អ្នកចង់ឆ្លងស្ពានឫស្សីកោះប៉ែន ត្រូវចាំដល់រដូវវស្សាផុតសិន បន្ទាប់ពីស្ពានត្រូបានកាត់ផ្តាច់ដោយសារទឹកទន្លេមេគង្គសម្រុកឡើង
| ព័ត៌មានជាតិ
SHARE

កំពង់ចាម៖ស្ពានឫស្សីដែលវែងជាងគេ និងមានតែមួយគត់នៅក្នុងខេត្តកំពង់ចាមដែលភ្ញៀវទេសចរណ៍ជាតិ និងអន្តរជាតិបានធ្លាប់ទៅលេងកំសាន្តនោះគឺត្រូវបានកាត់ផ្តាច់ដោយសារទឹកទន្លេមេគង្គក្នុងខេត្តកំពង់ចាមបានសម្រុកឡើងជាហេតុធ្វើឲ្យស្ពានឫស្សីនេះត្រូវបានបិទលែងដំណើរការទាំងស្រុង។

បើតាមលោក ប៊ុន ណារ៉ា ដែលជាម្ចាស់ស្ពានឫស្សីបានប្រាប់ថា ស្ពានឫស្សីនេះត្រូវបានកាត់ផ្តាច់តាំងពីថ្ងៃទី០៥មិថុនាកន្លងទៅ ហើយរហូតមកដល់ថ្ងៃនេះស្ពានឫស្សីត្រូវបានក្រុមកម្មករនៅតែបន្តរុះរើជាបន្តបន្ទាប់ដើម្បីកុំឲ្យខូចខាតដោយសារទឹកទន្លេមេគង្គហូរបុកដាច់។

ដោយឡែកចំពោះអាហារដ្ឋានជាច្រើនដែលលក់នៅឆ្នេរខ្សាច់កោះប៉ែនជាប់គ្នាជាមួយស្ពានឫស្សីនេះក៏ចាប់ផ្តើមរុះរើឥវ៉ាន់ដូចជាគ្រែ រោង ជើងម៉ា និងសម្ភារៈផ្សេងៗជាបណ្តើរៗហើយដែរ ប៉ុន្តែកន្លែងលក់ដូរនៅរម្មណីយដ្ឋានឆ្នេរខ្សាច់កោះប៉ែននេះគឺមិនទាន់បិទទាំងស្រុងនោះទេ ដោយរង់ចាំមើលស្ថានភាពទឹកទន្លេមេគង្គបន្តទៀត។

លោក ប៊ុន ណារ៉ាបន្តថា ទោះជាយ៉ាងណាក្តីរម្មណីដ្ឋានឆ្នេរខ្សាច់កោះប៉ែន និងស្ពានឫស្សីក្នុងឆ្នាំ២០១៩នេះគឺអាចបម្រើ និងទាក់ទាញភ្ញៀវ និងអូសបន្លាយពេលបានយូរជាងបណ្តាឆ្នាំមុនៗ ពីព្រោះទឹកទន្លមេគង្គក្នុងឆ្នាំនេះបានចាប់ផ្តើមឡើងនិងអូសបន្លាយពេលរហូតដល់ខែមិថុនា ហើយចំពោះឆ្នាំកន្លងទៅស្ពានឫស្សីត្រូវបានកាត់ផ្តាច់ក្នុងអំឡុងពាក់កណ្តាខែឧសភា។

បើតាមប្រជាពលរដ្ឋដែលមានមុខរបរលក់ម្ហូបអាហារនៅរម្មណីយដ្ឋានឆ្នេរខ្សាច់កោះប៉ែនបានបញ្ជាក់ថា ទឹកទន្លេមេគង្គគឺបានចាប់ផ្តើមឡើង ដែលជាហេតុធ្វើឲ្យពួកគាត់បង្ខំចិត្តរុំរើរោង និងដឹកជញ្ចូនសម្ភារៈដើម្បីទៅសង់នៅទីតាំងថ្មីដែលពួកគាត់ខ្លះអាចប្រកបមុខរបរនេះដដែលនៅក្នុងរដូវទឹកតំឡើង។

ទាក់ទងនឹងបញ្ហាទឹកទន្លេមេគង្គបានឡើងនេះ បើតាម លោក អ៊ុំ វិបុល ប្រធានមន្ទីរធនធានទឹក និងឧតុនិយមខេត្តកំពង់ចាមបានបញ្ជាក់ថា ទឹកទន្លេមេគង្គក្នុងខេត្តកំពង់ចាមនៅថ្ងៃទី១០មិថុនាមានកំពស់៤.៦៦ម៉ែត្រ បើធៀបទៅនឹងថ្ងៃម្សិលមិញទឹកឡើង០.២៦ម៉ែត្រ។ 

សូមបញ្ជាក់ថា ស្ពានឫស្សីក្នុងខេត្តកំពង់ចាម មានប្រវែង៨០០ម៉ែត្រ ទំហំទទឹង២ម៉ែត្រ និងបានដាក់ឲ្យប្រើប្រាស់នៅដើមឆ្នាំ២០១៩ ហើយនៅថ្ងៃទី០៥មិថុនាកន្លងទៅស្ពានឫស្សីនេះត្រូវបានកាត់ផ្តាច់ទាំងស្រុងដោយមិនអាចធ្វើដំណើរកំសាន្ត និងឆ្លងកាត់បានទៀតទេ៕ដោយ៖ ហ៊ាង ថាច


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation