អនុប្រធានទី៣ គណៈអចិន្ត្រៃយ៍គណៈពង្រឹងមូលដ្ឋានស្រុកកោះធំ អំពាវនាវឲ្យប្រជាពលរដ្ឋ យកចិត្តទុកដាក់ ទៅលើបញ្ហាសុវត្ថិភាព និងសុខភាព ខណៈ​កម្ពុជាកំពុងទទួលរងគ្រោះទឹកជំនន់
| ព័ត៌មានជាតិ
SHARE

កណ្តាល ៖ ឯកឧត្តមសាស្ត្រាចារ្យ ឈាង រ៉ា អនុប្រធានទី៣ គណៈអចិន្ត្រៃយ៍គណៈពង្រឹងមូលដ្ឋានស្រុកកោះធំ
នៅក្នុងឱកាសអញ្ជើញដឹកនាំ​ ក្រុមគ្រូពេទ្យស្ម័គ្រចិត្ត សម្តេចអគ្គមហាសេនាបតីតេជោ ហ៊ុន សែន ចំនួនជាង៣៧៩នាក់ ចុះជួយពិនិត្យ ពិគ្រោះព្យាបាលជំងឺ ជូនប្រជាពលរដ្ឋ ជិត៦ពាន់នាក់ មកពីទាំង១១ឃុំ នៃស្រុកកោះធំ ខេត្តកណ្តាល ដោយឥតគិតថ្លៃ, បានមានប្រសាសន៍ អំពាវនាវ ឲ្យប្រជាពលរដ្ឋទាំងអស់ ជាពិសេស អ្នកដែលរស់នៅតាមដងទន្លេ យកចិត្តទុកដាក់ ទៅលើបញ្ហាសុវត្ថិភាព និងថែទាំ​សុខភាព ខណៈកម្ពុជា កំពុងមានគ្រោះទឹកជំនន់។

ឯកឧត្តម បានបន្ថែមថា នារដូវទឹកជំនន់ តែងតែមានបញ្ហាប្រឈមមួយចំនួន បានកើតឡើង ដូច្នេះត្រូវប្រុងប្រយ័ត្ន លើសុវត្ថិភាពក្មេងតូចៗ ជៀសវាងការលង់ទឹក និងប្រុងប្រយ័ត្នចំពោះសត្វពស់ និងសត្វអសិរពិសនានា ដែលបង្កឲ្យមានគ្រោះថ្នាក់។ ដោយឡែក ពាក់ព័ន្ធនឹងបញ្ហាសុខភាព, ឯកឧត្តម បានឲ្យដឹងថា នៅរដូវនេះ ប្រជាពលរដ្ឋតែងតែកើតមានជំងឺរាគរូស ដូច្នេះប្រជាពលរដ្ឋគួរគប្បី ហូបអាហារឲ្យមានអនាម័យល្អ​។  

ឯកឧត្តម ឈាង រ៉ា បានបន្ថែមថា ប្រសិនបើប្រជាពលរដ្ឋ មានបញ្ហាសុខភាពណាមួយកើតឡើងនោះ ត្រូវប្រញាប់ទៅកាន់មណ្ឌលសុខភាព ដែលនៅជិតបំផុត។ ឯកឧត្តមថា ការជួយរបស់ក្រុមគ្រូពេទ្យ បានតែមួយផ្នែកប៉ុណ្ណោះ ដូច្នេះដើម្បីមានសុខភាពល្អ ប្រជាពលរដ្ឋខ្លួនឯងផ្ទាល់ ត្រូវចេះថែទាំសុខភាព។

​ សូមជម្រាបថា ប្រជាពលរដ្ឋ ដែលបានទទួលសេវាពិនិត្យព្យាបាល រួមមាន៖ ជំងឺទូទៅ វះកាត់តូច កុមារ មាត់ធ្មេញ សម្ភពនិងរោគស្ត្រី អេកូសាស្ត្រ ត្រចៀក-ច្រមុះ-បំពង់ក ចក្ខុរោគ ឱសថជាដើមនោះ បានមានទឹកចិត្តសប្បាយរីករាយ​ ដែលបានទទួលនូវអំណោយសុខមាលភាព ដែលជាទ្រព្យ ដ៏ថ្លៃថ្លា និងបានថ្លែងអំណរសាទរ អរគុណយ៉ាងជ្រាលជ្រៅដល់ សម្តេចអគ្គមហាសេនាបតីតេជោ ហ៊ុន សែន ​ដែលតែងគិតគូនឹងដឹងសុខទុក្ខ របស់ប្រជាពលរដ្ឋ៕អត្ថបទ ៖ សន ពិសិដ្ឋ រូបភាព ៖ លឹម មុនី


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation