កាកបាទក្រហមកម្ពុជាផ្តល់អំណោយមនុស្សធម៌ដល់អង្គការសកម្មភាពលើយុវវ័យពិការដើម្បីអភិឌ្ឍន៍និងសមាជិក៧១នាក់
| ព័ត៌មានជាតិ
SHARE

លោកជំទាវម៉ែន នារីសោភ័គ អគ្គលេខាធិការរងទី១ និងឯកឧត្តមយូ ឡាណាអគ្គលេខាធិការរងទី២កាកបាទក្រហមកម្ពុជានិងសហការីបានជួបសំណេះសំណាលនិងផ្តល់អំណោយមនុស្សធម៌ឧបត្ថម្ភរបស់កាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិតប៊ុន រ៉ានីហ៊ុន សែនជាប្រធានដល់អង្គការសកម្មភាពលើយុវវ័យពិការដើម្បីអភិវឌ្ឍន៍និងសមាជិកចំនួន៧១នាក់ នៅទីស្នាក់ការកណ្តាលកាកបាទក្រហមកម្ពុជាក្នុងខណ្ឌទួលគោករាជធានីភ្នំពេញនាថ្ងៃព្រហស្បតិ៍ ទី១៤ ខែមីនា ឆ្នាំ២០១៩ ។

 លោកជំទាវម៉ែន នារីសោភ័គ អគ្គលេខាធិការរងទី១កាកបាទក្រហមកម្ពុជាបានពាំនាំនូវប្រសាសន៍របស់សម្តេចកិត្តិព្រឹទ្ធបណ្ឌិតប៊ុន រ៉ានីហ៊ុន សែនប្រធានកាកបាទក្រហមកម្ពុជាក្នុងការសួរសុខទុក្ខ ការអាណិតស្រាលាញ់ ពិសេសបានកោតសសើរនិងលើកទឹកចិត្តចំពោះការតស៊ូជំនះពុះពារគ្រប់ឧបសគ្គដើម្បីដោះស្រាយជីវភាពនិងចិញ្ចឹមជិវិតរស់នៅតាមជំនាញរបស់បងប្អូនជនពិការរៀងៗខ្លួនប្រកដោយ ភាពត្រឹមត្រូវនិងសេចក្តីថ្លៃថ្នូរ។ ព្រមទាំងសំណូមពរដល់បងប្អូនជនពិការទាំងអស់គួរតែចងក្រងនិងរួមគ្នាបង្កើតជាសមាគមតែមួយដើម្បីផ្តល់ភាពងាយស្រួលសប្បុរសជននានាជួយឧបត្ថម្ភ ។ហើយទាំងនេះគឺជាផ្នែកមួយនៃការចូលរួម អនុវត្តន៍គោលនយោបាយជាតិលើកកម្ពស់ជនពិការអោយរស់នៅស្មើមុខស្មើមាត់ក្នុងសង្គមជាតិដែលមានសុខសន្តិភាពនិងការអភិវឌ្ឍន៍ជាមួយរាជរដ្ឋាភិបាលកម្ពុជា។

ចំពោះការជួបសំណេះសំណាលនិងចែកអំណោយមនុស្សធម៌នៅពេលនេះគឺដើម្បីចង់ដឹងបន្ថែមពីអង្គការតើកំពុងមានសកម្មភាពអ្វីខ្លះ ហើយការផ្តល់របស់កាកបាទក្រហមកម្ពុជាបានធ្វើអោយមានការផ្លាស់ប្តូរអ្វីខ្លះដែរឬទេសម្រាប់សមាជិកនិងអង្គការនេះ។ក្នុងនោះលោកជំទាវបន្តថា៖ចំពោះអង្គការសកម្មភាពលើយុវវ័យពិការដើម្បីអភិវឌ្ឍន៍ដែរតែងតែធ្វើការប្រគុំតន្ត្រីដើម្បីអោយបានការចូលរួមគាំទ្រជាថវិការពីប្រជាពលរដ្ឋនោះគួរគម្បីរៀបចំធ្វើការប្រគុំតន្រ្តីក្នុងកម្មវិធីតាំងពិពណ៌និងកម្មវិធីបុណ្យសំខាន់ផ្សេងៗនោះនឹងទទួលបានការគាំទ្រពីប្រជាពលរដ្ឋឬសប្បុរសជនដែលមានសទ្ធាជ្រះថ្លាព្រោះកម្មវិធីឬបុណ្យសំខាន់ៗនិងមានប្រជាពលរដ្ឋជាច្រើនចូលរួមមិនខាននោះទេ។

លោកអ៊ាង ចាន់ដារ៉ាប្រធានអង្គការសកម្មភាពលើយុវវ័យពិការដើម្បីអភិវឌ្ឍន៍បានថ្លែងអំណរគុណកាកបាទក្រហមកម្ពុជាពិសេសសម្តេចកិត្តិព្រឹទ្ធបណ្ឌិតប៊ុន រ៉ានីហ៊ុន សែនដែលបានជួយឧបត្ថម្ភស្បៀងសម្ភារៈនិងថវិការទាំងក្នុងការទ្រទ្រង់ការហូបចុកនិងការប្រគុំតន្ត្រីពិសេសបានយកចិត្តទុកដាក់និងផ្តល់ក្តីអាណិតស្រលាញ់ ភាពកក់ក្តៅដល់សមាជិករបស់អង្គការទៀតផង។

សូមបញ្ជាក់ថា អំណោយដែលផ្តល់ជូននាពេលនេះសម្រាប់អង្គការមានអង្ករ៥០០គីឡូក្រាមត្រីខ៥កេសមី១០កេសទឹកត្រី២៤ដបទឹកស៊ីអ៊ីវ២៤ដបទឹកសុទ្ធ១០កេសទឹកក្រូច១០កេសនិងថវិការ៥លានរៀល ។ចំណែកឯសមាជិកចំនួន៧១នាក់ម្នាក់ៗទទួលបានអង្ករ៣០គីឡូក្រាមត្រីខ១០កំប៉ុង មី១កេស ឃីត១(មានក្រម៉ា១ ភួយ១ មុង១ សារុង១ និងអាវ១)និងថវិការ៥ម៉ឺនរៀល ។ហើយការផ្តល់អំណោយដល់អង្គការសកម្មភាពលើយុវវ័យពិការដើម្បីអភិវឌ្ឍន៍នៅពេលនេះគឺជាលើកទី៨ហើយក្នុងនោះ៤លើកផ្តល់ជាស្បៀងសម្ភារៈនិងថវិការដល់អង្គការនិងសមាជិកនិង៤លើកទៀតជាថវិការឧបត្ថម្ភដល់ការប្រគុំតន្ត្រី៕អត្ថបទ ៖ ថឹង ចាន់ថារ៉ាន់ 


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation