តើ អភិបាលស្រុក អភិបាលស្រុករងអូរាំង ដោះស្រាយ យ៉ាងណា ហ៊ុមព័ទ្ធ យកដីចម្ការស្រល់ របស់រដ្ឋ?!
| ព័ត៌មានជាតិ
SHARE

មណ្ឌលគិរី:គ្រាន់តែអភិបាលស្រុកមានដី៣ហិកតា និងមានដីកូនឯកឧត្តមទេសរដ្ឋមន្រ្តីក្រសួងរៀបចំដែនដីទៀត រួមទាំងដីអភិបាលរងស្រុកផង និយាយរួមសុទ្ធតែអ្នកចេះច្បាប់រំលោភលើច្បាប់ បានគ្នាលួចយកដីរដ្ឋរបស់រដ្ឋដែលជាចម្ការស្រល់កេរដំណែលព្រះបរមរតនកោដ្ឋ និងជាទ្រព្យរបស់រដ្ឋទៀតផង។

យោងតាមកំណត់ហេតុចុះត្រួតពិនិត្យរបស់ក្រុមការងារដឹកនាំដោយលោកនាយរងខណ្ឌរដ្ឋបាលព្រៃឈើចំណុះឲ្យមន្ទីរកសិកម្មខេត្ត នាថ្ងៃទី ១៤ ខែ កុម្ភៈ ឆ្នាំ ២០១៩ ដោយគ្មានវត្តមានអភិបាលស្រុក អភិបាលរងស្រុក និងចៅសង្កាត់ ប្រហែលជាភ័យគេចវេស ឬ រត់ទៅឱបជើងមន្រ្តីថ្នាក់ណាមួយដើម្បីបង្វែរកំហុសរបស់ខ្លួនទៅដាក់អ្នកផ្សេង ឬ ប្រែក្រដាស់សឲ្យទៅជាខ្មៅ ទើបមិនចូលរួមជាមួយមន្រ្តីជំនាញដើម្បីពិនិត្យឲ្យដឹងពិតប្រាកដថា ដីចម្ការស្រល់ជាង២២៥ហិកតា កំពុងព័ទ្ធរបង ហ៊ុំយកធ្វើជាកម្មសិទ្ធិក្រោមចុងប៊ិចអភិបាលស្រុក និងជាសមាជិកគណៈកម្មការទប់ស្កាត់បង្រ្កាបធនធានធម្មជាតិទៀតផង។

នៅក្នុងកំណត់ហេតុបានសង្កត់ធ្ងន់ដោយការលើកឡើងរបស់លោក សារូ រតនា នាយរងខណ្ឌដោយអះអាងថា ការរំលោភកើតឡើងដោយសារហាងឆេងដីត្រូវប៉ាន់ ការយកឈ្នះអ្នកមានអំណាច មុខមាត់ តួនាទីមុខងារ ធ្វើជាឈ្នាន់ បន្លាចដល់អ្នកតូចតាច ហើយទន្រ្ទានកាន់កាប់ដោយខុសច្បាប់គ្មានកោតក្រែង ឬគោរពច្បាប់បន្តិចសោះឡើយ។ លោកនាយរងខណ្ឌបានបន្ទោសធ្ងន់ៗដល់អាជ្ញាធរដែលធ្វេសប្រហែសបណ្តោយឲ្យមានការរំលោភដីរដ្ឋក្នុងចំការស្រល់នេះបាន។

ដោយឡែកមន្រ្តីចាប់ពីកម្រិតថ្នាក់ភូមិឬមូលដ្ឋាន សមាជិកក្រុមប្រឹក្សាឃុំ និងមេបញ្ជាការសឹករងស្រុក បានត្រឹមឆ្លើយយករួចខ្លួន​ ជាពិសេសឆ្លើយ​ថាមិនដឹង និងខ្លះឆ្លើយថាបោះរបងទុកឲ្យរដ្ឋជាដើម។

នេះជារឿងគួរអាមាស់មុខបំផុតដែលក្រុមមន្រ្តីរដ្ឋអនុវត្តច្បាប់នាំគ្នារំលោភច្បាប់ទាំងដឹងថាដីចម្ការស្រល់នៅស្រុកអូររាំងនេះជាគោលដៅទេសចរណ៍សំខាន់សម្រាប់ខេត្តមណ្ឌលគិរី ឬ មួយលោកអភិបាលស្រុកត្រូវបានដុល្លារសណ្តំឡើងល្ងិតមុខមើលដីលែងដឹងហើយ។

ចំពោះបញ្ហាពលរដ្ឋអ្នកឃើញទិដ្ឋភាពការបោះបង្គោលព័ទ្ធដីចម្ការស្រល់ បានលើកឡើងបែបរិះគន់ថាបើថ្នាក់អភិបាលស្រុកហ៊ានចុះហត្ថលេខាលក់ដីរដ្ឋបែបនេះ មិនមែនជារឿងធម្មតាដែលលោកអភិបាលស្រុកចេះតែលើកចុងប៊ិចកម្ទេចដើមស្រល់បានដោយចិត្តឯងនោះទេ ទំនងមានអ្នកតាស្រុកឱបដៃទើបអ្នកព្រៃហ៊ានចូល ហេតុនេះសូមឯកឧត្តមទេសរដ្ឋមន្រ្តី ជា សុផារ៉ា ដែលជារដ្ឋមន្រ្តីប្រជាជនទូទៅស្គាល់ថាជារដ្ឋមន្រ្តីដែនដីល្អពូកែដោះស្រាយរឿងដី មេត្តាចុះត្រួតពិនិត្យនិងយកមន្រ្តីគ្រាប់ល្ពៅនេះទៅស្ងោ ឲ្យទាន់ពេលវេលា រួមទាំងពួកគេបានដាក់បន្ទុកបញ្ហានេះទៅឲ្យលោករដ្ឋមន្រ្តីថែមទៀត។

ប្រសិនដោះស្រាយមិនទាន់ពេលវេលាទេដីចម្ការស្រល់ប្រមាណជាង២២៥ហិកតានេះនិងរលាយខ្ទេចដោយសារចុងប៊ិចរបស់លោកប្រធានគណ:បញ្ជាការស្រុកជាក់ជាមិនខានឡើយ។

ជាក់ស្តែងតាមការរកឃើញរបស់មន្រ្តីជំនាញដីទាំងនោះ មាន លោក នង ទុណ្ណារី អភិបាលស្រុកអូររាំងកាន់កាប់ខុសច្បាប់៣ហិកតា,លោក សៀក មុន្នី អភិបាលរងស្រុកមានក្បាលដី១០០ម៉ែត្រក្បាល និងដីកូនឯកឧត្តមរដ្ឋមន្រ្តីក្រសួងដែនដីក៏មានដោយបោះបង្គោលរួចជាស្រេចទៀតផង។

ប្រជាពលរដ្ឋនិងមន្ត្រីរាជការនៅខេត្តមណ្ឌលគិរី កំពុងរងចាំមើល ថាតើ ថ្នាក់ដឹកនាំ មានចំណាត់ការយ៉ាងណាលើមន្ត្រី ថ្លើមធំ ហ៊ាន យកដីចម្ការស្រល់របស់រដ្ឋមកធ្វើកម្មសិទ្ធិ ម៉្យាង អាជ្ញាធរខេត្ត ក៏ធ្លាប់ចូលរួម គោរពបុណ្យរុក្ខទិវា ចំនួន២ដងផងដែរ នៅចម្ការស្រល់នេះ៕ (នាង ចន្ថា)


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation