ព្រះមហាក្សត្រ៖ កម្ពុជាស្រឡាញ់មិត្តភាពជាមួយចិន និងមានឆន្ទៈជំរុញការផ្លាស់ប្តូរកិច្ចសហប្រតិបត្តិការ
| ព័ត៌មានជាតិ
SHARE

ព្រះមហាក្សត្រកម្ពុជា សព្វព្រះរាជហឫទ័យ ទទួលជួបសវនាការជាមួយ អគ្គលេខាធិការ នៃគណៈកម្មាធិការបក្សប្រចាំខេត្តសុីឈួន ក្នងឱកាសនោះ ព្រះមហាក្សត្រខ្មែរ មានព្រះរាជបន្ទូលថា កម្ពុជាស្រឡាញ់មិត្តភាពជាមួយប្រទេសចិន និងមានឆន្ទៈជំរុញការផ្លាស់ប្តូរកិច្ចសហប្រតិបត្តិការ។

នាវេលារសៀលថ្ងៃទី១៩ ខែកញ្ញា ឆ្នាំ២០១៩ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សព្វព្រះរាជហឫទ័យទទួលជួបសវនាការជាមួយ ឯកឧត្តម Peng QingHua អគ្គលេខាធិការនៃគណៈកម្មាធិការបក្សប្រចាំខេត្តសុីឈួន និងជាប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនចិនប្រចាំខេត្តសុីឈួន។

ឯកឧត្តម Peng QingHua បានសម្តែងការស្វាគមន៍យ៉ាងកក់ក្តៅចំពោះព្រះរាជដំណើរទស្សនកិច្ច នៃព្រះករុណាជាអម្ចាស់ជីវិតលើត្បូង មកកាន់ខេត្តសុីឈួន នៅពេលនេះ។ ឯកឧត្តម បានមានប្រសាសន៍បន្តទៀតថាប្រទេសចិន និងប្រទេសកម្ពុជាគឺជាប្រទេសជិតខាងដែលមានមិត្តភាពដ៏យូរអង្វែង ហើយការផ្លាស់ប្តូរមិត្តភាពរវាងប្រទេសទាំងពីរនិងប្រជាជនទាំងពីរមានប្រវត្តិយូរលង់ណាស់មកហើយ។ ចំណងមិត្តភាពជាប្រពៃណីរវាងចិននិងកម្ពុជាដែលបានបង្កើតរួមគ្នានិងថែរក្សាដោយយកចិត្តទុកដាក់ពីសំណាក់ថ្នាក់ដឹកនាំជំនាន់ចាស់នៃប្រទេសទាំងពីរបានចាក់ឫសយ៉ាងជ្រៅនៅក្នុងដួងចិត្តរបស់ប្រជាជន។

ក្នុងប៉ុន្មានឆ្នាំថ្មីៗនេះក្រោមការជំរុញរួមគ្នារបស់ ឯកឧត្តមប្រធានាធិបតី ស៊ី ជីនពីង និងព្រះករុណា ព្រះមហាក្សត្រ បានធ្វើឲ្យភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន - កម្ពុជាទទួលបានការអភិវឌ្ឍយ៉ាងឆាប់រហ័ស និងបង្កើតលក្ខខណ្ឌអំណោយផលសម្រាប់ការផ្លាស់ប្តូរ និងកិច្ចសហប្រតិបត្តិការរវាងខេត្តស៊ីឈួន និងកម្ពុជា ឲ្យកាន់តែស៊ីជម្រៅ។ ស្ថិតនៅភាគខាងលិចប្រទេសចិនខេត្តស៊ីឈួនគឺជាខេត្តមួយដែលមានភាពរឹងមាំខាងការអភិវឌ្ឍន៍ និងសក្តានុពលខ្ពស់។

ក្នុងនាមជាសមាជិកសំខាន់របស់អាស៊ាននិងជាប្រទេសដ៏សំខាន់មួយនៅតាមបណ្តោយគោលនយោបាយ “ខ្សែក្រវាត់មួយ ផ្លូវមួយ” ប្រទេសកម្ពុជា គឺជាដៃគូដ៏សំខាន់សម្រាប់ខេត្តសុីឈួនដើម្បីជំរុញការបើក និងការធ្វើសមាហរណកម្ម“ ខ្សែក្រវាត់មួយ ផ្លូវមួយ” ។ ឯកឧត្តមមានឆន្ទៈខ្ពស់ក្នុងធ្វើការជាមួយភាគីកម្ពុជា ដើម្បីអនុវត្តនូវការមូលមតិគ្នាដ៏សំខាន់ដែលសម្រេចបានដោយថ្នាក់ដឹកនាំនៃប្រទេសទាំងពីរ និងធ្វើកិច្ចសហប្រតិបត្តិការឲ្យកាន់តែស៊ីជម្រៅលើវិស័យសំខាន់ដូចគ្នា វិស័យសេដ្ឋកិច្ច និងពាណិជ្ជកម្ម កសិកម្មទំនើប ហេដ្ឋារចនាសម្ព័ន្ធ អប់រំ សុខភាព ទេសចរណ៍ និងវប្បធម៌ជាដើមដើម្បីសម្រេចបាននូវការអភិវឌ្ឍរួមគ្នានិងវិបុលភាព ព្រមទាំងកសាងសហគមន៍វាសនាចិននិងកម្ពុជា។

ព្រះករុណាជាអម្ចាស់ជីវិតលើត្បូង សព្វព្រះរាជហឫទ័យសម្តែងការអបអរសាទរចំពោះសមិទ្ធិផលដ៏អស្ចារ្យនៃខេត្តសុីឈួន ក្នុងការអភិវឌ្ឍសេដ្ឋកិច្ច និងសង្គមចាប់តាំងពីបានបង្កើតឡើងសាធារណរដ្ឋប្រជាមានិតចិនកាលពី ៧០ ឆ្នាំមុន។ ព្រះករុណា ព្រះមហាក្សត្រ មានព្រះរាជបន្ទូលក្នុងឱកាសដ៏ឧត្តុង្គឧត្តមនោះថាប្រជាជនកម្ពុជា និងប្រជាជនចិនគឺជាមិត្តល្អ និងជាបងប្អូនល្អ។ ភាគីកម្ពុជាស្រឡាញ់មិត្តភាពជាមួយប្រទេសចិន និងមានឆន្ទៈជំរុញការផ្លាស់ប្តូរកិច្ចសហប្រតិបត្តិការរវាងកម្ពុជា និងខេត្តស៊ីឈួន ក្នុងវិស័យផ្សេងៗ ដើម្បីពង្រីកការផ្លាស់ប្តូរមិត្តភាពធ្វើឱ្យចំណងមិត្តភាពកម្ពុជា - ចិនស្ថិតស្ថេរជារៀងរហូត៕

Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation