បុរសម្នាក់ យកសំបកដបគប់កញ្ចក់រថយន្តគេបែក ត្រូវប៉ូលីសចាប់វ៉ៃខ្នោះបញ្ជូនទៅតុលាការខេត្តបាត់ដំបង
បាត់ដំបង៖ បុរសម្នាក់ បានទាញសំបកដបទឹកក្រូចស្ទាក់គប់កញ្ចក់រថយន្តអ្នកធ្វើដំណើរតាមផ្លូវបណ្តាលឱ្យបែកកញ្ចក់ខាងក្រោយ តែត្រូវប៉ូលីសចាប់វ៉ៃខ្នោះបញ្ជូនទៅតុលាការ។ ករណីនេះបានកើតឡើង នៅលើដងផ្លូវមួយកន្លែង ក្នុងភូមិសូភី១ សង្កាត់រតនៈ ក្រុងបាត់ដំបង។
យោងតាមប្រភពសមត្ថកិច្ច បានឱ្យដឹងថា ជនដៃដល់ឈ្មោះ សៀង សំ អាយុ៣៩ឆ្នាំ រស់នៅភូមិរំចេក៣ សង្កាត់រតន: ក្រុងបាត់ដំបង។ ម្ចាស់រថយន្តបានប្រាប់សមត្ថកិច្ចថា បានធ្វើដំណើរមកពីលេងផ្ទះបងប្អូន លុះបើកដល់ចំណុចខាងលើ ស្រាប់តែមានគេលួចគប់រថយន្តគាត់ចំកញ្ចក់ខាងក្រោយលាន់ដូចគ្រាប់កាំភ្លើង។ បន្ទាប់ពីដឹងថា មានគេលួចគប់រថយន្ត គាត់ក៏បើកហួសបន្តិចឈប់មើល ក៏ឃើញរថយន្តបែកកញ្ចក់ខាងក្រោយទើបផ្អើលឆោឡោ និងមានពលរដ្ឋរាយការណ៍ទៅសមត្ថកិច្ចចុះអន្តរាគមន៍ រហូតចាប់ជនដៃដល់បានភ្លាមៗ។
ជនល្មើសឈ្មោះ សៀង សំ បាននិយាយប្រាប់សមត្ថកិច្ចថា មូលហេតុដែលខ្លួនទាញដបទឹកក្រូចគប់ទៅលើរថយន្តគេ ដោយសារតែរថយន្តនោះបើកលឿនពេក។ ទោះយ៉ាងនេះក៏ដោយសមត្ថកិច្ចបានបញ្ជាក់ថា បើតាមប្រវត្តិកន្លងមកជនឈ្មោះ សៀង សំ ធ្លាប់ពួនស្ទាក់គប់រថយន្តគេម្ដងហើយ នេះជាការគប់លើកទី២។ ប៉ុន្តែបើតាមអ្នកភូមិដែលស្គាល់សាវតាជននោះបានប្រាប់ថាជាមនុស្សសេពគ្រឿងញៀន។
ទោះយ៉ាងណាក៏ដោយការឃាត់ខ្លួនជនល្មើសនេះ មន្ត្រីជំនាញបានរកឃើញដបទឹកក្រូចចំនួន២ ដែលជាវត្ថុតាង។ ដោយយោងគោលការណ៍លោកស្នងការខេត្តបាត់ដំបង និងមានការឯកភាពពីលោកព្រះរាជអាជ្ញាផង បច្ចុប្បន្នការិយាល័យជំនាញកំពុងកសាងសំណុំរឿងបញ្ជូនទៅសាលាដំបូងខេត្តបាត់ដំបងចាត់ការតាមនីតិវិធីហើយ៕