សម្តេចតេជោ ហ៊ុន សែន តែងតែផ្តល់ឱកាសលើកទឹកចិត្ត និងគាំទ្រដល់សភាពាណិជ្ជកម្មកម្ពុជា និងវិស័យឯកជន ជំរុញឲ្យសហការ និងបង្កើនទំនាក់ទំនងឲ្យកាន់តែច្រើនជាមួយបណ្តាក្រុមហ៊ុននានានៅលើពិភពលោក ដើម្បីទាក់ទាញអ្នកវិនិយោគទុនជំរុញការអភិវឌ្ឍប្រទេសជាតិ
| ព័ត៌មានជាតិ
SHARE

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជានឹងដឹកនាំគណៈប្រតិភូកម្ពុជា និងសភាពាណិជ្ជកម្មកម្ពុជាដែលមានអ្នកឧកញ៉ា គិត ម៉េង ជាប្រធានសភាពាណិជ្ជកម្មកម្ពុជាធ្វើដំណើរនិវត្តន៍មកកាន់ព្រះរាជាណាចក្រកម្ពុជាវិញ នៅថ្ងៃទី១៧ខែតុលានេះ បន្ទាប់ពីបានអញ្ជើញបំពេញទស្សនកិច្ច និងចូលរួមកិច្ចប្រជ៉ំសំខាន់ៗនៅក្នុងប្រទេសឆេក ប្រទេសហុងគ្រី និងចុងក្រោយប្រទេសប៊ុលហ្គារី ដែលចាប់ផ្តើមតាំងពីថ្ងៃទី១៣ ដល់ថ្ងៃទី១៧ ខែតុលា ឆ្នាំ២០១៩។ ដំណើរអញ្ជើញនិវត្តន៍របស់សម្តេចតេជោ ហ៊ុន សែន នឹងដល់ប្រទេសកម្ពុជានៅព្រឹកថ្ងៃទី១៨ខែតុលា។


ក្នុងដំណើរទស្សនកិច្ចនេះក៏មានជំនួបសំខាន់ៗជាមួយបណ្តាភ្នាក់ងារដឹកនាំតាមប្រទេសនីមួយៗដោយផ្តោតការយកចិត្តទុកដាក់ទៅលើការពង្រឹងកិច្ចសហប្រតិបត្តិការកាទូត សេដ្ឋកិច្ច ពាណិជ្ជកម្ម ការវិនិយោគ និងការទាក់ទាញទេសចរណ៍។


ជាមួយគ្នានេះដោយមានការយកចិត្តទុកដាក់ពីប្រមុខរាជរដ្ឋាភិបាលចំពោះវិស័យឯកជន សម្តេចតេជោ ហ៊ុន សែន តែងតែផ្តល់ឱកាស លើកទឹកចិត្ត និងគាំទ្រដល់សភាពាណិជ្ជកម្មកម្ពុជា និងវិស័យឯកជននានាបានធ្វើដំណើរអមសម្តេចតេជោទៅកាន់ក្រៅប្រទេសក្នុងន័យជំរុញឲ្យសហការ និងបង្កើនទំនាក់ទំនងឲ្យកាន់តែច្រើនលើវិស័យធុរកិច្ចជាមួយបណ្តាក្រុមហ៊ុននានា ដើម្បីទាក់ទាញអ្នកវិនិយោគទុនក្នុងការចូលរួមជំរុញការអភិវឌ្ឍន៍ប្រទេសជាតិឲ្យកាន់តែរីកចម្រើនទៅមុខ។


ជាក់ស្តែង ក្នុងឱកាសអញ្ជើញអមដំណើរសម្តេចតេជោនាយករដ្ឋមន្រ្តីក្នុងដំណើរទស្សនកិច្ច និងចូលរួមកិច្ចប្រជុំនៅទីក្រុងប្រាក ប្រទេសឆេក អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា នាព្រឹកថ្ងៃទី១៤ ខែតុលា ឆ្នាំ២០១៩ បានអញ្ជើញចូលរួមកិច្ចប្រជ៉ំពាណិជ្ជកម្ម និងចុះអនុស្សរណៈស្តីពី កិច្ចសហប្រតិបត្តិការពណិជ្ជកម្មរវាងសភាពាណិជ្ជកម្មកម្ពុជា ជាមួយសភាពាណិជ្ជកម្ម នៃសាធារណរដ្ឋឆេក ក្រោមអធិបតីភាពឯកឧត្តម ប៉ាន សូរស័ក្ដិ រដ្ឋមន្រ្តី ក្រសួងពាណិជ្ជកម្មកម្ពុជា និងឯកឧត្តម ឧបនាយករដ្ឋមន្រ្តី ការេល ហាវិលីខេក រដ្ឋមន្រ្តីក្រសួងឧស្សាហកម្ម និងពាណិជ្ជកម្ម នៃសាធារណរដ្ឋឆេក។


នៅក្នុងពិធីដែលធ្វើឡើងក្នុងសាល នៃក្រសួងកាបរទេស នៃសាធារណរដ្ឋឆេក អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជាបានថ្លែងថា កិច្ចប្រជុំពាណិជ្ជកម្មកម្ពុជា ឆេក នាពេលនេះពិតជាមានសារសំខាន់ណាស់ ដែលចាត់ទុកជាប្រវត្តិសាសាស្រ្ត ដែលសភាពាណិជ្ជកម្ម នៃប្រទេសទាំងពីរបានចូលរួមចំណែកលើកកម្ពស់ពាណិជ្ជកម្មសេដ្ឋកិច្ច ទេសចរណ៍ វិនិយោគរវាងប្រទេសទាំងពីរ។ ជាមួយគ្នានេះអ្នកឧញ៉ា គិត ម៉េង បានថ្លែងបន្តថា យើងនឹងផ្លាស់ប្តូរព័ត៌មានពីគ្នាទៅវិញទៅមកពាក់ព័ន្ធនឹងកិច្ចការបច្ចេកទេស វិទ្យាសាស្រ្ត សេដ្ឋកិច្ច និងផ្នែកឧស្សាហកម្មរវាងសមាជិក នៃសភាពាណិជ្ជកម្ម នៃប្រទេសកម្ពុជា និងសភាពាណិជ្ជកម្ម នៃសាធារណរដ្ឋឆេក។


អ្នកឧកញ៉ា គិត ម៉េង លើកឡើងថា ឆេកជាប្រទេសមួយដែលមានបច្ចេកវិទ្យា សម្ភារគ្រឿងយន្ត ដែលមានបច្ចេកទេសខ្ពស់ ក៏ប៉ុន្តែបច្ចុប្បន្នមិនសូវមានទីផ្សារនៅក្នុងប្រទេសកម្ពុជាឡើយ ពោលគឺការវិនិយោគមិនមានចំនួនច្រើន ដូច្នេះហើយក៏ជាឱកាសមួយសម្រាប់វិនិយោគិន នៃប្រទេសឆេកអាចចាប់យកឱកាសនេះវិនិយោគនៅកម្ពុជា ក្រៅពីនេះឆេកក៏អាចចាប់យកកិច្ចសហការវិនិយោគផ្នែកបច្ចេកវិទ្យាព័ត៌មានវិទ្យា ផ្នែកសន្តិសុខព័ត៌មានវិទ្យាក្នុងបណ្តាញអ៊ិនធឺណិត ការប្រមូលផ្តុំទិន្នន័យ ជាដើម។


អ្នកឧកញ៉ា គិត ម៉េង បានថ្លែងស្នើឲ្យវិនិយោគិននៃសាធារណរដ្ឋឆេកវិនិយោគការផលិតយន្តហោះខ្នាតតូច ឬការបណ្តុះបណ្តាលការបើកយន្តហោះខ្នាតតូចនៅកម្ពុជា ដើម្បីជំរុញការហោះហើរក្នុងប្រទេសកម្ពុជា ពីខេត្តមួយទៅខេត្តមួយក្នុងការលើកកម្ពស់វិស័យទេសចរណ៍។

ជាមួយគ្នានេះ អ្នកឧកញ៉ា គិត ម៉េង បានស្នើឲ្យរដ្ឋាភិបាលសាធារណរដ្ឋឆេកបង្កើតការហោះហើរត្រង់ទៅកម្ពុជា។


ដោយសារតែទំហំពាណិជ្ជកម្មរវាងកម្ពុជា និងឆេកនៅមានទំហំតូចនៅឡើយពោលគឺប្រមាណ២៤៣លាន ដុល្លារនៅឆ្នាំ២០១៨ អ្នកឧកញ៉ា គិត ម៉េង បានថ្លែងថា មិនប្រើអស់នូវសក្ដានុពលរវាងប្រទេសទាំងពីរឡើយ។ ចំណែកការវិនិយោគក៏នៅមានចំនួនតិចតួច អ្នកឧកញ៉ា គិត ម៉េង ក៏បានស្នើឆេកបង្កើនទំហំពាណិជ្ជកម្មឲ្យបានច្រើនជាងនេះនៅកម្ពុជា ខណៈដែលកម្ពុជាមានកំណើនសេដ្ឋកិច្ចខ្ពស់ ប្រមាណជាង៧ភាគរយជារៀងរាល់ឆ្នាំ។


អ្នកឧកញ៉ា គិត ម៉េង ជំរាបដល់វិនិយោគិនឆេក និងរដ្ឋាភិបាលឆេកថា កម្ពុជាមានវិស័យច្រើនដែលអាចវិនិយោគដូចជា ផ្នែកកសិឧស្សាហកម្ម ទេសចរណ៍ ការកែច្នៃអាហារ សំណង់ បង្គុំរថយន្ត អគ្គិសនី និងសុខាភិបាល ព្រមទាំងរាជរដ្ឋាភិបាលមានគោលនយោបាយយកចិត្តទុកដាក់ខ្ពស់ចំពោះវិនិយោគិនជាតិ និងអន្តរជាតិ។

បន្ទាប់មក ក្នុងឱកាសអញ្ជើញអមដំណើរសម្តេចតេជោនាយករដ្ឋមន្រ្តីក្នុងដំណើរទស្សនកិច្ច និងចូលរួមកិច្ចប្រជុំ ស្តីពីទឹក នៅទីក្រុងប៊ូដាប៉េស ប្រទេសហុងគ្រី អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា នារសៀលថ្ងៃទី១៥ខែតុលា ឆ្នាំ២០១៩ បានអញ្ជើញចុះអនុស្សរណៈស្តីពី កិច្ចសហប្រតិបត្តិការពាណិជ្ជកម្មរវាងសភាពាណិជ្ជកម្មកម្ពុជា ជាមួយសភាពាណិជ្ជកម្ម និងឧស្សាហកម្មនៃប្រទេសហុងគ្រី ក្រោមអធិបតីភាពឯកឧត្តម ប៉ាន សូរស័ក្ដិរដ្ឋមន្រ្តី ក្រសួងពាណិជ្ជកម្មកម្ពុជា។


នៅក្នុងពិធីនេះអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជាបានថ្លែងថា ការចុះហត្ថលេខានេះពិតជាមានសារៈសំខាន់ណាស់ ដែលចាត់ទុកជាប្រវត្តិសាសាស្រ្ត ដែលសភាពាណិជ្ជកម្ម នៃប្រទេសទាំងពីរបានចូលរួមចំណែកលើកកម្ពស់ពាណិជ្ជកម្មសេដ្ឋកិច្ច ទេសចរណ៍វិនិយោគរវាងប្រទេសទាំងពីរ និងវិស័យជាច្រើនទៀត។


តាមរយៈការចុះកិច្ចព្រមព្រៀងថ្ងៃនេះ រំពឹងថានឹងជួយបង្កើនទំហំពាណិជ្ជកម្មប្រទេសទាំងពីរថែមទៀត ខណៈដែលបច្ចុប្បន្នការធ្វើពាណិជ្ជកម្មនៅមានចំនួនតិចតួចនៅឡើយ ពោលគឺចាប់ពីឆ្នាំ២០១៣ រហូតដល់ឆ្នាំពាក់កណ្តាលឆ្នាំ២០១៨ ទំហំពាណិជ្ជកម្មទ្វេភាគីកម្ពុជា-ហុងគ្រី មានចំនួនជាង ១៦លានដុល្លារអាមេរិកប៉ុណ្ណោះ។ ក្នុងនោះកម្ពុជា នាំចេញទៅហុងគ្រីមានទឹកប្រាក់ ១៣លានដុល្លារអាមេរិក និងនាំចូលមានទឹកប្រាក់ជាង ៣លានដុល្លារអាមេរិក៕អត្ថបទ ៖ហ៊ន សុភ័ក្រ


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation