ព័ត៌មានជាតិ

កាកបាទក្រហម ផ្តល់អំណោយមនុស្សធម៌ ដល់ពលរដ្ឋងាយរងគ្រោះ ជាង១៣ម៉ឺនគ្រួសារនៅទូទាំងប្រទេស ក្នុងឆ្នាំ០១៨

image

កាកបាទក្រហមកម្ពុជាបានបើកកិច្ចប្រជុំគណៈកម្មាធិការកណ្តាលកាកបាទក្រហមកម្ពុជា ដើម្បីពិភាក្សានិងអនុម័តលើរបៀបវារៈសំខាន់ៗដូចជា ៖ របាយការណ៍សកម្មភាពឆ្នាំ២០១៨ និងទិសដៅឆ្នាំ២០១៩ , របាយការណ៍ចំណូលចំណាយ ឆ្នាំ២០១៨ និងការព្យាករណ៍ ចំណូលថវិកានៅឆ្នាំ២០១៩ ,ការស្នើសុំអនុម័តផែនការថវិកាសម្រាប់ចំណាយជាអាទិភាពនៅ ឆ្នាំ២០១៩និងបញ្ហាផ្សេងៗ។

ក្រោមអធិបតីភាពដ៏ខ្ពង់ខ្ពស់ពីសំណាក់សម្តេចកិត្តិព្រឹទ្ធបណ្ឌិតប៊ុន រ៉ានីហ៊ុន សែនប្រធានកាកបាទក្រហមកម្ពុជា និងសមាជិកសមាជិការនៃគណៈកម្មាធិការកណ្តាលកាកបាទក្រហមកម្ពុជាជាច្រើនរូប ។នៅទីស្នាក់កណ្តាលកាកបាទក្រហមកម្ពុជាក្នុងរាជធានីភ្នំពេញនាល្ងាចថ្ងៃច័ន្ទ១១កើត ខែមិកសិរឆ្នាំចសំរឹទ្ធិស័កព.ស២៥៦២ ត្រូវនឹងថ្ងៃទី១៧ខែធ្នូឆ្នាំ២០១៨ ។ក្នុងកិច្ចប្រជុំនេះក៏បានបង្ហាញពីសកម្មភាពនិងបេសកម្មមួយឆ្នាំ២០១៨នេះដោយ កាកបាទក្រហមកម្ពុជា បានផ្ដល់អំណោយមនុស្សធម៌ជូនប្រជាពលរដ្ឋដោយផ្ទាល់ និងដោយប្រយោលសរុបប្រមាណ ១៣៨,៩៣៧គ្រួសារ និងសេវាកម្មមនុស្សធម៌ផ្សេងៗទៀត ជាង១០ម៉ឺនគ្រួសារ។ នេះបើយោងតាមរបាយការណ៍សកម្មភាពការងារឆ្នាំ២០១៨ និងទិសដៅការងារឆ្នាំ២០១៩ របស់កាកបាទក្រហមកម្ពុជា បង្ហាញនៅក្នុងកិច្ចប្រជុំគណៈកម្មាធិការកណ្ដាល នៅស្នាក់កណ្ដាលកាកបាទក្រហមកម្ពុជា នៅរសៀលថ្ងៃទី១៧ ខែធ្នូ ឆ្នាំ២០១៨ ។

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានកោតសរសើរចំពោះ ថ្នាក់ដឹកនាំ មន្ត្រីប្រតិបត្តិ អ្នកស្ម័គ្រចិត្ត និងយុវជនកាកបាទក្រហមកម្ពុជាទាំងអស់ ដែលបានខិតខំបំពេញភារកិច្ចយ៉ាងខ្ជាប់ខ្ជួន ក្នុងការជួយសម្រាលការលំបាកដល់ជនរងគ្រោះ និងងាយរងគ្រោះ ឲ្យបានទាន់ពេលវេលា និងប្រកបដោយប្រសិទ្ធិភាពខ្ពស់ ទៅតាមផែនការប្រចាំឆ្នាំដែលបានកំណត់ និងក្នុងកិច្ចការងារក្រៅអាទិភាពជាច្រើនទៀត។

លើសពីនោះសម្ដេចកិត្ដិព្រឹទ្ធបណ្ឌិត ក៏បានលើកទឹកចិត្ដ ជាពិសេស ចំពោះសកម្មភាពរបស់យុវជនទូទាំងប្រទេស ក្នុងនាមជាយុវជនរបស់កាកបាទក្រហមកម្ពុជា ក៏ដូចជាអ្នកស្ម័គ្រចិត្ដ ត្រូវបន្ដខិតខំប្រឹងប្រែងពង្រឹង និងពង្រីកសមត្ថភាព ធ្វើជាយុវជនគំរូ និងនាំមុខ ក្នុងវិស័យអប់រំ ពិសេសនៅក្នុងថ្នាក់រៀនរបស់ខ្លួន។ទន្ទឹមនឹងនោះ សម្ដេចកិត្ដិព្រឹទ្ធបណ្ឌិត បានថ្លែងអំណរគុណយ៉ាងជ្រាលជ្រៅចំពោះសប្បុរសជនជាតិ-អន្តរជាតិ ដែលបានផ្តល់នូវថវិកា និងសម្ភារ ជូនដល់កាកបាទក្រហមកម្ពុជា ក្នុងទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ជារៀងរាល់ឆ្នាំ និងក្នុងឱកាសផ្សេងៗកន្លងមកនេះ ។

ជាងនេះទៅទៀត សម្ដេចកិត្ដិព្រឹទ្ធបណ្ឌិត ក៏បានថ្លែងអំណរព្រះរាជគុណ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលតែងតែប្រោសព្រះរាជទាន ព្រះរាជទ្រព្យ ដើម្បីទ្រទ្រង់ សកម្មភាពមនុស្សធម៌ របស់កាកបាទក្រហមកម្ពុជា សម្រាប់ជួយសង្គ្រោះ ប្រជារាស្ត្រ កម្ពុជាក្រីក្រ ទទួលរងគ្រោះ ដោយគ្រោះមហន្តរាយផ្សេងៗ។

សូមជម្រាបថា ក្រោមការដឹកនាំដ៏ប្រកបដោយគិតបណ្ឌិតរបស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកកម្ពុជា បានណែនាំតម្រង់ទិស ការងារនៃវិស័យទាំងបួន តាមយុទ្ធសាស្ដ្រ២០១១-២០២០ របស់កាកបាទក្រហមកម្ពុជា ស្របតាមគោលនយោបាយជាតិ ឲ្យប្រតិបត្ដិការទៅយ៉ាងរលូន និងមានប្រសិទ្ធិភាព ។ជាក់ស្ដែងនៅឆ្នាំ២០១៨ ជាឆ្នាំដែលកម្ពុជា បន្ដការអភិវឌ្ឍលើកគ្រប់វិស័យ នៃប្រទេសជាតិទាំងមូល ក្រោមពាក្យស្លោក «សន្ដិភាព ជាមូលដ្ឋានគ្រឹះនៃការអភិវឌ្ឍ»។ កាកបាទក្រហមកម្ពុជា ក្នុងតួនាទីជាជំនួយការ ឲ្យអាជ្ញាធរសាធារណ និងជាស្ថាប័ននាំមុខគេ ក្នុងវិស័យមនុស្សធម៌ នៅតែខិតខំពង្រឹង និងពង្រីកវិសាលភាពទូទាំងប្រទេស។

ឆ្នាំនេះបើទោះបីជាកម្ពុជាមានគ្រោះទឹកជំនន់ដោយទឹកភ្លៀង ទឹកទន្លេមេគង្គស្ទើរទូទាំងប្រទេស និងរងផលប៉ះពាល់ ពីការបាក់ទំនប់ វារីអគ្គិសនីពីប្រទេសឡាវក៏ដោយ ក៏កាកបាទក្រហមកម្ពុជា នៅតែបន្ដប្រឹងប្រែង អនុវត្ដឆ្ពោះទៅតាមទស្សនវិស័យ «ចូលរួមកាត់បន្ថយភាពក្រីក្រ»ជាមួយរាជរដ្ឋាភិបាល ដោយក្ដោបការទុកយកចិត្ដទុកដាក់ លើការងារ ឆ្លើយតបចំពោះគ្រោះមហន្ដរាយ ដែលបង្កដោយធម្មជាតិ និងមនុស្ស ការថែទាំសុខភាពក្នុងសហគមន៍ ព្រមជាមួយការលើកកម្ពស់ ការងារសុខុមាលភាពសង្គម ដែលជាបញ្ហាប្រឈម សម្រាប់ប្រជាជនកម្ពុជាទាំងមូល៕( អត្ថបទ ៖ថឹង ចាន់ថារ៉ាន់ )


ព័ត៌មានទាក់ទង...