រជាមានិតចិន ។

ទន្ទឹមនឹងការផ្តល់ទំនុកចិត្តលើចំណាត់ការប្រកបដោយការទទួលខុសត្រូវរបស់អាជ្ញាធរចិន ក្រសួងការបរទេស និងសហប្រតិបត្តិការអន្តរជាតិ បានណែនាំឱ្យស្ថានតំណាងព្រះរាជាណា-ចក្រកម្ពុជា ប្រចាំសាធារណរដ្ឋប្រជាមានិតចិន ទាក់ទងជាប្រចាំជាមួយនឹងអាជ្ញាធរពាក់ព័ន្ធរបស់ចិន ដើម្បីផ្ញើជូននិស្សិតខ្មែរនូវគ្រឿងបរិក្ខារអនាម័យចាំបាច់នានា។ ក្រសួងការបរទេស និងសហប្រតិបត្តិការអន្តរជាតិ ក៏បានទទួលការបញ្ជាក់ប្រកបដោយភាពកក់ក្តៅថា សាកលវិទ្យាល័យចិនបានឧបត្ថម្ភស្បៀងនិងសម្ភារៈចាំបាច់នានាដល់និស្សិត  ហើយបានសំណូមពរអោយអនុវត្ត និងគោរពតាមវិធានការបង្ការ និងទប់ស្កាត់ដែលអាជ្ញាធរចិនបានដាក់ចេញ ដើម្បីធានានូវសុវត្ថិភាព និងសុខភាពផ្ទាល់ខ្លួនផង និងសាធារណៈផង។

មកដល់បច្ចុប្បន្ននេះ ពុំមានករណីឆ្លងមេរោគនេះលើពលរដ្ឋខ្មែរទេ។ ក្នុងស្មារតីយកចិត្តទុកដាក់ជួយឧបត្ថម្ភ និងតាមដានសុខុមាលភាពរបស់ពលរដ្ឋយើង         ជាពិសេសនិស្សិតខ្មែរដែលកំពុងស្នាក់នៅ និងសិក្សានៅប្រទេសចិន ក្រសួងការបរទេសនិងសហប្រតិបត្តិការអន្តរជាតិ និងស្ថានតំណាងកម្ពុជា នៅសាធារណរដ្ឋប្រជាមានិតចិន បានបង្កើតបណ្តាញ WeChat ជាមួយនិស្សិតខ្មែរនៅតាមតំបន់នានា នៅប្រទេសចិន ដើម្បីសំរួលដល់ទំនាក់ទំនង និងការផ្តល់ព័ត៌មានបានទាន់ពេលវេលា។ ទន្ទឹមនឹងនេះ ក្រសួងការបរទេសនិងសហប្រតិបត្តិការអន្តរជាតិក៏បានរៀបចំជាប្រព័ន្ធទូរស័ព្ទសំរាប់មាតាបិតាអាណាព្យាបាលនិស្សិតដែលកំពុងស្នាក់អាស្រ័យនៅប្រទេសចិន ដែលចង់បានព័ត៌មានបន្ថែមឬមានចំងល់ទាក់ទងនឹងសុវត្ថិភាព និងសុខភាពនិស្សិត តាមលេខទំនាក់ទំនង ៖ លោក ជ័យ រដ្ឋា  077 575 807 លោក យស សុខេមរិន  012 445 959 និងលោក ហន ឧសភា 089 216 599៕អត្ថបទ ៖ វង សុភ័ក្ត្រ 

ព័ត៌មានទាក់ទង...