ការសិក្សាថ្មីមួយបង្ហាញថា រាជធានី-ខេត្តចំនួន ៦ មានអត្រាកើនឡើងខ្ពស់នៃការកើតជំងឺអេដស៍
| ព័ត៌មានជាតិ
SHARE

យោងតាមលទ្ធផលនៃការអង្កេតសន្ទស្សន៍ការមាក់ងាយលើអ្នកផ្ទុកមេរោគអេដស៍២.០ នៅប្រទេសកម្ពុជា ដែលបានបង្ហាញនៅក្នុងសិក្ខាសាលាមួយនៅដើមសប្តាហ៍នេះ បានឲ្យដឹងថា នៅក្នុងការ ការសម្ភាសន៍ជាមួយអ្នកផ្ទុកមេរោគអេដស៍ចំនួន ១២២២នាក់ (បុរសចំនួន ៤៧៦នាក់ និងស្រ្តីចំនួន ៧៤៦នាក់) ពីខេត្តចំនួន ៦ក្នុងប្រទេសកម្ពុជា ជាមួយនឹងការកើនឡើងខ្ពស់នៃការកើតជំងឺអេដស៍ ដូចជា ៖ រាជធានីភ្នំពេញ សៀមរាប បាត់ដំបង បន្ទាយមានជ័យ កណ្តាល និងកំពង់ចាម។

អ្នកចូលរួមក្នុងការអង្កេតនេះ ត្រូវបានរើសតាមរយៈគ្លីនិកដែលផ្តល់សេវាថែទាំ និងព្យាបាលមេរោគអេដស៍(ART) និងជាមួយការគាំទ្រពីអ្នកផ្តល់សេវា ART និងតាមរយៈការណែនាំ។

ការអង្កេតមានលក្ខណៈពិសេស ដោយសារការប្រមូលទិន្នន័យធ្វើឡើងដោយអ្នកផ្ទុកមេរោគអេដស៍ដែលបានទទួលការបណ្តុះបណ្តាលចំនួន ៣៦នាក់ ដែលបានបង្ហាញពីការខិតខំប្រឹងប្រែងទាំងស្រុងពីសមាគមន៍អ្នកផ្ទុកមេរោគអេដស៍។


ការអង្កេតនេះ ជាការធ្វើលើកទីពីរនៃសន្ទស្សន៍នៃការមាក់ងាយដោយសារមេរោគអេដស៍នៅក្នុងប្រទេសកម្ពុជា ដែលបានធ្វើឡើងដោយការធ្វើឱ្យប្រសើរឡើងនូវកម្រងសំណួរដែលឆ្លុះបញ្ចាំងនៅស្ថានភាពបច្ចុប្បន្ននៃការឆ្លងមេរោគអេដស៍ ដែលការអង្កេតលើកទីមួយត្រូវបានធ្វើឡើងក្នុងប្រទេសកម្ពុជាក្នុងឆ្នាំ ២០១០។

ឯកឧត្តម ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធជំងឺអេដស៍ លើកឡើងនៅក្នុងសន្និសីទ ពានរង្វាន់ព្រះអង្គម្ចាស់ម៉ាហ៊ីដុល ឆ្នាំ២០១៩ កាលពីកន្លងទៅនេះថា កម្ពុជាត្រូវបានទទួលស្គាល់ថា ជាប្រទេសមួយក្នុងចំណោម ប្រទេស ៧នៅលើសកលលោក (ប្រទេសបុតស្វាណា កម្ពុជា ដាណឺម៉ាក អ៊ីស្លង់ សិង្ហបុរី ស៊ុយអ៊ែត និងអង់គ្លេស) ដែលបានជោគជ័យជាងគេក្នុងការ សម្រេចបានគោលដៅ ៩០-៩០-៩០ នៅឆ្នាំ ២០១៧។ ក្នុងនោះគឺមានន័យថា ៩០%នៃអ្នកផ្ទុកមេរោគអេដស៍បានដឹងពីស្ថានភាពជំងឺអេដស៍របស់ខ្លួន ៩០%នៃអ្នកដឹងពីស្ថានភាពជំងឺបានទទួលការព្យាបាលដោយឱសថប្រឆាំងមេរោគអេដស៍ និង៩០% នៃអ្នកបានទទួលការព្យាបាលមានបន្ទុកមេរោគអេដស៍ទាបបំផុតនៅក្នុងឈាម។

ទោះជាយ៉ាងនេះក្តី ឯកឧត្តមបានថ្លែងថា យើងមានការលំបាកក្នុងការស្វែងរកអ្នកជំងឺអេដស៍ ១ម៉ឺននាក់ដែលបាត់មិនបានចូលក្នុងប្រព័ន្ធព្យាបាល ថវិកាសម្រាប់ប្រព័ន្ធសុខាភិបាលមានភាពរាយប៉ាយ មិនមានការផ្តល់ថវិកាដល់អង្គការសង្គមស៊ីវិល និងការគំរាមកំហែងពីជំងឺមិនឆ្លងផងដែរ។ ប៉ុន្តែ យើងមានការជឿជាក់ ក្នុងការឈានទៅលុប បំបាត់ជំងឺអេដស៍នៅឆ្នាំ២០២៥ ដោយកម្ពុជាមាននូវ ឆន្ទៈនយោបាយដ៏មោះមុត និងសមត្ថ ភាពបច្ចេកទេស សេដ្ឋកិច្ចបន្តនូវកំណើនដែលមាននូវលំហថវិកា និងអាជ្ញាធរជាតិប្រយុទ្ធនឹងជំងឺអេដស៍គឺជាជើងឯកក្នុងការធ្វើចលនាប្រភពធនធាន។

ក្នុងរយៈពេល ជាង២៨ឆ្នាំកន្លងទៅនេះ ថវិកាចំណាយក្នុងការឆ្លើយតបនឹងជំងឺអេដស៍មានប្រមាណ ៨០០លានដុល្លារអាម៉េរិក។ ជាលទ្ធផល កម្ពុជាបានជោគ ជ័យក្នុងការបង្ការមិនឱ្យមនុស្ស ៩សែន នាក់ឆ្លង និងបញ្ចៀសមនុស្ស ៦សែននាក់មិនឱ្យស្លាប់ពាក់ព័ន្ធនឹងជំងឺអេដស៍។ នេះជាជោគជ័យដ៏ធំធេងផ្នែកសង្គម និងសេដ្ឋកិច្ចសម្រាប់ប្រទេស។

យោងតាមរបាយការណ៍បង្ហាញថា កាលពីឆ្នាំ ២០១៧ កម្ពុជាមានអ្នកផ្ទុកមេរោគអេដស៍ប្រមាណ ៧២០០០នាក់ក្នុងនោះមានអ្នកផ្ទុកមេរោគអេដស៍ប្រមាណជាង ៨០ភាគរយ ដែលទៅទទួលការថែទាំសុខភាព និងការព្យាបាលបានត្រឹមត្រូវ៕
អត្ថបទ៖ សៀម ប៊ុនធី

Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation