សព្វថ្ងៃ មានរថយន្តដឹកកម្មករនិយោជិត សរុបចំនួនជាង ៤ពាន់គ្រឿង ក្នុងនោះមានរថយន្តទេសចរណ៍ ៣៨% និងរថយន្តដឹកទំនិញ មាន ៦២%
| ព័ត៌មានជាតិ
SHARE

មានរថយន្តដឹកកម្មករនិយោជិតសរុបចំនួន ៤៥៣៧គ្រឿង បានចរាចរណ៍និងប្រើប្រាស់នៅកម្ពុជា ក្នុងនោះរថយន្តប្រភេទទេសចរណ៍ មានចំនួន ១៧១០គ្រឿង ស្មើនឹង ៣៨% និងរថយន្តដឹកទំនិញមានចំនួន ២៨២៧គ្រឿង ស្មើនឹង ៦២%។ នេះបើយោងតាមរបាយការណ៍របស់ការិយាល័យគោលនយោបាយ នៃក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិតនៃបេឡាជាតិរបបសន្តិសុខសង្គម ដែលបានបង្ហាញនៅក្នុងសិក្ខាសាលាមួយ ស្តីពីការជំរុញការកែលំអសុវត្ថិភាពរថយន្តដឹកកម្មករនិយោជិត ក្រោមការចូលរួមពីអ្នកពាក់ព័ន្ធដូចជាសមាគមអ្នកបើកបរ និងអ្នកបើកបររថយន្តជាច្រើននាក់។

ការជំរុញការកែលំអសុវត្ថិភាពរថយន្តដឹកកម្មករនិយោជិតនេះ ធ្វើឡើងដែលជាផ្នែកមួយ ដើម្បីសុវត្ថិភាពរបស់កម្មករនិយោជិត បន្ទាប់ពីមានករណីគ្រោះថ្នាក់ចរាចរណ៍ជាច្រើនរបស់កម្មករ នៅពេលធ្វើដំណើរ។
ឯកឧត្តម ហេង សុផាន់ណារិទ្ធ ប្រធានការិយាល័យគោលនយោបាយនិងជាសមាជិកក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិតនៃបេឡាជាតិរបបសន្តិសុខសង្គម បានមានប្រសាសន៍ថា ក្នុងរយៈពេល ៩ខែ ឆ្នាំ២០១៩ នេះ មានករណីគ្រោះថ្នាក់ចរាចរណ៍ផ្លូវគោករបស់កម្មករនិយោជិត បានកើតឡើងចំនួន ១ ១៨៦លើក គ្រោះថ្នាក់ដោយរថយន្តមានចំនួន ៣៧លើក ក្នុងនោះ ១៣លើក ជារថយន្តដឹកកម្មករនៅក្នុងវិស័យកាត់ដេរសម្លៀកបំពាក់ និងផលិតស្បែកជើង។

ឯកឧត្តម បន្តថា មានអ្នកបើកបររថយន្តដឹកកម្មករនិយោជិត ចំនួន ៤ ៥៣៧នាក់ ក្នុងនោះ អ្នកមានបណ្ណបើកបរចំនួន ៤ ៤៨១នាក់ ស្មើនឹង ៩៨.៨% និងអ្នកគ្មានបណ្ណបើកបរមានចំនួន ៥៦នាក់ ស្មើនឹង ១.២% ។
នាយកឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានឲ្យដឹងថា តួលេខគ្រោះថ្នាក់ចរាចរណ៍ នៅតែមិនអាចកាត់បន្ថយបាន ដោយក្នុងនោះរបាយការណ៍បឋម ៩ខែឆ្នាំនេះ អ្នកស្លាប់មានកំណើន១៣% មានប្រមាណជា ២០០នាក់ បើធៀបនិងរយៈពេលដូចគ្នាកាលពីឆ្នាំមុន។ នាយឧត្តមសេនីយ៍ ហ៊ឹម យ៉ាន បានឲ្យដឹងទៀតថា ក្នុងរយៈពេលត្រីមាសទី៣នេះ គ្រោះថ្នាក់ចរាចរណ៍ដែលបើកបរដឹកកម្មករមានកំណើនខ្ពស់ជាងកសិករ ក្នុងនោះ កម្មករមាន ៣០% នៃចំនួនសរុប ៤៨៨នាក់ កសិករ ៣០% និងសិស្សានុសិស្ស ៩%។

ករណីគ្រោះថ្នាក់នៅតែបន្តកើតមានឡើង ដោយសារការប្រើរថយន្តដឹកទំនិញមកដឹកកម្មករ។ ដោយសង្កេតឃើញដូចនេះ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជានាយកបេឡាជាតិរបបសន្តិសុខសង្គម បានជម្រុញឲ្យមានការកែលំអសុវត្ថិភាពរថយន្តដឹកកម្មករនិយោជិត ដើម្បីលើកកំពស់សុវត្ថិភាព ដោយកែសម្រួលរថយន្តតាមលក្ខណៈស្តង់ដា ដែលអាចទទួលយកបាន ដែលសង្ឃឹមថានិងអាចចាប់អនុវត្តពីឆ្នាំ២០២០ខាងមុខនេះតទៅ។
គួរបញ្ជាក់ថា ការដឹកកម្មរដោយឈរមានចំនួនច្រើនបណ្តាលឲ្យមានការចង្អៀតពិបាកធ្វើចលនា រួយជើង និងមានភាពរញ៉េរញៃគ្មានសណ្តាប់ធ្នាប់។ កិច្ចពិភាក្សាលើការជម្រុញការកែលំអសុវត្ថិភាពរថយន្តដឹកកម្មករ និងការច្នែរថយន្តដឹកទំនិញ មកដឹកកម្មករឲ្យមានសុវត្ថិភាព គឺអាចនិងយកការកែច្នៃ ៣ប្រភេទ គឺរថយន្ត ២តោនកន្លះ ៣តោនកន្លះ និង៥តោន។ រយន្តទាំង៣ ប្រភេទខាងលើនេះ អាចកែច្នៃដាក់កៅអីទទឹងក៏បាន បណ្តោយក៏បាន ។ ដោយឡែក ចំពោះរថយន្តប្រភេទ ១តោន អនុញ្ញត្តិឲ្យ កែច្នៃតែកៅអីបណ្តោយប៉ុណ្ណោះ។ អត្ថបទ ៖ អៀវ ឈៀងនី

Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation