សម្តេចតេជោ បញ្ជាក់ថា ការហូរចូលការវិនិយោគពីបរទេស បានធ្វើឲ្យកម្ពុជា ទទួលបាន​អត្ថប្រយោជន៍ជាច្រើន ក្នុងវិស័យពាណិជ្ជកម្ម
| ព័ត៌មានជាតិ
SHARE

ភ្នំពេញ៖​ សម្តេចតេជោ ហ៊ុន សែន នាយករដ្ឋមន្ត្រី នៅរសៀលថ្ងៃទី១៥ ខែធ្នូនេះ បានមានប្រសាសន៍​ វិស័យពាណិជ្ជកម្ម បានរួមចំណែកយ៉ាងសំខាន់ ក្នុងការផ្តល់ជូនការងារ ដល់ប្រជាពលរដ្ឋកម្ពុជា ជាមួយនឹងការជំរុញកំណើនសេដ្ឋកិច្ច តាមរយៈការនាំទំនិញ និងសេវា ទៅកាន់ទីផ្សារនៃប្រទេស​ ដែលជាសមាជិក អង្គការពាណិជ្ជកម្មពិភពលោក ចំនួន១៤៧ប្រទេស និងការនាំចូលមកវិញ នូវទំនិញនិងសេវា ពីប្រទេសចំនួន១៣៥ ដែលធ្វើឲ្យទំហំពាណិជ្ជកម្ម អន្តរជាតិ កើនឡើងរហូតដល់ ជាង៣០ប៊ីលានដុល្លារ ក្នុងឆ្នាំ២០១៨កន្លងមក។

សម្តេចបន្ថែមថា តាមរយៈនៃការហូរចូល ការវិនិយោគ​ពីបរទេស​ បានធ្វើឲ្យកម្ពុជាទទួលបាន អត្ថប្រយោជន៍យ៉ាងច្រើនសន្ធឹកសន្ធាប់ ក្នុងនោះរួមមានទាំង ធនធានហិរញ្ញវត្ថុ បច្ចេកវិទ្យា ចំណេះដឹង​ បទពិសោធនិងការបង្កើតការងារថ្មីៗ សម្រាប់ប្រជាជនផងដែរ។
ការលើកឡើងនេះ សម្តេចតេជោ បានធ្វើឡើង ក្នុងឱកាសអញ្ជើញជាអធិបតី ក្នុងពិធីបើកពិព័រណ៍ផលិតផលខែ្មរ និងទំនិញនាំចេញ-នាំចូល កម្ពុជា លើកទី១៤ ឆ្នាំ២០១៩ នៅមជ្ឈមណ្ឌលកោះពេជ្រ រាជធានីភ្នំពេញ។

សម្តេចតេជោ បានលើកឡើងដែរថា រាជរដ្ឋាភិបាលកម្ពុជា បានពង្រីកមូលដ្ឋានផលិតកម្ម កសាងហេដ្ឋារចនាសម្ព័ន្ធ កែលម្អប្រព័ន្ធដឹកជញ្ជូន​ និងប្រព័ន្ធឡូជីស្ទិកទាំងផ្នែកទន់ និងផ្នែករឹង លើកកម្ពស់កិច្ចសម្រួលពាណិជ្ជកម្ម និងកាត់បន្ថយកម្រៃសេវាផ្សេងៗ កាត់បន្ថយថ្លៃអគ្គិសនី បណ្តុះបណ្ហាលជំនាញទាំងផ្នែករឹង និងផ្នែកទន់ រៀបចំប្រព័ន្ធបច្ចេកវិទ្យាព័ត៌មាន និងឌីជីថល ជាមួយនឹងការកែទម្រង់ វិស័យហិរញ្ញវត្ថុ និងវិស័យអាទិភាពផ្សេងទៀត ដែលទាំងអស់នេះ គឺជាលក្ខខណ្ណអាទិភាពដ៏ទូលំទូលាយ និងជាសក្តានុពលប្រកប ដោយគុណភាព និងតម្លាភាព សម្រាប់ការវិនិយោគ នៅ​កម្ពុជា។

សម្តេចតេជោសង្ឃឹមថា តាមរយៈព្រឹត្តិការណ៍ ពិព័ណ៍អន្តរជាតិថ្ងៃនេះពាណិជករ សហគ្រិន វិនិយោគិន ធុរជន ទាំងក្នុង និងក្រៅប្រទេស នឹងបានយល់កាន់តែច្បាស់ អំពីសក្តានុពលវិនិយោគនៅកម្ពុជា ហើយនឹងចាប់យកឱកាសដើម្បីប្រើប្រាស់ឱ្យអស់លទ្ធភាពនូវសម្បទាន ជាអាទិភាពទាំងឡាយ ដែលផ្តល់ដោយរាជរដ្ឋាភិបាលសម្រាប់ការវិនិយោគ និងការធ្វើធុរកិច្ចរបស់ខ្លួនប្រកបដោយជោគជ័យ ទាំងបច្ចុប្បន្ន និងអនាគត។

បើតាមប្រសាសន៍ ឯកឧត្ដម ប៉ាន សូរស័ក្តិ រដ្ឋមន្ដ្រីក្រសួងពាណិជ្ជកម្ម បានឲ្យដឹងថា ពិព័រណ៍ផលិតផលខ្មែរ និងទំនិញនាំចេញ-នាំចូលកម្ពុជា លើកទី១៤ កម្រិតអន្តរជាតិ ឆ្នាំ២០១៩ ត្រូវបានរៀបចំឡើង ដោយមានការគាំទ្រ និងការចូលរួមយ៉ាងសកម្ម ពីប្រទេសជាមិត្តក្នុងតំបន់ ដូចជា ប្រទេសចិន ជប៉ុន ឥណ្ឌូនេស៊ី ថៃឡង់ដ៍ ម៉ាឡេស៊ី មីយ៉ាន់ម៉ា វៀតណាម និងប្រទេសឡាវ ព្រមទាំងមន្ទីរពាណិជ្ជកម្មទាំង ២៥ រាជធានី-ខេត្ត សភាពាណិជ្ជកម្មកម្ពុជា សហព័ន្ធស្រូវអង្ករ អង្គការ សមាគមអាជីវកម្ម ក្រុមហ៊ុនក្នុងស្រុក និងក្រុមហ៊ុនបរទេស ដែលកំពុងធ្វើប្រតិបត្តិការអាជីវកម្ម នៅកម្ពុជា ដែលមានស្ដង់សរុបចំនួន ៣៧២ ស្ដង់៕ អត្ថបទ៖ សន ពិសិដ្ឋ​

Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation