អ្នកនាំចេញ ៖ ស្ថានភាពទឹកភ្លៀងកំពុងបង្កក្តីបារម្ភដល់គុណភាពអង្ករ
| ព័ត៌មានជាតិ
SHARE


• ភ្លៀងធ្លាក់ស្ទើរគ្រប់ទីកន្លែងបង្កជំនន់
• ការប្រមូលផលស្រូវសែនក្រអូបកំពុងប្រជែងជាមួយភ្លៀងធ្លាក់
• អង្ករសែនក្រអូបមានតម្រូវការខ្ពស់ពីទីផ្សារបរទេស


អ្នកនាំចេញអង្ករទៅកាន់ទីផ្សារបរទេស បានអះអាងថា ស្ថានភាពភ្លៀងក្នុងមួយរយៈប៉ុន្មានថ្ងៃចុងក្រោយនេះ ក្នុងអំឡុងពេលដែលការប្រមូលផលស្រូវសែនក្រអូបកំពុងមមាញឹកនោះ អាចបង្កផលប៉ះពាល់ដល់ប្រជាកសិករ និង គុណភាពអង្ករសម្រាប់នាំចេញផងដែរ។

លោក យ៉ន សុវណ្ណ នាយកក្រុមហ៊ុន បាយ័នសឺរៀល ដែលនាំចេញអង្ករទៅកាន់ទីផ្សារអន្តរជាតិ បានអះអាងថា ស្ថានភាពភ្លៀងក្នុងពេលនេះមិនអំណោយផលដល់ប្រជាកសិករនោះទេ ព្រោះកសិករកំពុងតែប្រមូលផលស្រូវសែនក្រអូប ដែលជាប្រភេទស្រូវមានតម្រូវការច្រើនពីទីផ្សារក្រៅប្រទេស។
លោក យ៉ន សុវណ្ណ សង្កេតឃើញថា ភ្លៀងធ្លាក់យ៉ាងច្រើនក្នុងពេលស្រូវកំពុងចេញផ្កា និង ក្នុងពេលប្រមូលផលនាំពេលនេះ។ ភ្លៀងធ្លាក់ក្នុងដំណាក់កាលទាំងពីរនេះ ធ្វើឲ្យប៉ះពាល់ដល់គុណភាពអង្ករសម្រាប់នាំចេញ។

លោក ហេង ផេង នាយកក្រុមហ៊ុនថ្មគោលរ៉ាយស៍ ដែលមានរោងម៉ាស៊ីនខ្នាតធំនៅ ស្រុកថ្មគោលខេត្តបាត់ដំបង បានឲ្យដឹងថា កសិករកំពុងតែមមាញឹកក្នុងការប្រមូលផលស្រូវសែនក្រអូប ហើយ តំបន់មួយចំនួននៅខេត្តបន្ទាយមានជ័យ ត្រូវលិចទឹកដោយជន់ទឹកភ្លៀង ដែលជាហេតុបង្ខំអោយកសិករឆាប់ច្រូតមុនស្រូវទុំ ព្រោះខ្លាចទឹកជន់លិច។
លោក អះអាងថា ស្រូវសែនក្រអូបមានភាពប្រកួតប្រជែងខ្លាំងណាស់នៅទីផ្សារអន្តរជាតិ ដោយសារវាមានតម្រូវការខ្ពស់នៅទីផ្សារអន្តរជាតិ។
លោក អះអាងថា បើទោះបីភ្លៀងបង្កការលិចលង់ខ្លះ បង្កការលំបាកខ្លះ ប៉ុន្តែតម្លៃរបស់ស្រូវសែនក្រអូបនៅតែល្អសម្រាប់រដូវកាលនេះ។

និន្នាការនៃការផលិតស្រូវដែលមានគុណភាពល្អ មានការកើនឡើងក្នុងរយៈពេលប៉ុន្មានឆ្នាំចុងក្រោយនេះ ស្របតាមតម្រូវការទីផ្សារ ដែលកសិករអាចបង្កើនទាំងបរិមាណនៃការផលិត និង តម្លៃរបស់ផលិតផល។
យោងតាមទិន្នន័យនាំចេញអង្ករទៅកាន់ទីផ្សារអន្តរជាតិ បរិមាណអង្ករក្រអូបប្រណិតរបស់កម្ពុជា បានកើនឡើងជាតិបន្តបន្ទាប់ចាប់តាំងពីឆ្នាំ២០១២ ជាឆ្នាំដែលអង្ករកម្ពុជាឈ្នះពានអង្ករល្អបំផុតក្នុងពិភពលោក លើកដំបូង ចាប់តាំងពីកម្ពុជាចូលរួមប្រកួតលើកឆាកអន្តរជាតិ។

ក្នុងឆ្នាំ២០១២ បរិមាណអង្ករក្រអូបនាំចេញទៅកាន់ទីផ្សារអន្តរជាតិ មានចំនួន ១០៣ ៤៩៣ តោន ហើយ បរិមាណនាំចេញអង្ករក្រអូបកើនឡើងស្ទើ១០០% នៅឆ្នាំ២០១៣ ដែលមានចំនួន ១៨៤ ៨៥៣ តោន។ រហូតដល់ឆ្នាំ២០១៧ កន្លងទៅនេះ ការនាំចេញអង្ករក្រអូបពីប្រទេសកម្ពុជាមានបរិមាណជិត ៤០០ ០០០តោន ដែលមានកំណើនស្ទើរបួនដងធៀបនឹងឆ្នាំ២០១២។

ការនាំចេញអង្ករក្រអូបត្រូវបានអ្នកប្រកបអាជីវកម្មក្នុងវិស័យនេះ បញ្ជាក់ថា ទីផ្សារស្រូបយកអង្ករក្រអូបពីកម្ពុជាច្រើនគឺទីផ្សារប្រទេសចិន ប្រទេសម៉ាឡេស៊ី និង ចំណែកខ្លះត្រូវស្រូបយកដោយទីផ្សារអឺរ៉ុប៕

អត្ថបទ ៖ រ៉ាន់ រើយ

Logo Brand Footer

Tel: 078 888 900
ផ្លូវជាតិលេខ ៥, ភូមិក្រោលគោ, សង្កាត់គីឡូម៉ែត្រលេខ ៦, ខណ្ឌឫស្សីកែវ, រាជធានីភ្នំពេញ, ប្រទេសកម្ពុជា

ទាញយកកម្មវិធី CNC NEWS ទៅក្នុងទូរស័ព្ទអ្នក

App Store  Play Store

Follow US

Facebook

Youtube

Line

កំពុងស្វែងរក:

​© រក្សា​សិទ្ធិ​គ្រប់​យ៉ាង​ដោយ​ CNC ឆ្នាំ​២០១៧ | Developed by INSTICT Innovation