រដ្ឋាភិបាលនឹងសាងសង់រោងចក្រផលិតទឹកស្អាត ៣បន្ថែមទៀតដើម្បីឆ្លើយតបនឹងតម្រូវការជាក់ស្តែង
| ព័ត៌មានជាតិ
SHARE

ក្រសួងឧស្សាហកម្មនិងសិប្បកម្ម និងក្រសួងសេដ្ឋកិច្ចនិងហិរញ្ញវត្ថុ ជាមួយដៃគូអភិវឌ្ឍ នឹងពង្រីកសមត្ថ ភាពប្រព្រឹត្តកម្មទឹកស្អាតចំនួន ៣បន្ថែមទៀត ដែលគ្រោងនឹងបញ្ជប់ទាំងស្រុងនៅប្រមាណ ២ទៅ៣​ឆ្នាំ ទៀត។

តាមរបាយការណ៍ពីរដ្ឋាករទឹកស្វយ័តក្រុងភ្នំពេញ គម្រោងសាងសង់រោងចក្របាក់ខែងជំហានទី១ ដែលមានសមត្ថភាពផលិត ១៩៥.០០០ម៉ែត្រគូបក្នុងមួយថ្ងៃ នឹងចាប់ផ្តើមក្នុងខែតុលានេះ នឹងគ្រោងបញ្ចប់​ នៅឆ្នាំ ២០២២។

ដោយឡែកគម្រោងសាងសង់រោងចក្របាក់ខែងជំហានទី២ សមត្ថភាព ផលិត ១៩៥.០០០ម៉ែត្រគូបក្នុងមួយថ្ងៃ ចាប់ផ្តើមក្នុងឆ្នាំ ២០២២ និងគ្រោងបញ្ចប់នៅឆ្នាំ​២០២៤។ បន្ថែមលើ នេះរដ្ឋាភិបាលនឹងសាងសង់រោងចក្រមួយទៀតនៅតាខ្មៅ ដែលមានសមត្ថភាព ៣០.០០០ម៉ែត្រគូប ក្នុង មួយថ្ងៃ នឹងចាប់ផ្តើមសាងសង់នៅឆ្នាំ ២០២២ និងគ្រោងបញ្ចប់នៅឆ្នាំ ២០២៤ដូចគ្នា។

សព្វថ្ងៃនេះ​ ផ្អែកតាមការព្យាករណ៍នៅក្នុងផែនការមេលើកទី២ តម្រូវការទឹកពីឆ្នាំ ២០០៥​ដល់ ២០២០ ស្ថិតនៅក្រោមឆ្ងាយពីសមត្ថភាពផលិត។ ប៉ុន្តែជាក់ស្តែង តម្រូវការទឹកបច្ចុប្បន្នលើសពីសមត្ថភាព​ផលិត ទៅទៀត។
ម្យ៉ាងវិញទៀត រដ្ឋាករទឹកស្វយ័តក្រុងភ្នំពេញ មានគោលនយោបាយ ទឹកស្អាតសម្រាប់អ្នក ទាំងអស់គ្នា ដែលអនុញាត្តឲ្យអតិថិជន ចំណូលទាបរស់នៅជាយរាជធានីភ្នំពេញអាចទទួលបានទឹកស្អាតពី រដ្ឋាករទឹកស្វយ័តក្រុងភ្នំពេញ។
ទាំងនេះជាកត្តាដែលនាំឲ្យសម្ពាធទឹកធ្លាក់ចុះនៅក្នុងតំបន់សេវាមួយចំនួននាពេលបច្ចុប្បន្ន។

ទោះបីជាយ៉ាងណា រដ្ឋាករទឹកស្វយ័តក្រុងភ្នំពេញ ក៏បានកសាងផែនការមេ លើកទី៣ ឆ្នាំ ២០១៦ ដល់ ឆ្នាំ ២០៣០រួចរាល់ផងដែរ។​
ផ្នែកលើផែនការមេលើកទី៣ និន្នាការខ្វះទឹកសម្រាប់ផ្គត់ផ្គង់ជូនអតិថិជន នឹងបន្តរហូតដល់ឆ្នាំ ២០២០។ ដើម្បីដោះស្រាយបញ្ហាប្រឈមនេះ ជាបណ្តើរៗ រដ្ឋាករទឹកស្វយ័តក្រុងភ្នំពេញ បាននឹងកំពុងអនុវត្តគម្រោងពង្រីកសមត្ថភាពរបស់រោងចក្រផលិតទឹកស្អាតចំការមន ពី ២០.០០០ម៉ែត្រគូបក្នុងមួយថ្ងៃ ទៅ ៥២.០០០ម៉ែត្រគូបក្នុងមួយថ្ងៃ ដែលគ្រោងដាក់ឲ្យដំណើរការនាខែតុលាឆ្នាំ ២០១៩នេះ។

លោក សឹម ណារ៉ា ប្រធានក្រុមប្រឹក្សាភិបាលនៃ រដ្ឋាករទឹកស្វយ័តក្រុងភ្នំពេញ បានឲ្យដឹងថា នៅចុងឆ្នាំ ២០១៩នេះ សមត្ថភាពផលិតសរុបនឹងកើនដល់ ៦១២.០០០ម៉ែត្រគូបក្នុងមួយថ្ងៃ ដែលនៅពុំទាន់អាច បំពេញតម្រូវការប្រើប្រាស់ប្រចាំថ្ងៃរបស់អតិថិជនបានពេញលេញឡើយ។
ប៉ុន្តែដើម្បីបន្តចូលរួមចំណែកសម្រេចឲ្យបាននូវ គោលនយោបាយទឹកស្អាតរបស់រាជរដ្ឋាភិបាល ដែលកំណត់ថា ប្រជាពលរដ្ឋរស់នៅតាមទីក្រុង និងទីប្រជុំជនទូទាំងប្រទេស នឹងទទួលបាននូវការផ្តត់ផ្គង់ទឹកស្អាត​១០០ភាគរយនៅឆ្នា​២០២៥ រដ្ឋាករទឹកស្វយ័តក្រុងភ្នំពេញនឹងពង្រឹកការសាងសង់រោចក្រផលិត បន្ថែមទៀត។

លោក សឹម ណារ៉ា លើកឡើងថា នាឆ្នាំ ២០២០ ខាងមុខ រដ្ឋាភិបាលនឹងមានការកែសម្រួលថ្លៃទឹក តាមរយៈប្រកាសអន្តរក្រសួង ធ្វើឡើងដោយ ក្រសួងឧស្សាហកម្ម និងសិប្បកម្ម និងក្រសួងសេដ្ឋកិច្ច៕

Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation