សម្តេចតេជោ បន្តជំរុញឲ្យវៀតណាម ផ្តោតលើកិច្ចសហប្រតិបត្តិការទ្វេរភាគីលើគ្រប់វិស័យ ជាមួយកម្ពុជា ជាពិសេសលើ​វិស័យសេដ្ឋកិច្ច ពាណិជ្ជកម្ម និងវិនិយោគ
| ព័ត៌មានជាតិ
SHARE

ភ្នំពេញ ៖ សម្តេច​តេជោ ហ៊ុន សែន នាយករដ្ឋមន្ត្រី ​នៅរសៀលថ្ងៃទី២០ ខែសីហានេះ បានអនុញ្ញាតឲ្យ ឯកឧត្តម ផាម ប៊ិញមិញ ឧបនាយករដ្ឋមន្រ្តី រដ្ឋមន្រ្តីការបរទេស នៃសាធារណរដ្ឋសង្គមនិយមវៀតណាម ​ចូលជួបសម្តែងការគួរសម ​នៅឯវិមានសន្តិភាព ក្នុងឱកាសដែលឯកឧត្តម អញ្ជើញមកកម្ពុជា ដើម្បីចូលរួមកិច្ចប្រជុំគណៈកម្មការចម្រុះ រវាងកម្ពុជានិងវៀតណាម លើកទី១៧ ដែលរៀបចំដោយ ក្រសួងការបរទេស និងសហប្រតិបត្តិការអន្តរជាតិ ដែលនឹងប្រព្រឹត្តទៅនៅថ្ងៃទី២១ ខែសីហាស្អែកនេះ, កិច្ចប្រជុំនេះ នឹងដឹកនាំរួម រវាង​ឯកឧត្តមឧបនាយករដ្ឋមន្ត្រីប្រាក់ សុខុន និងឧបនាយករដ្ឋមន្ត្រីវៀតណាម។

បើតាមប្រសាសន៍ ឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានប្រាប់ឲ្យដឹងថា ​នៅក្នុងជំនួបថ្ងៃនេះ គឺមានការផ្លាស់ប្ដូរមតិមួយចំនួន ជាពិសេសសម្ដេចតេជោ បានផ្ដល់អនុសាសន៍​ ដើម្បីធ្វើយ៉ាងណា ឲ្យកិច្ចប្រជុំគណៈកម្មការចម្រុះថ្ងៃស្អែកនេះ ប្រព្រឹត្តទៅដោយជោគជ័យ និងមានខ្លឹមសារ ហើយ​ឈរលើគោលការណ៍មិត្តភាព ការរីកចម្រើន និងកិច្ចសហប្រតិបត្តិការ រវាងប្រទេសទាំងពីរ​។ ជំនួបនេះ ក៏ផ្ដោតសំខាន់ ទៅលើដំណើរទស្សនកិច្ចផ្លូវការ របស់សម្ដេចតេជោ ទៅប្រទេសវៀតណាម នៅខែកញ្ញា ឆ្នាំ២០១៩នេះ។

សម្តេចតេជោ បានលើកទឹកចិត្ត ឲ្យគណៈកម្មការចម្រុះ ពិភាក្សាការងារ ជំរុញកិច្ចសហប្រតិបត្តិការ និងពង្រឹងទំនាក់ទំនងទ្វេភាគីគ្រប់វិស័យ។ ជាពិសេសទៀត គឺការត្រៀមនូវការចុះហត្ថលេខា លើកិច្ចព្រមព្រៀង នៃការងារព្រំដែន រវាងប្រទេសទាំងពីរ ដោយសារបច្ចុប្បន្ន​ គឺកិច្ចការងារព្រំដែននេះ បានបញ្ចប់៨៤ភាគរយហើយ នៅសល់ត្រឹម១៦ភាគរយទៀតប៉ុណ្ណោះ ដែលគណៈកម្មការចម្រុះព្រំដែនកម្ពុជា-វៀតណាម នឹងបន្តធ្វើការងារ។ ​នៅក្នុងស្មារតីកិច្ចសហប្រតិបត្តិការ និងមិត្តភាព រវាងប្រទេសភូមិផងរបងជាមួយនេះ សម្តេចតេជោបន្តជំរុញ ផ្តោតលើកិច្ចសហប្រតិបត្តិកា ​វិស័យសេដ្ឋកិច្ច ពាណិជ្ជកម្ម វិនិយោគ។

សម្ដេចតេជោនាយករដ្ឋមន្ត្រី ក៏បានស្នើឲ្យភាគីវៀតណាម រៀបចំវេទិកាទុរកិច្ចកម្ពុជា-វៀតណាម នៅពេលទស្សនកិច្ចសម្ដេចតេជោ ទៅកាន់​វៀតណាមនៅពេលខាងមុខនេះ ធ្វើយ៉ាងណាដើម្បីផ្ដល់ឱកាសឲ្យគៀងគរ វិនិយោគិនវៀតណាម មកកាន់ប្រទេសកម្ពុជា។ ​សម្ដេចតេជោ​ ការជំរុញធ្វើយ៉ាងណាពាណិជ្ជកម្ម រវាងប្រទេសទាំងពីរ ឲ្យមានការកើនឡើងថែមទៀត ថ្វីត្បិតតែបច្ចុប្បន្ននេះ ​មានទំហំពាណិជ្ជកម្ម រវាងកម្ពុជានិងវៀតណាម មានចំ​នួនច្រើនហើយ ពោលគឺស្រដៀងកម្ពុជានិងថៃផងដែរ គឺប្រមាណ​​ជិត៦ពាន់លានដុល្លារ​។

​ឯកឧត្តមឧបនាយករដ្ឋមន្ត្រីវៀតណាម បានបង្ហាញការរីករាយ ដែលបានឃើញសមិទ្ធផល នៃការរីកចម្រើនការអភិវឌ្ឍ ប្រទេសកម្ពុជាកន្លងមកនេះ។ ឯកឧត្តមថា​ ក្រោមការដឹកនាំរបស់រាជរដ្ឋាភិបាលកម្ពុជា ​មានការរីកចម្រើនយ៉ាងខ្លាំង ជាពិសេសទៅលើវិស័យសេដ្ឋកិច្ច និងសំណង ​ហើយលើសពីនេះទៀត ឯកឧត្តមប្តេជ្ញាថា ក្នុងការទស្សនកិច្ចរបស់ សម្ដេចតេជោ ទៅកាន់​វៀតណាមខាងមុខនេះ ​ភាគីវៀតណាម នឹងត្រៀមធ្វើយ៉ាងណា ឲ្យដំណើរការទស្សនកិច្ច​នេះ ទទួលបានជោគជ័យ៕ អត្ថបទ ៖ សន ពិសិដ្ឋ រូបភាព ៖ អេង សុគុណ, លឹម មុនី


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation