សម្តេចកិត្តិព្រឹទ្ធបណ្ឌិត ៖ កាកបាទក្រហមកម្ពុជាបាននិងកំពុងបន្តអនុវត្តយុទ្ធសាស្ត្រ ២០១១-២០២០ ដោយផ្តោតលើវិស័យស្នូលទាំង៤
| ព័ត៌មានជាតិ
SHARE



(ភ្នំពេញ) ៖ នាព្រឹកថ្ងៃអង្គារ ថ្ងៃទី៨ ខែឧសភា ឆ្នាំ២០១៨ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញជា អធិបតីប្រារព្ធទិវាពិភពលោកកាកបាទក្រហម អឌ្ឍចន្ទក្រហម ៨ឧសភា លើកទី១៥៥ ក្រោមប្រធានបទ “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា ដោយមិនទុកនរណា ម្នាក់ចោល” ដែលពិធីនេះធ្វើឡើងនៅទីស្នាក់ការកណ្ដាលកាកបាទក្រហមកម្ពុជា។

នាឱកាសនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានមានប្រសាសន៍ថ្លែងអំណរគុណ ចំពោះការចូលរួមចំណែកពីសំណាក់សប្បុរសជនជាតិ អន្តរជាតិ បានធ្វើឱ្យកាកបាទក្រហមកម្ពុជាមានធនធានហិរញ្ញវត្ថុគ្រប់គ្រាន់ក្នុងការដោះស្រាយសេចក្តីត្រូវការជាក់ស្តែងរបស់អ្នករងគ្រោះ និងអ្នកងាយរងគ្រោះបំផុតនៅតាមសហគមន៍។

ប្រធានកាកបាទក្រហមកម្ពុជា បន្តថា ជាក់ស្តែងក្នុងឆ្នាំ២០១៧ មកដល់ខែមេសាឆ្នាំ២០១៨នេះ កាកបាទក្រហមកម្ពុជា បាននិងកំពុងបន្តអនុវត្តយុទ្ធសាស្ត្រ ២០១១-២០២០ របស់ខ្លួនផ្តោតលើវិស័យស្នូលទាំង៤ គឺ ៖
១.គ្រប់គ្រងគ្រោះមហន្តរាយ
២.អប់រំ ថែទាំសុខភាពតាមសហគមន៍
៣.លើកកម្ពស់តម្លៃមនុស្សធម៌ និង
៤. អភិវឌ្ឍស្ថាប័ន។


ជាមួយនឹងវិស័យស្នូលទាំង៤ទាំង៤នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានបញ្ជាក់សមិទ្ធផលសំខាន់ៗដែលសម្រេចបានរួមមាន៖
-ប្រជាពលរដ្ឋតាមជនបទដាច់ស្រយាលជាង១ម៉ឺនគ្រួសារទទួលបានអណ្តូងទឹកស្អាត៤៣៣ និងស្រះទឹកសហគមន៍ ចំនួន៧។
-ប្រជាពលរដ្ឋងាយរងគ្រោះបំផុត គឺចាស់ឥតទីពឹង កុមារកំព្រា កុមារខ្សោយសតិបញ្ញា ស្រ្តីមេម៉ាយ អ្នកពិការ អ្នករស់នៅជាមួយមេរោគអេដស៍ អ្នកមានជម្ងឺរាំរ៉ៃ ជាង១០ម៉ឺនគ្រួសារ ទទួលបានការជួយឧបត្ថម្ភ ជាស្បៀង សំភារៈ និងថវិកា។ -បុគ្គលិកក្នុងវិស័យឯកជន ១០,៣២៩នាក់ និងអ្នកស្ម័គ្រចិត្ត ៥១៦នាក់ ទទួលបានការបណ្តុះបណ្តាលវិជ្ជាជីវៈសង្គ្រោះបឋមនិងបានផ្សព្វផ្សាយបន្តដល់ប្រជាពលរដ្ឋ រាប់ពាន់នាក់។ សិស្ស និស្សិត មន្ត្រីរាជការប្រជាពលរដ្ឋប្រជាពលរដ្ឋ ប្រមាណ៧ម៉ឺននាក់ បានទទួល ចំណេះដឹង ស្តីពីច្បាប់ចរាចរណ៍ ផ្លូវគោក។
-យុវជនកាកបាទក្រហមជាង២ម៉ឺននាក់ ទូទាំងប្រទេស តែងតែចូលរួមក្នុងសកម្មភាព មិត្តអប់រំមិត្ត សំអាតបរិស្ថាន ដាំដើមឈើ និងបរិច្ចាកឈាម ជាដើម។
-ប្រជាពលរដ្ឋនៅតាមតំបន់ព្រំដែន ជាង១ម៉ឺនគ្រួសារ បានទទួលសារគន្លឹះអប់រំពីគ្រោះថ្នាក់ដោយសារ គ្រាប់មីន និងគ្រាប់មិនទាន់ផ្ទុះ ក្នុងពេលដែលប្រជាពលរដ្ឋ ២៩៤គ្រួសារ ទទួលបានប្រាក់កម្ចី ឥតការប្រាក់ ធ្វើជាដើមទុនប្រកបមុខ របរមានជីវភាពប្រសើរឡើង ហើយបងប្អូនជនជាតិ តែងតែបានទទួលនូវសារថែទាំអប់រំ សុខភាព ក្នុងឱកាសទិវាជាតិដើម្បីសុខភាព មាតា និងទារក ២១កុម្ភៈ,ទិវាឆ្មបជាតិ ៥ឧសភា និងទិវាពិភពលោកប្រយុទ្ធជម្ងឺអេដស៍ ១ធ្នូ។

ប្រធានកាកបាទក្រហមកម្ពុជា មានប្រសាសន៍បន្តទៀតថា ក្រៅពីសមិទ្ធផលសំខាន់ៗខាងលើនេះកាកបាទក្រហមកម្ពុជាបានឧបត្ថម្ភដល់មន្ទីរពេទ្យគន្ធបុប្ផាចាប់ពីឆ្នាំ ២០១២ មក ដោយក្នុងមួយឆ្នាំៗ ចំនួន មួយលានដុល្លារអាមេរិក និងបានជួយសាងសង់ និងជួសជុល លំនៅឋាន បានរាប់រយខ្នង ធ្វើបង្គន់អនាម័យ រាប់ពាន់បន្ទប់ ផ្តល់ស៊ីទែនទឹក និងធុងចម្រោះទឹក ជូនដល់ប្រជាពលរដ្ឋនៅតាម ខេត្តនានា និងបានជួយស្វែងរក គ្រួសារដែលបែកគ្នា ជាង៤០ឆ្នាំ ឱ្យបានជួបគ្នាឡើងវិញ បានជួយសាងសង់អគារ សិក្សា អគារស្នាក់នៅ នៅតាមអង្គការ សមាគម និងមណ្ឌលកុមារកំព្រាមួយចំនួន៕


Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation