គណបក្សប្រជាជនកម្ពុជា បើកសន្និបាតគណៈកម្មាធិការកណ្តាល លើកទី៤២ អាណត្តិទី៥
| ព័ត៌មានជាតិ
SHARE

ភ្នំពេញ៖ សន្និបាតគណៈកម្មាធិការកណ្តាល លើកទី៤២ អាណត្តិទី៥ របស់គណបក្សប្រជាជនកម្ពុជា បានប្រព្រឹត្តិទៅ នៅព្រឹកថ្ងៃទី១ ខែកុម្ភៈ ឆ្នាំ២០២០នេះ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្ស និងសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា។

សម្តេចអគ្គមហាពញាចក្រី ហេង សំរិន នៅក្នុងសន្ទរកថាបើក ​បានមានប្រសាសន៍ថា ផ្អែកតាមគោលការណ៍ គណៈ អចិន្ត្រៃយ៍ នៃគណៈកម្មាធិការកណ្តាល បានសម្រេចកោះប្រជុំសន្និបាត គណៈកម្មាធិការកណ្តាលលើកទី៤២ អាណត្តិទី៥នេះ បន្ទាប់ពីយើងបានអនុវត្តន៍ ដោយជោគជ័យ នូវសេចក្តីសម្រេចចិត្ត របស់សន្និបាតគណៈកម្មាធិការកណ្តាល លើកទី៤១ អាណត្តិទី៥ ដែលបានប្រារព្ធធ្វើ កាលពីចុងខែធ្នូ ឆ្នាំ២០១៨ កន្លងមក។

សម្តេចចក្រី ហេង សំរិន បានបញ្ជាក់ថា យើងទាំងអស់គ្នានៅចាំបានថា តាមរយៈលទ្ធផល នៃការបោះឆ្នោតជាតិ នាខែកក្កដា ឆ្នាំ២០១៨ ក្នុងចំណោមគណបក្សនយោបាយ ចំនួន២០ ដែលបានចូលរួមបោះឆ្នោត គឺមានតែគណបក្សប្រជាជកម្ពុជាមួយប៉ុណ្ណោះ ដែលប្រជាជន បានសម្រេចប្រគល់ ឲ្យដឹកនាំប្រទេស នៅក្នុងបរិបទនៃរបបនយោបាយ ប្រជាធិបតេយ្យ សេរី ពហុបក្ស បន្តទៀត។ សភាពការណ៍នេះ មិនមែនជារឿងថ្មីនោះទេ ប៉ុន្តែធ្លាប់បានកើតមានរួចហើយ នៅក្នុងប្រវត្តិសាស្ត្រកម្ពុជា នាសម័យសង្គមរាស្ត្រ និយម និងសម័យសាធារណរដ្ឋខ្មែរ លន់ នល់ ហើយក៏ធ្លាប់កើតមាននៅក្នុងប្រទេសប្រជាធិបតេយ្យមួយចំនួន នៅលើពិភពលោកនេះដែរ។

សម្តេច ហេង សំរិន បានមានប្រសាសន៍បន្ថែមថា ជាង១ឆ្នាំមកនេះ គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាអគ្គមគ្គុទេសក៍ដ៏ឆ្នើម បានដឹកនាំប្រទេស សម្រេចបានសមិទ្ធផលថ្មីៗធំធេងថែមទៀត ដែលមានជាអាទិ៍ ខឿនឯករាជ្យជាតិ អធិបតេយ្យជាតិ បូរណភាពទឹកដី សន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម និងអំណាចរដ្ឋ ត្រូវបានថែក្សាការពាយ៉ាងរឹងមាំ, ដំណើរការកែទម្រង់រដ្ឋស៊ីជម្រៅ និងទូលំទូលាយត្រូវបានជំរុញអនុវត្តន៍ដោយឆន្ទៈមុតស្រួច និងមានប្រសិទ្ធភាព, កំណើនសេដ្ឋកិច្ចឆ្នាំ ២០១៩ប៉ាន់ប្រមាណ ៧,១% រួមនឹងការបែងចែកផ្លែផ្កា នៃកំណើន ដោយសមធម៌ក្នុងក្របខណ្ឌសង្គមទាំងមូល ដែលធ្វើឲ្យជីវភាពប្រជាជន កាន់តែប្រសើរឡើង ហើយក្នុងនោះខាងសម្ភារៈ និងទាំងសា្មរតីរបស់ប្រជាជន បានបង្កលក្ខណៈ ឲ្យប្រជាជននៅទូទាំងប្រទេស ព្រមទាំងជនជាតិកម្ពុជា រស់នៅបរទេសជាច្រើនកុះករ បានចូលរួមអបអរសាទរយ៉ាងក្លៀវក្លា នៅក្នុងកម្មវិធីបុណ្យជាតិ និងបុណ្យអន្តរជាតិធំៗ ប្រកបដោយក្តីសប្បាយរីរាយជាទីបំផុត។ ​

សម្តេចពាញាចក្រី ហេង សំរិន បានបន្តថា យោងតាមស្ថានការណ៍ពិភពលោក និងតំបន់ដែលបន្តប្រែប្រួល ផ្លាស់ប្តូរឆាប់រហ័ស និងស្មុគស្មាញ និងផ្អែកតាមការប៉ាន់ស្មាន នៃសភាពការណ៍កម្ពុជានាពេលខាងមុខ គណបក្សយើងបានត្រៀមរួចស្រេចហើយ នូវយុទ្ធសាស្ត្រ និងយុទ្ធវិធីនានា ដើម្បីធ្វើឲ្យសម្រេចនូវកម្មវិធីនយោបាយរបស់គណបក្ស ក៏ដូចជាកម្មវិធីនយោបាយរបស់រាជរដ្ឋាភិបាល មួយជំហានថែមទៀត នៅក្នុងឆ្នាំ២០២០នេះ។ លើសពីនេះ ក៏ត្រូវត្រៀមសម្រាប់ការដោះស្រាយនូវរាល់បញ្ហាចៃដន្យ ដែលអាចកើតមាន ពីការអនុវត្តភារកិច្ចរស់យើង និងត្រូវត្រៀមសម្រាប់ការដោះស្រាយ នូវហេតុការណ៍នានា ដែលកើតចេញពីឧបាយកលអាក្រក់ផ្សេងៗ ក្នុងបំណងចង់បំផ្លាញដល់សង្គមជាតិយើង។ ​ សម្តេចចក្រី ហេង សំរិន បានថ្លែងកោតសរសើរ ចំពោះថ្នាក់ដឹកនាំគណៈកម្មាធិការគណបក្ស ក្រុមការងារចុះជួយមូលដ្ឋាន និងអង្គការមហាជនគណបក្សគ្រប់ថ្នាក់ ព្រមទាំងមន្ត្រី និងសមាជិក សមាជិការគណបក្សទាំងអស់ ដែលបានខិតខំប្រឹងប្រែងធ្វើឲ្យសម្រេចរាល់ ភារកិច្ចដែលគណបក្ស និងប្រជាជនប្រគល់ជូន។ អំពើល្អ និងលទ្ធផលការងារល្អរបស់គណបក្ស នឹងទទួលបានការតបស្នង តាមរយៈសន្លឹកឆ្នោត ពីប្រជាជនវិញមិនខានឡើយ។

​សូមជម្រាបថា សន្និបាតនេះ ធ្វើឡើងរយៈពេល២ថ្ងៃ គឺថ្ងៃទី១ និងទី២ ខែកុម្ភៈ ឆ្នាំ២០២០ ដោយមានការចូលរួមពី សមាជិកសមាជិកា គណបក្ស កម្មាធិការកណ្ដាល ​ចំនួន៧៩៨រូប លើរចនាសម្ព័ន្ធនៃបរិមាណរួម៨៦៥រូប។ បន្ថែមលើនេះ អង្គសន្និបាតក៏បានបើកទូលាយ ដោយមានអញ្ជើញឯកឧត្តម លោកជំទាវ លោកលោកស្រី ជាសមាជិកសមាជិការដ្ឋសភា ព្រឹទ្ធសភា រាជរដ្ឋាភិបាល មន្ត្រីជាន់ខ្ពស់មួយចំនួន នៅតាមក្រសួងស្ថាប័ន រាជធានី ខេត្ត ក្រុង ស្រុក ខ័ណ្ឌ អង្គការមហាជន និងក្រុមការងារថ្នាក់កណ្ដាល ចុះជួយរាជធានីខេត្តចូលរួម ដែលធ្វើឲ្យសមត្ថភាព ដែលបានអញ្ជើញសរុប មានចំនួន៣,៤២០រូប៕អត្ថបទ ៖ សន ពិសិដ្ឋ


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation